Video: ફ્લોરિડામાં વિમાન દુર્ઘટના,9 લોકોના મોત

અમેરિકાના ફ્લોરિડા રાજ્યમાં એક અત્યંત હૃદયદ્રાવક અકસ્માત સર્જાયો હતો, જ્યાં ટેક્સાસથી બહામાસ જઈ રહેલું લિયરજેટ 60 પ્રાઇવેટ બિઝનેસ જેટ વિમાન અચાનક અનિયંત્રિત થઈને જમીન પર તૂટી પડ્યું હતું. આ ભયાનક દુર્ઘટનામાં વિમાનમાં સવાર પાઈલટ સહિત તમામ 9 લોકોના મોત નીપજ્યા છે, જેની પરિવહન મંત્રી શૉન ડફીએ પણ પુષ્ટિ કરી છે. સદનસીબે આ વિમાન નજીકની વસાહતના ઘરો કે વ્યસ્ત રસ્તા સાથે અથડાતા માંડ-માંડ બચી ગયું હતું, નહીંતર તેના કારણે અન્ય મોટી જાનહાનિ થઈ શકત. વિમાન જમીન સાથે અથડાતા જ ભયાનક વિસ્ફોટ થયો હતો અને ચારેય તરફ આગની લપટો સાથે ઘાટો કાળો ધુમાડો છવાઈ ગયો હતો. આ દુર્ઘટના અમેરિકાના રાષ્ટ્રપતિ ડોનાલ્ડ ટ્રમ્પના માર-એ-લાગો નિવાસસ્થાનથી ખૂબ જ નજીક સર્જાઈ હતી. હાલ ફેડરલ એવિએશન એડમિનિસ્ટ્રેશન અને એનટીએસબીની વિશેષ ટીમ આ વિમાન દુર્ઘટના પાછળના અસલી કારણોની ઊંડાણપૂર્વક તપાસ કરી રહી છે.