ભારતના જલાલાબાદ કોન્સ્યુલેટને બંધ કરાવવા પાકિસ્તાનની તાલિબાન સમક્ષ માગણી? કંધારની ગુપ્ત બેઠકમાં 5 મુદ્દે થઈ ચર્ચા

પાકિસ્તાન અને અફઘાનિસ્તાનના તાલિબાન શાસન વચ્ચે ચાલી રહેલા તણાવની વચ્ચે કંધારમાં બંને પક્ષો વચ્ચે એક ગુપ્ત બેઠક યોજાઈ હોવાનો અહેવાલ સામે આવ્યો છે. અફઘાનિસ્તાનના પૂર્વ ન્યાયમંત્રી ફઝલ અહમદ મનાવી દ્વારા આપવામાં આવેલી માહિતી અનુસાર, 22 ઓક્ટોબર 2026ના રોજ પાકિસ્તાની પ્રતિનિધિમંડળે કંધારમાં તાલિબાનના વરિષ્ઠ અધિકારીઓ સાથે મુલાકાત કરી હતી. આ બેઠકમાં પાકિસ્તાને પાંચ મહત્ત્વના મુદ્દા ઉઠાવ્યા હતા.

પાકિસ્તાને મૂકી પાંચ માગણીઓ

અહેવાલ મુજબ, પાકિસ્તાની પ્રતિનિધિમંડળે અફઘાનિસ્તાનમાં હાજર તહરીક-એ-તાલિબાન પાકિસ્તાન (TTP)ના નેતાઓને પાકિસ્તાનને સોંપવાની માગણી કરી હતી. સાથે જ અફઘાન લડવૈયાઓ પાકિસ્તાનમાં ઘૂસણખોરી ન કરે તે માટે પગલાં લેવા જણાવ્યું હતું. પાકિસ્તાને અફઘાન તાલિબાનના નેતાઓની પાકિસ્તાનમાં આવેલી મિલકતો વેચવાની અને જલાલાબાદમાં આવેલી ભારતીય કોન્સ્યુલેટ (Indian Consulate) બંધ કરવાની માગણી પણ કરી હતી. પાંચમા મુદ્દા તરીકે અફઘાનિસ્તાનના માર્ગે ઈરાન પહોંચતી રશિયન લોજિસ્ટિકલ સહાય (Logistical Support) અટકાવવાનો મુદ્દો રજૂ કર્યો હતો.

તાલિબાને સામે મૂકી શરતો

અહેવાલ અનુસાર, તાલિબાને TTP નેતાઓને સોંપવા અંગે હકારાત્મક વલણ દર્શાવ્યું હતું, પરંતુ બદલામાં પાકિસ્તાનમાં તાલિબાન વિરોધી સંગઠનોનાં કાર્યાલયો અને તાલીમ કેન્દ્રો બંધ કરવાની માગણી કરી હતી. સરહદ નિયંત્રણ માટે પશ્ચિમી દેશો તરફથી પાકિસ્તાનને મળતાં નાણાં અને સાધનો તાલિબાનને આપવાની શરત પણ મૂકી હતી. ભારતીય કોન્સ્યુલેટ બંધ કરવાની માગણી અંગે તાલિબાને કહ્યું હોવાનું જણાવાયું છે કે જલાલાબાદમાં પાકિસ્તાનનું કોન્સ્યુલેટ પણ એકસાથે બંધ થવું જોઈએ. જ્યારે રશિયન સહાય ઈરાન પહોંચાડવાના આરોપને તાલિબાને નકારી કાઢ્યો હતો.

એક મહિનાની સમયમર્યાદા

અહેવાલ મુજબ, બેઠકમાં ચર્ચાયેલા મુદ્દાઓના અમલ માટે બંને પક્ષોએ એક મહિનાની સમયમર્યાદા નક્કી કરી હતી. જોકે, આ બેઠકની વિગતોની પાકિસ્તાન કે તાલિબાન તરફથી સત્તાવાર પુષ્ટિ કરવામાં આવી નથી. આ સમગ્ર ઘટનાક્રમ ભારત, પાકિસ્તાન, અફઘાનિસ્તાન અને ઈરાન વચ્ચેના પ્રાદેશિક સંબંધો (Regional Relations) માટે મહત્ત્વનો બની શકે છે. ખાસ કરીને ભારતીય કોન્સ્યુલેટ અંગેની માગણી ભારત-અફઘાનિસ્તાનના રાજદ્વારી સંબંધોના સંદર્ભમાં ધ્યાન ખેંચે છે.