VIDEO: ઈઝરાયલના ગુપ્ત પરમાણુ કેન્દ્ર પર ઈરાની મિસાઈલનો એટેક, ઈઝરાયલની ડિફેન્સ સિસ્ટમ ફેઈલ!
છેલ્લું અપડેટ : 22 Mar 2026
શનિવારે સાંજે ઇઝરાયલ અને ઈરાન વચ્ચે ચાલી રહેલા સંઘર્ષે ભયાનક વળાંક લીધો જ્યારે એક ઈરાની બેલિસ્ટિક મિસાઈલ દક્ષિણ ઇઝરાયલના શહેર ડિમોના પર હુમલો કર્યો. આ શહેર ફક્ત ઇઝરાયલના પરમાણુ રિએક્ટરનું ઘર નથી પણ તેની મોટી ભારતીય વસ્તીને કારણે 'લિટલ ઇન્ડિયા' તરીકે પણ પ્રખ્યાત છે. આ હુમલામાં ઓછામાં ઓછા 47 લોકો ઘાયલ થયા છે.
સ્થાનિક રહેવાસીઓના જણાવ્યા મુજબ, એક મિસાઇલ એક સમુદાયના મકાન પર અથડાઈ હતી, જેના કારણે નજીકના જૂના ઘરોને પણ નુકસાન થયું હતું. મોટાભાગના લોકો સમયસર આશ્રયસ્થાનોમાં પહોંચી શક્યા હતા, જેના કારણે મોટી દુર્ઘટના ટાળી શકાઈ હતી.મેગન ડેવિડ એડોમ (MDA) ના જણાવ્યા મુજબ, કાટમાળ અને છરાથી અથડાવાથી 12 વર્ષના બાળકને ગંભીર ઈજાઓ થઈ હતી. વધુમાં, 31 લોકોને નાની ઈજાઓ થઈ હતી, અને 14 લોકોને ગંભીર આઘાત (ચિંતા)ને કારણે હોસ્પિટલમાં દાખલ કરવામાં આવ્યા હતા.
ઈરાની મિસાઈલ એર ડિફેન્સ સિસ્ટમને ચકમો આપી પરમાણુ કેન્દ્ર પર પડી
મીડિયા રિપોર્ટ મુજબ, ઈરાનની એક ઘાતક મિસાઈલે ઈઝરાયલની અભેદ્ય ગણાતી એર ડિફેન્સ સિસ્ટમ આયરન ડોમને પણ ચકમો આપ્યો છે અને તેના સૌથી ગુપ્ત અને સંવેદનશીલ ‘ડિમોના’ પરમાણુ કેન્દ્ર પર સીધો હુમલો કર્યો છે. આ ધડાકાએ માત્ર તેલ અવીવને જ નહીં, વોશિંગ્ટનમાં પણ ખળભળાટ મચાવી દીધો છે. થોડા કલાકો પહેલા ઈઝરાયલ-અમેરિકાએ મળીને ઈરાનના નતાંજ પરમાણુ કેન્દ્ર પર બોમ્બમારો કર્યો હતો, ત્યારબાદ ઈરાને ખતરનાક મિસાઈલથી જવાબ આપી દીધો છે, જેને અટકાવવામાં આયરન ડોમ પણ ફેલ થઈ ગયું છે.
ઈરાનના નતાંજ સંવર્ધન પ્લાન્ટ પર હુમલો થયો હતો
ઉલ્લેખનીય છે કે, અમેરિકા-ઈઝરાયલે યુદ્ધના 22માં દિવસે ઈરાન પર બોંબમારો કરીને ભયંકર તબાહી મચાવી છે. રિપોર્ટ મુજબ ઈરાનના સૌથી સુરક્ષિત અને અતિસંવેદનશીલ કહેવાતા નતાંજ ન્યૂક્લિયર પ્લાન્ટ પર ભીષણ હુમલો થયો છે, જેના કારણે આખા વિસ્તારમાં ઉથલપાથલ મચી ગઈ છે અને તાત્કાલીક ઈરાની અધિકારીઓ પણ ઘટનાસ્થળે દોડી આવ્યા છે. ઈરાની મીડિયાના અહેવાલો મુજબ, અમેરિકા અને ઈઝરાયલે ઈરાનના નતાંજ સંવર્ધન પ્લાન્ટ પર હુમલો કર્યો છે. હુમલો એટલો ભયાનક હતો કે વિસ્ફોટનો અવાજ દૂર દૂરના વિસ્તાર સુધી સંભળાયો છે. ઘટનાસ્થળે દોડી આવેલા ઈરાની અધિકારીઓએ તાત્કાલીક તપાસ શરૂ કરી દીધી છે, જેમાં કોઈપણ પ્રકારનું રેડિએશન ફેલાયું ન હોવાની પુષ્ટિ થતાં મોટી રાહત થઈ છે. એટલે કે પરમાણુ કચરો ફેલાવાનો જે ડર હતો તે ટળી ગયો છે.
ઈઝરાયલના અરાદ પર પણ હુમલો
નોંધનીય છે કે ઈરાને ડિમોનાની સાથે સાથે ઈઝરાયલના અરાદ શહેર પર પણ હુમલો કર્યો હતો. ઈઝરાયલની સેના ઈરાનની મિસાઈલ રોકવામાં અસમર્થ રહી. ડિમોના જેવા ભારે સુરક્ષિત વિસ્તારમાં ઈરાની મિસાઈલો ઈઝરાયેલની એર ડિફેન્સ સિસ્ટમને ભેદવામાં સફળ રહી હોય તેવું આ પ્રથમ વખત બન્યું છે.અરાદ પર થયેલા હુમલા બાદ ઈઝરાયલના વડાપ્રધાન બેન્જામિન નેતન્યાહૂએ એક નિવેદનમાં કહ્યું, આપણા ભવિષ્ય માટેના યુદ્ધમાં આ એક ખૂબ જ મુશ્કેલ સાંજ રહી છે.
