ચીને વધાર્યું ટ્રમ્પનું ટેન્શન!અમેરિકા સુધી પહોંચતી મિસાઈલના એન્જિનનું સફળ પરીક્ષણ
છેલ્લું અપડેટ : 29 Mar 2026
North Korea solid-fuel engine test: નોર્થ કોરિયાએ પોતાના સૈન્ય અભિયાનને વધુ વેગ આપતા એક અત્યંત શક્તિશાળી 'સોલિડ-ફ્યુઅલ' રોકેટ એન્જિનનું સફળ પરીક્ષણ કર્યું છે. આ એન્જિનનો મુખ્ય હેતુ એવી ઈન્ટરકોન્ટિનેન્ટલ બેલેસ્ટિક મિસાઈલો(ICBM) તૈયાર કરવાનો છે જે સીધું અમેરિકાના મુખ્ય ભૂભાગ સુધી પહોંચવાની ક્ષમતા ધરાવતી હોય. નોર્થ કોરિયાની સરકારી ન્યૂઝ એજન્સી KCNAના અહેવાલ મુજબ, આ નવા અપગ્રેડેડ એન્જિનની તાકાત અગાઉના એન્જિન કરતા નોંધપાત્ર રીતે વધારે છે. આ ટૅક્નોલૉજીની મદદથી મિસાઈલ એકસાથે અનેક વોરહેડ્સ લઈ જઈ શકશે, જે અમેરિકાની મિસાઈલ ડિફેન્સ સિસ્ટમને નિષ્ફળ બનાવવા માટે સક્ષમ હશે.
કિમ જોંગ ઉનના અમેરિકા પર આકરા પ્રહાર
આ પરીક્ષણ દરમિયાન ઉત્તર કોરિયાના સર્વોચ્ચ નેતા કિમ જોંગ ઉન પોતે હાજર રહ્યા હતા. તેમણે આ સફળતાને દેશની વ્યૂહાત્મક સૈન્ય શક્તિ વધારવાની દિશામાં એક મોટું પગલું ગણાવ્યું હતું. સંસદમાં આપેલા પોતાના ભાષણ દરમિયાન કિમે નોર્થ કોરિયાને પરમાણુ શક્તિ તરીકે સ્થાપિત કરવાનો સંકલ્પ દોહરાવ્યો હતો. આ સાથે જ તેમણે ઈરાન સાથેના યુદ્ધના સંદર્ભમાં અમેરિકા પર 'રાજકીય આતંકવાદ અને આક્રમણ' કરવાનો ગંભીર આરોપ પણ લગાવ્યો હતો.
સોલિડ-ફ્યુઅલ ટૅક્નોલૉજીનું મહત્ત્વ
સૈન્ય નિષ્ણાતોના જણાવ્યા અનુસાર, સોલિડ-ફ્યુઅલ મિસાઈલો લિક્વિડ-ફ્યુઅલ મિસાઈલો કરતા વધુ ખતરનાક હોય છે. લિક્વિડ-ફ્યુઅલ મિસાઈલોને લોન્ચ કરતા પહેલા ઇંધણ ભરવામાં ઘણો સમય લાગે છે, જેના કારણે તેને સરળતાથી ટ્રેક કરી શકાય છે. જ્યારે સોલિડ-ફ્યુઅલ મિસાઈલોને ખૂબ જ ઓછા સમયમાં લોન્ચ કરી શકાતી હોવાથી દુશ્મન દેશ માટે તેને હવામાં શોધવી કે અટકાવવી અત્યંત કઠિન બની જાય છે.
અમેરિકા માટે વધતું જોખમ
છેલ્લા પાંચ વર્ષથી ચાલી રહેલા સૈન્ય આધુનિકીકરણ કાર્યક્રમ દ્વારા નોર્થ કોરિયા સતત પોતાની મિસાઈલ શક્તિમાં વધારો કરી રહ્યું છે. આ નવા એન્જિનનું સફળ પરીક્ષણ એ વાતનો પુરાવો છે કે ઉત્તર કોરિયા હવે અમેરિકાના મિડ-વેસ્ટર્ન ડિફેન્સ કવચને ભેદવા માટે એક જ મિસાઈલ પર એકથી વધુ પરમાણુ હથિયારો ગોઠવવાની તૈયારીમાં છે. જોકે, વિદેશી નિષ્ણાતોના મતે મિસાઈલને અંતરિક્ષમાંથી પૃથ્વીના વાતાવરણમાં સુરક્ષિત રીતે પુનઃ પ્રવેશ(Reentry) કરાવવા જેવી જટિલ ટૅક્નિકલ બાબતોમાં નોર્થ કોરિયાએ હજી ઘણી સફળતા મેળવવાની બાકી છે.
