અમેરિકાએ પરમાણુ મિસાઇલનું કર્યું પરીક્ષણ, કેલિફોર્નિયાથી છોડી મિનિટમેન-3 મિસાઇલ
છેલ્લું અપડેટ : 05 Nov 2025
અમેરિકાએ નિઃશસ્ત્ર મિનિટમેન-3 ઇન્ટરકોન્ટિનેન્ટલ બેલિસ્ટિક મિસાઇલનું પરીક્ષણ કર્યું છે. જેની માહિતી અમેરિકી સ્પેસ ફોર્સ કમાન્ડે આપી હતી. આ મિસાઇલ કેલિફોર્નિયાના વેન્ડેનબર્ગ એરફોર્સ બેઝથી લોન્ચ કરવામાં આવી હતી. મિનિટમેન-3 પરમાણુ હથિયાર વહન કરવામાં સક્ષમ છે. અમેરિકી સ્પેસ ફોર્સ કમાન્ડોના જણાવ્યા મુજબ આ પરીક્ષણ GT 254 નો ભાગ હતો. આ મિસાઈલ પરિક્ષણનો હેતુ ICBM સિસ્ટમની વિશ્વસનીયતા, ઓપરેશનલ તૈયારી અને ચોકસાઈનું પરીક્ષણ કરવાનો હતો.
આ મિસાઇલ કેલિફોર્નિયાના વેન્ડેનબર્ગ એરફોર્સ બેઝ પરથી લોન્ચ કરવામાં આવી હતી. મિનિટમેન-3 પરમાણુ શસ્ત્રો વહન કરવામાં સક્ષમ છે અને 14,000 કિમી સુધી પ્રહાર કરી શકે છે. આ પરીક્ષણ 625મી સ્ટ્રેટેજિક ઓપરેશન્સ સ્ક્વોડ્રનની એક ટીમ દ્વારા એરબોર્ન લોન્ચ કંટ્રોલ સિસ્ટમનો ઉપયોગ કરીને શરૂ કરવામાં આવ્યું હતું, જે મિસાઇલ કમાન્ડ અને કંટ્રોલ માટે બેકઅપ તરીકે કામ કરે છે. આ સિસ્ટમનો ઉપયોગ તેની યોગ્ય કામગીરી ચકાસવા માટે કરવામાં આવ્યો હતો.
અમેરિકા પાસે આશરે 3,700 પરમાણુ શસ્ત્રોનો ભંડાર છે, જેમાંથી લગભગ 1,400 શસ્ત્રો વિવિધ મિસાઇલો, વિમાનો અને સબમરિનો પર તૈનાત કરવામાં આવ્યા છે. નિષ્ણાતોના મતે માત્ર 100 થી 400 પરમાણુ બોમ્બ પણ 'પરમાણુ શિયાળો' લાવવા માટે પૂરતા છે. જો આપણે નીચલી મર્યાદા, એટલે કે 100 શસ્ત્રો લઈએ, તો અમેરિકા પાસેના 3,700 શસ્ત્રો વિશ્વને 37 વાર નષ્ટ કરવા માટે પૂરતા છે. અને જો આપણે 250 શસ્ત્રોની સરેરાશ મર્યાદા લઈએ, તો અમેરિકાની ક્ષમતા વિશ્વને 15 થી 20 વાર નષ્ટ કરવા જેટલી બને છે. તેથી એમ કહી શકાય કે વિશ્વને '150 વાર' ખતમ કરવાનો ડોનાલ્ડ ટ્રમ્પનો દાવો સાચો નથી.
અમેરિકા ધરતીને નર્ક બનાવી શકે છે
જો અમેરિકા તેના સંપૂર્ણ પરમાણુ શસ્ત્રાગારનો ઉપયોગ કરે, તો તેના પરિણામો અકલ્પનીય હશે. વિશ્વની 50% થી વધુ વસ્તી તાત્કાલિક વિસ્ફોટ, ગરમી અને કિરણોત્સર્ગથી મૃત્યુ પામશે. બાકીની વસ્તી એક એવી દુનિયામાં જીવિત રહેશે જે પ્રબળ ઠંડી, અંધારાથી છવાયેલી, વિકિરણથી દૂષિત અને ખોરાક વગરની હશે. આવી પરિસ્થિતિમાં, માનવજાતિનું ભવિષ્ય અત્યંત અંધકારમય બની જશે.
વર્તમાન જગતનું સૌથી શક્તિશાળી સક્રિય પરમાણુ શસ્ત્ર: B-83
વર્તમાન સમયમાં વિશ્વનો સૌથી વધુ શક્તિશાળી પરમાણુ બોમ્બ અમેરિકાનો B-83 છે. આ એક પ્રકારનો થર્મોન્યુક્લિયર બોમ્બ છે. તે સક્રિય સ્થિતિમાં હોવાથી કોઈપણ ક્ષણે ઉપયોગમાં લઈ શકાય એમ છે.
B-83ની શક્તિ - 1.2 મેગાટન TNT
1 મેગાટન એટલે 10 લાખ ટન TNT થતું હોવાથી B-83 માં 12 લાખ ટન TNT જેટલી વિનાશક શક્તિ સમાયેલી છે.
1945 માં જાપાનના હિરોશિમા શહેર પર ફેંકવામાં આવેલ 'લિટલ બોય' બોમ્બ કરતાં B-83 લગભગ 80 ગણો વધારે શક્તિશાળી છે.