ટ્રમ્પના 18 મહિનાના કાર્યકાળમાં 9.8 લાખથી વધુ ઈમિગ્રન્ટ્સની હકાલપટ્ટી
અમેરિકાના પ્રમુખ ડોનાલ્ડ ટ્રમ્પના બીજા કાર્યકાળના પ્રથમ 18 મહિનામાં આશરે 9.8 લાખ ઈમિગ્રન્ટ્સને દેશમાંથી બહાર મોકલવામાં આવ્યા હતા. જોકે, આ કાર્યવાહી હેઠળ દેશનિકાલ કરાયેલા અને ઓછામાં ઓછાં બે વર્ષથી અમેરિકામાં રહેતા બિનનાગરિકોમાંથી 71 ટકા લોકો કોઈ ગુનામાં દોષિત ઠર્યા નહોતા. માઇગ્રેશન પોલિસી ઇન્સ્ટિટ્યૂટના અહેવાલમાં આ વિગતો સામે આવી છે. અહેવાલ અનુસાર, 20 જાન્યુઆરી, 2025થી 31 જુલાઈ, 2026 દરમિયાન અમેરિકાની ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) અને કસ્ટમ્સ એન્ડ બોર્ડર પ્રોટેક્શન (CBP) એજન્સીઓ દ્વારા આશરે 9.8 લાખ લોકોને દેશમાંથી બહાર મોકલવામાં આવ્યા હતા. ટ્રમ્પે પોતાના બીજા કાર્યકાળ દરમિયાન 10 લાખ ઈમિગ્રન્ટ્સને દેશનિકાલ કરવાનો લક્ષ્યાંક રાખ્યો હતો.
લાંબા સમયથી રહેતા લોકો સામે પણ કાર્યવાહી
અહેવાલ મુજબ, ઓછામાં ઓછાં બે વર્ષથી અમેરિકામાં રહેતા બિનનાગરિકોની સંખ્યા કુલ હકાલપટ્ટીના આશરે 61 ટકા જેટલી હતી. આવા લોકોની સંખ્યા લગભગ 3.9 લાખ હતી. આ જૂથમાં દેશનિકાલ કરાયેલા લોકોમાંથી 71 ટકા કોઈ ગુનામાં દોષિત ઠર્યા નહોતા. અમેરિકામાં 10 વર્ષ કે તેથી વધુ સમયથી રહેતા અને દેશનિકાલ કરાયેલા લોકોમાં પણ આશરે 61 ટકા લોકોનો કોઈ ગુનાહિત રેકોર્ડ નહોતો. આ આંકડા દર્શાવે છે કે કાર્યવાહી માત્ર તાજેતરમાં સરહદ પાર કરીને આવેલા લોકો પૂરતી મર્યાદિત નહોતી, પરંતુ લાંબા સમયથી અમેરિકામાં રહેતા બિનનાગરિકો પણ તેના દાયરામાં આવ્યા હતા.
લગભગ 20 ટકા લોકો ગુનામાં દોષિત
માઇગ્રેશન પોલિસી ઇન્સ્ટિટ્યૂટના અહેવાલ પ્રમાણે, સમગ્ર કાર્યવાહી દરમિયાન આશરે 1.9 લાખ લોકો, એટલે કે કુલ સંખ્યાના લગભગ 20 ટકા લોકો, કોઈ ગુનામાં દોષિત ઠર્યા હતા. આ આંકડો દેશનિકાલની કાર્યવાહીમાં સામેલ લોકોની ગુનાહિત સ્થિતિ અંગેની માહિતી આપે છે. અહેવાલમાં એ પણ જણાવાયું છે કે કુલ હકાલપટ્ટી અને પરત મોકલવાની કાર્યવાહીમાં આશરે 69 ટકા લોકો એવા હતા, જેમને શરૂઆતમાં અમેરિકાની સરહદે અટકાવવામાં આવ્યા હતા.
અમેરિકાની અંદરથી ધરપકડ કરીને દેશનિકાલનો હિસ્સો વધ્યો
સરહદ પર અટકાવવામાં આવેલા લોકો ઉપરાંત અમેરિકાની અંદરથી ધરપકડ કરીને દેશમાંથી બહાર મોકલવામાં આવતા લોકોનો હિસ્સો પણ વધ્યો હતો. આથી ટ્રમ્પ સરકારની ઇમિગ્રેશન નીતિ હેઠળ સરહદી કાર્યવાહી સાથે દેશમાં રહેતા બિનનાગરિકો સામેની અમલવારી પણ મહત્વપૂર્ણ બની છે. માઇગ્રેશન પોલિસી ઇન્સ્ટિટ્યૂટના આંકડા ટ્રમ્પના બીજા કાર્યકાળના પ્રથમ 18 મહિનામાં થયેલી દેશનિકાલની કાર્યવાહીનું ચિત્ર રજૂ કરે છે. ખાસ કરીને લાંબા સમયથી અમેરિકામાં રહેતા અને કોઈ ગુનામાં દોષિત ન ઠરેલા લોકોનો મોટો હિસ્સો આ આંકડાઓમાં નોંધાયો છે.
