વર્લ્ડ ટેસ્ટ ચેમ્પિયનશિપની ફાઈનલ પહેલા દરેક ટીમની આટલી સિરીઝ બાકી, આ 3 દેશો સામે રમશે ભારત

વર્લ્ડ ટેસ્ટ ચેમ્પિયનશિપ 2023-25ની ફાઈનલ મેચ જૂન 2025માં રમાશે. ફાઈનલમાં પહોંચવા માટે 8 ટીમો સખત પ્રયાસ કરી રહી છે. કારણ કે વેસ્ટ ઈન્ડિઝની ટીમ વર્લ્ડ ટેસ્ટ ચેમ્પિયનશિપની ફાઈનલની રેસમાંથી બહાર થઈ ગઈ છે. આ વખતે ભારત અને ઓસ્ટ્રેલિયા WTCની ફાઈનલમાં પહોંચવા માટે પ્રબળ દાવેદાર છે. ટીમ ઈન્ડિયા આ પહેલા પણ બે વખત ફાઈનલમાં પહોંચી છે. WTCમાં, ટીમોને જીત માટે 12 પોઈન્ટ, ડ્રો માટે 4 પોઈન્ટ મળે છે, જ્યારે હાર માટે કોઈ પોઈન્ટ નથી મળતા. 

ભારતીય ટીમ નંબર વન પર છે

ભારતીય ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં પ્રથમ સ્થાન પર છે. ટીમે 9 મેચ રમી છે, જેમાંથી તેણે 6માં જીત અને 2માં હારનો સામનો કરવો પડ્યો છે. ટીમ પાસે 68.51 Pct છે. ટીમ ઈન્ડિયાએ હજુ પણ વર્તમાન WTC સાઈકલમાં કુલ ત્રણ ટેસ્ટ શ્રેણી રમવાની છે. ભારતીય ટીમ બાંગ્લાદેશ સામે બે, ન્યુઝીલેન્ડ સામે ત્રણ અને ઓસ્ટ્રેલિયા સામે પાંચ ટેસ્ટ મેચની સિરીઝ રમશે. ટીમ ઈન્ડિયા આ પહેલા બે વખત વર્લ્ડ ટેસ્ટ ચેમ્પિયનશિપની ફાઈનલમાં જગ્યા બનાવી ચૂકી છે. પરંતુ બંને વખત ટીમને હારનો સામનો કરવો પડ્યો હતો. પ્રથમ વખત તેને ન્યુઝીલેન્ડ અને બીજી વખત ઓસ્ટ્રેલિયા સામે હાર મળી હતી.

ઓસ્ટ્રેલિયાએ ભારત સામે સિરીઝ રમવાની છે

ઓસ્ટ્રેલિયન ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં બીજા સ્થાને છે. ટીમે અત્યાર સુધી 12 ટેસ્ટ રમી છે, જેમાંથી તેણે 8માં જીત અને ત્રણમાં હારનો સામનો કરવો પડ્યો છે. તેના Pct 62.50 છે. ઓસ્ટ્રેલિયાની ટીમ છેલ્લી વર્લ્ડ ટેસ્ટ ચેમ્પિયનશિપની વિજેતા છે. ઓસ્ટ્રેલિયા હવે માત્ર એક ટેસ્ટ સિરીઝ રમશે, આ સિરીઝ ભારતીય ટીમ સામે રમવાની છે.

ન્યુઝીલેન્ડની ટીમ ત્રણ સિરીઝ રમશે

ન્યુઝીલેન્ડની ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ત્રીજા સ્થાને છે. ટીમ અત્યાર સુધીમાં કુલ 6 મેચ રમી છે જેમાંથી ત્રણમાં તેણે જીત અને ત્રણમાં હારનો સામનો કરવો પડ્યો છે. ટીમના Pct 50.00 છે. ન્યુઝીલેન્ડ હજુ ત્રણ ટેસ્ટ સિરીઝ રમશે, જે તે ભારત, શ્રીલંકા અને ઈંગ્લેન્ડ સામે રમશે.

શ્રીલંકા ક્રિકેટ ટીમ

શ્રીલંકાની ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ચોથા સ્થાને છે. ટીમે આ સાઈકલમાં હજુ ત્રણ વધુ સિરીઝ રમવાની છે. જે તે ઈંગ્લેન્ડ, ન્યુઝીલેન્ડ અને સાઉથ આફ્રિકા સામે રમશે. શ્રીલંકાએ અત્યાર સુધી માત્ર ચાર ટેસ્ટ મેચ રમી છે, જેમાંથી તેણે બેમાં જીત મેળવી છે અને ટીમને 2માં હારનો સામનો કરવો પડ્યો છે. તેના Pct 50.00 છે.

સાઉથ આફ્રિકા ક્રિકેટ ટીમ

સાઉથ આફ્રિકાની ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં પાંચમા સ્થાને છે. ટીમે અત્યાર સુધી 6 ટેસ્ટ મેચ રમી છે, જેમાં 2માં જીત અને 3માં હાર થઈ છે. ટીમના Pct 38.89 છે. સાઉથ આફ્રિકાને હજુ પાકિસ્તાન અને શ્રીલંકા સામે બે ટેસ્ટ સિરીઝ રમવાની છે.

પાકિસ્તાન ક્રિકેટ ટીમ

પાકિસ્તાને વર્લ્ડ ટેસ્ટ ચેમ્પિયનશિપના વર્તમાન સાઈકલમાં અત્યાર સુધીમાં માત્ર બે ટેસ્ટ સિરીઝ રમી છે અને હજુ સુધી ચાર ટેસ્ટ સિરીઝ રમવાની છે. જે તેને બાંગ્લાદેશ, ઈંગ્લેન્ડ, સાઉથ આફ્રિકા અને વેસ્ટ ઈન્ડિઝ સામે રમવાની છે. ટીમે અત્યાર સુધી 5 ટેસ્ટ મેચ રમી છે, જેમાંથી તેણે 2 જીતી છે અને ત્રણમાં હારનો સામનો કરવો પડ્યો છે. તેના Pct 36.66 છે.

ઈંગ્લેન્ડ ક્રિકેટ ટીમ

વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ઈંગ્લેન્ડની ટીમ 7મા નંબર પર છે. શ્રીલંકા સામેની સિરીઝ તેના માટે ઘણી મહત્ત્વની છે. જો તે શ્રીલંકા સામેની સિરીઝ હારી જશે તો તે WTC ફાઈનલની રેસમાંથી બહાર થઈ જશે. ઈંગ્લેન્ડે 13 ટેસ્ટ મેચ રમી છે જેમાંથી તેણે 6માં જીત અને 6માં હારનો સામનો કરવો પડ્યો છે. તેના Pct 36.54 છે. ઈંગ્લેન્ડને ત્રણ ટેસ્ટ સિરીઝ રમવાની છે, જે તેણે શ્રીલંકા, પાકિસ્તાન અને ન્યુઝીલેન્ડ સામે રમવાની છે.

બાંગ્લાદેશ ક્રિકેટ ટીમ આઠમા નંબર પર છે

બાંગ્લાદેશની ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં 8મા નંબર પર છે. ટીમે અત્યાર સુધીમાં કુલ 4 ટેસ્ટ મેચ રમી છે, જેમાંથી તેણે 1 જીતી છે અને ત્રણમાં હારનો સામનો કરવો પડ્યો છે. તેના Pct 25.00 છે. બાંગ્લાદેશને હજુ પાકિસ્તાન, ભારત અને વેસ્ટ ઈન્ડિઝ સામે સિરીઝ રમવાની છે.