IPL 2027 / રાજસ્થાન રોયલ્સ અને લખનૌ સુપર જાયન્ટ્સ વચ્ચે થઈ ટ્રેડ ડીલ, મોહમ્મદ શમી સહિત 3 ખેલાડીઓની ટીમ બદલાઈ

IPL 2027 પહેલા ખેલાડીઓના ટ્રેડ અંગે મોટા સમાચાર સામે આવ્યા છે. IPL રિટેન્શનની જાહેરાત પહેલા રાજસ્થાન રોયલ્સ અને લખનૌ સુપર જાયન્ટ્સ વચ્ચે મોટો ટ્રેડ થયો છે. ભારતીય ફાસ્ટ બોલર મોહમ્મદ શમી હવે રાજસ્થાન રોયલ્સ જર્સીમાં જોવા મળશે, જ્યારે ઈંગ્લેન્ડનો ઓલરાઉન્ડર સેમ કરન લખનૌ સુપર જાયન્ટ્સ માટે રમશે. આ બે ઉપરાંત લેફ્ટ આર્મ સ્પિનર એમ સિદ્ધાર્થની પણ ટીમ બદલાઈ છે.
મોહમ્મદ શમી 8 કરોડમાં રાજસ્થાન રોયલ્સ સાથે જોડાયો
અનુભવી ફાસ્ટ બોલર મોહમ્મદ શમીને લખનૌ સુપર જાયન્ટ્સ દ્વારા રાજસ્થાન રોયલ્સ સાથે ટ્રેડ કરવામાં આવ્યો છે. લખનૌએ શમીને 10 કરોડ રૂપિયામાં સાઈન કર્યો હતો, પરંતુ હવે તે 8 કરોડ રૂપિયાની ફીમાં રાજસ્થાનની ટીમનો ભાગ બનશે. શમીના આગમનથી રાજસ્થાન રોયલ્સનો બોલિંગ એટેક વધુ મજબૂત બનશે. શમીને IPLમાં રમવાનો ઘણો અનુભવ છે. તેણે અત્યાર સુધી 132 મેચોમાં 145 વિકેટ લીધી છે. આ રાઈટ આર્મ ફાસ્ટ બોલરની સ્વિંગ અને શરૂઆતની ઓવર્સમાં વિકેટ લેવાની ક્ષમતા રાજસ્થાન માટે મહત્ત્વપૂર્ણ સાબિત થઈ શકે છે.
એમ. સિદ્ધાર્થનો પણ રાજસ્થાનની ટીમમાં સમાવેશ
શમીની સાથે લેફ્ટ આર્મ સ્પિનર એમ. સિદ્ધાર્થ પણ લખનૌ સુપર જાયન્ટ્સથી રાજસ્થાન રોયલ્સ ગયો છે. સિદ્ધાર્થને તેની વર્તમાન ફી 75 લાખ રૂપિયામાં ટ્રેડ કરવામાં આવ્યો છે. તે તેની સચોટ બોલિંગ માટે જાણીતો છે. સિદ્ધાર્થ 2024થી લખનૌ સાથે છે. આ સમયગાળા દરમિયાન તેણે 9 મેચ રમી, જેમાં તેણે 9 વિકેટ લીધી.
સેમ કરન હવે લખનૌ સુપર જાયન્ટ્સ તરફથી રમશે
બીજી બાજુ, ઈંગ્લેન્ડનો ઓલરાઉન્ડર સેમ કરન રાજસ્થાન રોયલ્સથી લખનૌ સુપર જાયન્ટ્સમાં જોડાયો છે. લખનૌએ તેને તેની વર્તમાન ફી 2.4 કરોડ રૂપિયામાં ટ્રેડ કર્યો છે. કરને અત્યાર સુધી IPLમાં 59 વિકેટ લીધી છે અને 997 રન બનાવ્યા છે. બેટ અને બોલ બંનેથી યોગદાન આપવામાં સક્ષમ કરનને T20 ક્રિકેટમાં એક શાનદાર ઓલરાઉન્ડર તરીકે ઓળખવામાં આવે છે. તેના આગમનથી લખનૌ ટીમને ઓલરાઉન્ડરના રૂપમાં વધુ એક વિકલ્પ મળશે.









