આજે IPLનો ખિતાબ જીતવા ટકરાશે KKR અને SRH, કોલકાતાને મદદરૂપ થઈ શકે છે આ 3 ફેક્ટર

IPL 2024ના ચેમ્પિયન કોણ? તેનો નિર્ણય આજે એટલે કે 26 મેના સાંજે ચેન્નાઈમાં થશે. કોલકાતા નાઈટ રાઈડર્સ અને સનરાઈઝર્સ હૈદરાબાદ વચ્ચેની ફાઈનલ મેચ ચેપોકમાં રમાશે. KKR એ પ્રથમ ક્વોલિફાયર જીતીને ફાઈનલમાં જગ્યા બનાવી હતી. જ્યારે હૈદરાબાદે બીજી ક્વોલિફાયર જીતીને આ સ્થાન હાંસલ કર્યું હતું. હૈદરાબાદ માટે ફાઈનલ જીતવી સરળ નહીં હોય. જો આપણે આંકડાઓ પર નજર કરીએ તો, કોલકાતા હૈદરાબાદ કરતા આગળ હોવાનું જણાય છે.

જો આપણે હેડ ટુ હેડ રેકોર્ડ પર નજર કરીએ તો કોલકાતાએ 18 મેચ જીતી છે. જ્યારે હૈદરાબાદે 9 મેચ જીતી છે. આ સિઝનમાં હૈદરાબાદ સાથે કોલકાતાની આ ત્રીજી મેચ હશે. KKR એ લીગ મેચમાં શાનદાર જીત નોંધાવી હતી. આ પછી પ્લેઓફમાં પણ જીત મેળવી હતી. હવે બંને ટીમો ફાઈનલમાં સામસામે ટકરાશે. ત્યારે અમે તમને 3 ફેક્ટર જણાવીશું જે KKRને જીતવામાં મદદરૂપ થઈ શકે છે. 

સુનીલ નારાયણનું બેટ ચાલ્યું તો હૈદરાબાદ મુશ્કેલીમાં મુકાશે 

IPL 2024માં સુનીલ નારાયણ કોલકાતા માટે એક્સ ફેક્ટર સાબિત થયો છે. શક્તિશાળી બેટિંગની સાથે તેણે શાનદાર બોલિંગ પણ કરી છે. તે KKRને જીતાડવા માટે મહત્ત્વપૂર્ણ ભાગ ભજવી શકે છે. સુનીલે આ સિઝનમાં 13 મેચમાં 482 રન બનાવ્યા છે. આ દરમિયાન તેણે 1 સદી અને 3 અડધી સદી ફટકારી છે. તેણે 16 વિકેટ પણ લીધી છે.

ક્વોલિફાયર 1 જીતનાર ટીમોએ છેલ્લી છ ફાઈનલ જીતી છે 

IPL 2024ના પ્રથમ ક્વોલિફાયરમાં કોલકાતાએ હૈદરાબાદને 8 વિકેટે હરાવ્યું હતું. એક રસપ્રદ તથ્ય એ છે કે છેલ્લી છ સિઝનમાં પ્રથમ ક્વોલિફાયર જીતનારી ટીમો જ ફાઈનલ મેચ જીતી છે. જો બધું KKRની તરફેણમાં જાય તો તેમના માટે જીત સરળ બની શકે છે.

KKR પાસે મજબૂત બેટિંગ લાઇન અપ સાથે ઘાતક બોલિંગ એટેક છે 

કોલકાતા પાસે સારા બેટ્સમેનની સાથે સારા બોલર પણ છે. વેંકટેશ અય્યર અને સુનીલ નારાયણ ફાઈનલમાં અજાયબી કરી શકે છે. કેપ્ટન શ્રેયસ અય્યરે ઘણી મેચોમાં શાનદાર પ્રદર્શન કર્યું છે. રિંકુ સિંહ ગેમ ચેન્જર સાબિત થઈ શકે છે. આ સિવાય KKR પાસે મિચેલ સ્ટાર્ક જેવો ઘાતક બોલર પણ છે.