સુનીલ ગાવસ્કરની BCCIને સલાહ, વર્લ્ડકપ 2027ની ટીમમાં અત્યારથી રોહિત અને વિરાટનું નામ લખી દો

વર્તમાન ક્રિકેટ કોમેન્ટેટર અને પૂર્વ ભારતીય ક્રિકેટર સુનીલ ગાવસ્કરે BCCIને સ્પષ્ટ શબ્દોમાં કહ્યું કે, અત્યારથી જ વર્લ્ડ કપ 2027 ટીમમાં રોહિત શર્મા અને વિરાટ કોહલીનું નામ લખી દો. ગાવસ્કરે કહ્યું છે કે, જો તેઓ વર્લ્ડ કપ 2027 માટે ઉપલબ્ધ હોય, તો તેમને સીધી ટીમમાં એન્ટ્રી મળવી જોઈએ. ઓસ્ટ્રેલિયામાં, રોહિત શર્માએ અડધી સદી પછી સદી ફટકારી અને પ્લેયર ઓફ ધ મેચ તેમજ પ્લેયર ઓફ ધ સિરીઝ તરીકે પસંદ થયો, જ્યારે વિરાટ કોહલીએ સતત બે મેચમાં શૂન્ય રન પર આઉટ થયા બાદ 74 રનની અણનમ ઇનિંગ રમી હતી. 

'તે સ્પષ્ટ થઈ ગયું કે, તે 2027 વર્લ્ડ કપ માટે ત્યાં રહેવા માંગે છે'

સુનીલ ગાવસ્કરે સિડનીમાં ત્રીજી વનડેમાં ભારતની જીત બાદ મીડિયા સાથે વાત કરતાં કહ્યું કે, 'બંનેએ દબાણથી ભરેલી મેચમાં પોતાની ક્લાસ અને નિર્ણય લેવાની ક્ષમતા બતાવી છે. જે ક્ષણે તેમને આ પ્રવાસ માટે ઉપલબ્ધ કરાવ્યા, તે સ્પષ્ટ થઈ ગયું કે, તેઓ 2027 વર્લ્ડ કપ માટે ત્યાં રહેવા માંગે છે. આગળ ગમે તે થાય, તેઓ રન બનાવે કે ન બનાવે, તેમની પાસે રહેલી ક્ષમતા અને અનુભવ સાથે જો તેઓ ઉપલબ્ધ હોય, તો તેમનું ટીમમાં હોવાની ખાતરી કરો."

'વર્લ્ડકપ 2027ની ટીમમાં અત્યારથી રોહિત અને વિરાટનું નામ લખી દો'

આ ઉપરાંત તેમણે ભારપૂર્વક એમ પણ કહ્યું કે, 'આ પ્રકારના ફોર્મ સાથે તમે તેમનું નામ સીધુ દક્ષિણ આફ્રિકા 2027 વર્લ્ડ કપ ટીમમાં લખી શકો છો.' નોંધનીય છે કે, રોહિત શર્માએ પર્થ મેચમાં 8 રન બનાવ્યા હતા, જ્યારે વિરાટ કોહલી પોતાનું ખાતું ખોલવામાં નિષ્ફળ ગયો હતો. એ પછી એવું કહેવામાં આવ્યું હતું કે, રોહિત અને વિરાટનું કરિયર સમાપ્ત થઈ ગયું છે, પરંતુ રોહિત શર્માએ એડિલેડમાં બતાવ્યું કે, તે કેટલો સક્ષમ છે, અને પછી સિડનીમાં રોહિત અને વિરાટની અતૂટ ભાગીદારી જોવા મળી, જેથી ભારતને એકતરફી રીતે મેચ જીતવામાં મદદ મળી. રોહિત અને વિરાટે નવા કેપ્ટન શુભમન ગિલને મેદાન પર ઇનપુટ્સ પણ આપ્યા હતા. તેથી હવે ઘણા નિષ્ણાતોનું માનવું છે કે, આ બંને દિગ્ગજ ખેલાડીઓએ 2027નો વનડે વર્લ્ડ કપ રમવો જોઈએ.