Ratan Tata: સેહવાગથી લઈને નીરજ ચોપરા સુધી, આ ખેલાડીઓએ રતન ટાટાના નિધન પર વ્યક્ત કર્યો શોક
ભારતના દિગ્ગજ ઉદ્યોગપતિ રતન ટાટાના નિધનના સમાચાર આવતાં બુધવારે દેશમાં શોકનું મોજું ફરી વળ્યું હતું. તેમના નિધનથ
ભારતના દિગ્ગજ ઉદ્યોગપતિ રતન ટાટાના નિધનના સમાચાર આવતાં બુધવારે દેશમાં શોકનું મોજું ફરી વળ્યું હતું. તેમના નિધનથી ખેલ જગતમાં પણ શોકનો માહોલ છવાયો હતો. વિરેન્દ્ર સેહવાગથી લઈને નીરજ ચોપરા સુધી, અનેક દિગ્ગજ ખેલાડીઓએ રતન ટાટાને શ્રદ્ધાંજલિ આપી હતી.
તમને જણાવી દઈએ કે રતન ટાટાએ મુંબઈની બ્રીચ કેન્ડી હોસ્પિટલમાં 86 વર્ષની વયે અંતિમ શ્વાસ લીધા હતા. છેલ્લા ઘણા દિવસોથી તેમની તબિયત નાદુરસ્ત હોવાના અહેવાલો આવી રહ્યા હતા. ટાટા સન્સના ભૂતપૂર્વ ચેરમેન રતન ટાટાના નિધન પર ઘણા ખેલાડીઓએ શોક વ્યક્ત કર્યો હતો.
ભૂતપૂર્વ ભારતીય બેટ્સમેન વિરેન્દ્ર સેહવાગે X પર લખ્યું, "આપણે ભારતના સાચા રત્ન, રતન ટાટા જીને ગુમાવ્યા છે. તેમનું જીવન આપણા માટે પ્રેરણા બની રહેશે અને તેઓ આપણા હૃદયમાં જીવંત રહેશે. ઓમ શાંતિ."
આ સિવાય ભારતના સ્ટાર જેવલિન થ્રોઅર નીરજ ચોપરાએ X પર લખ્યું, "શ્રી રતન ટાટા જીના નિધન વિશે સાંભળીને ખૂબ જ દુઃખ થયું. તેઓ એક સ્વપ્નદ્રષ્ટા વ્યક્તિ હતા અને હું તેમની સાથે થયેલી વાતચીતને ક્યારેય ભૂલીશ નહીં. તેમણે આખા દેશને પ્રેરણા આપી છે. હું પ્રાર્થના કરું છું કે તેમના પ્રિયજનોને શક્તિ મળે. ઓમ શાંતિ."
ટીમ ઈન્ડિયાના ભૂતપૂર્વ ઓલરાઉન્ડર ઈરફાન પઠાણે લખ્યું, "શ્રી રતન ટાટા જીના નિધનથી ખૂબ જ દુઃખી છું. તેઓ માત્ર એક બિઝનેસ લીડર જ નહોતા પરંતુ લાખો લોકો માટે સાચા પ્રેરણારૂપ હતા. તેમનું સમર્પણ, પ્રામાણિકતા અને ભારતના વિકાસ પરની અસર અજોડ છે. આપણે એક દિગ્ગજને ગુમાવ્યા છે, પરંતુ તેમનો વારસો હંમેશા માટે જીવંત રહેશે. તેમની આત્માને શાંતિ મળે."
આ સિવાય ભૂતપૂર્વ ભારતીય બેટ્સમેન શિખર ધવન, ભૂતપૂર્વ સ્પિનર હરભજન સિંહ, ભૂતપૂર્વ સ્પિનર પ્રજ્ઞાન ઓઝા, ભૂતપૂર્વ વિકેટ-કીપર બેટ્સમેન દિનેશ કાર્તિક, ભૂતપૂર્વ બેટ્સમેન કૃષ્ણમાચારી અને યુસુફ પઠાણ સહિત ઘણા દિગ્ગજોએ શોક વ્યક્ત કર્યો હતો.
