IND vs ENG / માન્ચેસ્ટર ટેસ્ટમાં ટીમ ઈન્ડિયાને લાગ્યો ઝટકો, આખી સિરીઝમાંથી બહાર થઈ ગયો રિષભ પંત

ઈંગ્લેન્ડ પ્રવાસ દરમિયાન ટીમ ઈન્ડિયાને મોટો ઝટકો લાગ્યો છે. સ્ટાર વિકેટકીપર બેટ્સમેન રિષભ પંતને જમણા પગની આંગળીમાં ફ્રેક્ચર હોવાની પુષ્ટિ થઈ છે. ડોક્ટરે તેને ઓછામાં ઓછા 6 અઠવાડિયા આરામ કરવાની સલાહ આપી છે. માન્ચેસ્ટર ટેસ્ટના પહેલા દિવસે, તે ઈજાગ્રસ્ત અને રિટાયર હર્ટ થયા પછી મેદાનમાંથી પાછો ફર્યો.

ભારતની ઈનિંગની 68મી ઓવરમાં, જ્યારે પંત 37 રન પર બેટિંગ કરી રહ્યો હતો, ત્યારે તેણે ઈંગ્લેન્ડના બોલર ક્રિસ વોક્સ સામે રિવર્સ સ્વીપ રમવાનો પ્રયાસ કર્યો, પરંતુ બોલ તેના શૂઝ પર વાગ્યો. બોલ તેના બેટની ઇનસાઇડ એજથી લાગીને પગમાં વાગ્યો.

આ પછી, પંત જમીન પર સૂઈ ગયો અને પીડાથી કણસવા લાગ્યો. તેનો પગ સોજી ગયો હતો અને લોહી પણ વહેતું હતું. તે ચાલી નહતો શકતો, અને ફિઝિયોની મદદથી, તેને મેડિકલ ટીમના વાહનમાં મેદાનની બહાર લઈ જવામાં આવ્યો.

BCCIના સૂત્રોએ જણાવ્યું હતું કે, "સ્કેનમાં ફ્રેક્ચર જોવા મળ્યું છે. તે 6 અઠવાડિયા સુધી નહીં રમી શકે, મેડિકલ ટીમ જોઈ રહી છે કે તે પેઇનકિલર્સ લઈને ફરીથી બેટિંગ કરી શકે છે કે નહીં, પરંતુ હાલમાં તે ચાલી પણ નથી શકતો, તેથી તેના ફરીથી રમવાની શક્યતાઓ ખૂબ ઓછી છે."

આ દરમિયાન, સિલેક્શન કમિટીએ ઈશાન કિશનને છેલ્લી ટેસ્ટ (31 જુલાઈથી 4 ઓગસ્ટ, ઓવલ) માટે ટીમમાં ઉમેરવાનો નિર્ણય લીધો છે કારણ કે પંત હવે તે મેચમાં નહીં રમી શકે. ભારત પહેલાથી જ ઈજાની સમસ્યાઓનો સામનો કરી રહ્યું છે. ઓલરાઉન્ડર નીતિશ કુમાર રેડ્ડી (ઘૂંટણની ઈજા) પહેલાથી જ બહાર છે અને ફાસ્ટ બોલર આકાશ દીપ (સાથળની ઈજા) અને અર્શદીપ સિંહ (અંગૂઠાની ઈજા) પણ ચોથી ટેસ્ટ માટે ઉપલબ્ધ નથી.