IND A vs NZ A / ભારતીય ટીમને લાગ્યો મોટો ઝટકો, ત્રીજી મેચમાંથી બહાર થયો રિષભ પંત
ભારતીય ટીમનો સ્ટાર વિકેટકીપર-બેટ્સમેન રિષભ પંત ટૂંક સમયમાં મેદાનમાં પાછા ફરવા માટે તૈયાર છે. ઈજામાંથી સ્વસ્થ થયા પછી તેણે સ્કિલ ટ્રેનિંગ ફરી શરૂ કરી છે. હાલમાં તે ઈજાને લગતી કોઈ પીડા કે ક્લિનિકલ લક્ષણોનો અનુભવ નથી કરી રહ્યો.
જોકે, સ્પર્ધાત્મક ક્રિકેટમાં તેના પાછા ફરવા માટે કોઈ ચોક્કસ સમયમર્યાદા નક્કી નથી કરવામાં આવી. સાવચેતીના પગલા તરીકે, તેને ન્યુઝીલેન્ડ A સામેની ત્રીજી બિનસત્તાવાર ટેસ્ટ માટે ઈન્ડિયા A ટીમમાંથી બહાર કરવા આવ્યો છે.
7 નવેમ્બરથી મેચ શરૂ થશે
ઈન્ડિયા A અને ન્યુઝીલેન્ડ A વચ્ચેની ત્રીજી ચાર દિવસીય મેચ 7 નવેમ્બરથી શરૂ થશે. ભારત અને ન્યુઝીલેન્ડ વચ્ચેની પહેલી ટેસ્ટ 19 નવેમ્બરથી શરૂ થશે. એ જોવાનું બાકી છે કે ટીમ મેનેજમેન્ટ પંતને સંપૂર્ણ ફિટ થયા પછી તરત જ પ્રથમ ટેસ્ટમાં તક આપશે કે પછી સતત સારું પ્રદર્શન કરી રહેલા વિકેટકીપર ધ્રુવ જુરેલને તક આપવામાં આવશે.
આ બિનસત્તાવાર ટેસ્ટ પંતને ટેસ્ટ મેચ પહેલા પ્રેક્ટિસ કરવાની એકમાત્ર તક હતી. આવી સ્થિતિમાં, ટીમ મેનેજમેન્ટ એવા વિકેટકીપરને તક આપવાનું વિચારી શકે છે જે પહેલાથી જ ત્યાંની પરિસ્થિતિઓમાં અનુકૂલન સાધી ચૂક્યો હોય, કારણ કે જો તે ફિટ હોય તો પણ પંતને ન્યુઝીલેન્ડની પરિસ્થિતિઓમાં અનુકૂલન સાધવા માટે સમયની જરૂર પડશે.
ઈરાની કપમાં ઈજાગ્રસ્ત
જમ્મુમાં તાજેતરમાં રમાયેલી ઈરાની કપ ટાઈટલ મેચ દરમિયાન પંત ઈજાગ્રસ્ત થયો હતો. ત્યારથી તેની ફિટનેસ પર નજર રાખવામાં આવી રહી છે. રાહતની વાત એ છે કે તેની રિકવરી યોગ્ય દિશામાં આગળ વધી રહી છે અને તેણે ફરીથી પ્રેક્ટિસ શરૂ કરી છે.
હવે મેડિકલ અને સપોર્ટ સ્ટાફ સતત તેની સ્થિતિનું નિરીક્ષણ કરી રહ્યા છે. સેન્ટર ઓફ એક્સેલન્સના સૂત્રોના જણાવ્યા અનુસાર, સ્કિલ ટ્રેનિંગ ફરી શરૂ કર્યા પછી પંતે તેની ફિટનેસ અને મેચની તૈયારીનું મૂલ્યાંકન કરવા માટે ત્રણથી ચાર પ્રેક્ટિસ સેશન પૂર્ણ કરવા પડશે.
આ સત્રો દરમિયાન તેની શારીરિક સ્થિતિ, બેટિંગ અને વિકેટકીપિંગ પ્રવૃત્તિઓ પર નજર રાખવામાં આવશે. આ પ્રેક્ટિસ સેશનના પરિણામોના આધારે તેની વાપસી યોજના ઘડવામાં આવશે.
ત્રણથી ચાર સ્કિલ સેશન પૂર્ણ કર્યા પછી જ પંતના રિટર્ન ટુ પ્લે, એટલે કે સ્પર્ધાત્મક ક્રિકેટ માટે વાપસીની સમયમર્યાદા સ્પષ્ટ થશે. ટીમ મેનેજમેન્ટ અને મેડિકલ સ્ટાફ પંતની વાપસીમાં ઉતાવળ નથી કરવા માંગતા. તેની પ્રાથમિકતા સંપૂર્ણ ફિટનેસ પ્રાપ્ત કરવાની છે જેથી તેને પાછા ફર્યા પછી ફરીથી ઈજાની સમસ્યાનો સામનો ન કરવો પડે.
