Asia Cup માટે કરવામાં આવી ઓમાનની ટીમની જાહેરાત, પહેલીવાર લેશે ભાગ; જાણો કોણ બન્યું કેપ્ટન
છેલ્લું અપડેટ : 26 Aug 2025
એશિયા કપ 2025 માટે ઓમાન ક્રિકેટે 26 ઓગસ્ટ, મંગળવારના રોજ પોતાની ટીમની જાહેરાત કરી છે. 17 ખેલાડીઓની ટીમનું નેતૃત્વ ઓપનર જતિંદર સિંહ કરશે. આ પહેલીવાર છે જ્યારે ઓમાનની ટીમ એશિયા કપનો ભાગ બનશે.
ઓમાનની ટીમની જાહેરાત
ઓમાનની ટીમ કોચ દિલીપ મેન્ડિસના નેતૃત્વમાં છે. મેન્ડિસ, જે શ્રીલંકાના ભૂતપૂર્વ બેટ્સમેન છે, તેણે 1980ના દાયકામાં ટેસ્ટ ક્રિકેટ રમી હતી. તેણે કહ્યું કે આ ટુર્નામેન્ટ ઓમાનના ખેલાડીઓ માટે એક મોટી તક છે. મેન્ડિસે એમ પણ કહ્યું કે, "એશિયા કપ એક મોટી ટુર્નામેન્ટ છે. અમારા ખેલાડીઓને ભારત અને પાકિસ્તાન જેવી મોટી ટીમો સામે રમવાનો અનુભવ મળશે. T20 ક્રિકેટ ઝડપી અને અનિશ્ચિત છે, મેચ એક ઓવરમાં બદલાઈ શકે છે. આ દરેક ખેલાડી માટે શીખવા અને પોતાને સાબિત કરવા માટે યોગ્ય પ્લેટફોર્મ છે."
તમને જણાવી દઈએ કે ઓમાન ટીમમાં કુલ 4 નવા ચહેરા, સુફિયાન યુસુફ, ઝિકરિયા ઇસ્લામ, ફૈઝલ શાહ અને નદીમ ખાન તેમના આંતરરાષ્ટ્રીય ડેબ્યુ માટે લાઇનમાં છે.
ઓમાનનો કેપ્ટન કોણ છે?
36 વર્ષીય જતિંદર સિંહને ઓમાનનો કેપ્ટન બનાવવામાં આવ્યો છે, જે મૂળ પંજાબના લુધિયાણાનો રહેવાસી છે. તેણે 2015માં અફઘાનિસ્તાન સામે T20 ડેબ્યુ કર્યું હતું. આ રાઈટી બેટ્સમેન અત્યાર સુધી T20માં 64 મેચોમાં 1399 રન બનાવી ચૂક્યો છે.
ક્યારે અને કોની સામે મેચ રમશે?
- 12 સપ્ટેમ્બર - ઓમાન vs પાકિસ્તાન
- 15 સપ્ટેમ્બર - ઓમાન vs UAE
- 19 સપ્ટેમ્બર - ઓમાન vs ભારત
એશિયા કપ 2025 માટે ઓમાનની ટીમ
જતિંદર સિંહ (કેપ્ટન), વિનાયક શુક્લા, મોહમ્મદ નદીમ, હમ્માદ મિર્ઝા, આમિર કલીમ, સુફિયાન મહમૂદ, આશિષ ઓડેડ્રા, શકીલ અહેમદ, આર્યન બિશ્ત, સમય શ્રીવાસ્તવ, કરણ સોનાવલે, હસનૈન અલી શાહ, મુહમ્મદ ઈમરાન, સુફિયાન યુસુફ, નદીમ ખાન, ઝિકરિયા ઈસ્લામ, ફૈઝલ શાહ.
