સાઉથ આફ્રિકા સામેની મેચ પહેલા ભારતીય ટીમને લાગ્યો ઝટકો, પ્રેક્ટિસ દરમિયાન ઈજાગ્રસ્ત થયો સ્ટાર બોલર
છેલ્લું અપડેટ : 21 Feb 2026
ભારતીય ટીમે અત્યાર સુધી ICC મેન્સ T20 વર્લ્ડ કપ 2026માં સારું પ્રદર્શન કર્યું છે. સૂર્યકુમાર યાદવના નેતૃત્વમાં ભારતીય ટીમે તેની ચારેય ગ્રુપ મેચ જીતી છે અને ગ્રુપમાં ટોપ પર રહીને સુપર 8 માટે ક્વોલિફાય કર્યું છે. ભારતે USA, નામિબિયા, પાકિસ્તાન અને નેધરલેન્ડ્સ સામે મેચ જીતી હતી.
ભારતીય ટીમ હવે સુપર 8 સ્ટેજમાં સાઉથ આફ્રિકા, ઝિમ્બાબ્વે અને વેસ્ટ ઈન્ડિઝનો સામનો કરશે. ભારતનો પહેલો મુકાબલો 22 ફેબ્રુઆરી (રવિવાર) ના રોજ અમદાવાદના નરેન્દ્ર મોદી સ્ટેડિયમમાં સાઉથ આફ્રિકા સામે રમાશે. આ મેચ પહેલા ભારતીય ટીમને મોટો ઝટકો લાગ્યો છે. ફાસ્ટ બોલર મોહમ્મદ સિરાજ નેટ સેશન દરમિયાન ઈજાગ્રસ્ત થયો હતો, જેના કારણે ટીમ મેનેજમેન્ટ માટે ચિંતા વધી ગઈ હતી.
હર્ષિત રાણા ઈજાને કારણે ટુર્નામેન્ટમાંથી બહાર થયા બાદ છેલ્લી ઘડીએ મોહમ્મદ સિરાજનો ટીમમાં સમાવેશ કરવામાં આવ્યો હતો. સિરાજે અત્યાર સુધી વર્તમાન ટુર્નામેન્ટમાં ફક્ત એક જ મેચ રમી છે, પરંતુ સુપર 8 સ્ટેજ દરમિયાન તેની ફિટનેસ ભારતીય ટીમ માટે મહત્ત્વપૂર્ણ છે.
સિરાજને ઈજા કેવી રીતે પહોંચી?
એક અહેવાલ મુજબ રાઈટ આર્મ ફાસ્ટ બોલર મોહમ્મદ સિરાજ નેટમાં હાર્દિક પંડ્યાને બોલિંગ કરી રહ્યો હતો. હાર્દિક પંડ્યાનો એક શક્તિશાળી શોટ સિરાજના ઘૂંટણ પર વાગ્યો, જેના કારણે સિરાજ મેદાનની બહાર ચાલ્યો ગયો હતો. કેટલાક અહેવાલોમાં કહેવામાં આવ્યું છે કે તે પીડામાં જોવા મળ્યો હતો.
મોહમ્મદ સિરાજ લાંબા બ્રેક પછી ભારતની T20 ટીમમાં પાછો ફર્યો હતો, તેણે USA સામેની મેચમાં 29 રન આપીને 3 વિકેટ લીધી હતી. ત્યારબાદ તેને નામિબિયા, પાકિસ્તાન અને નેધરલેન્ડ સામેની મેચો માટે બહાર રાખવામાં આવ્યો હતો. જસપ્રીત બુમરાહ અને અર્શદીપ સિંહ ફરી એકવાર સુપર-8માં ભારતનો પેસ એટેક સંભાળે તેવી અપેક્ષા છે.
જોકે 15 સભ્યોની ટીમમાં મોહમ્મદ સિરાજ એકમાત્ર બેકઅપ ફાસ્ટ બોલર છે, તેની ઈજા ટીમ માટે ચિંતાનું કારણ બની ગઈ છે. હવે બધાની નજર મેડિકલ અપડેટ પર છે કે સિરાજ સાઉથ આફ્રિકા સામેની મહત્ત્વપૂર્ણ મેચ માટે ફિટ થશે કે નહીં.
T20 વર્લ્ડ કપ માટે ભારતની સ્કવોડ
સૂર્યકુમાર યાદવ (કેપ્ટન), અક્ષર પટેલ (વાઈસ-કેપ્ટન), સંજુ સેમસન (વિકેટકીપર), અભિષેક શર્મા, તિલક વર્મા, હાર્દિક પંડ્યા, ઈશાન કિશન (વિકેટકીપર), શિવમ દુબે, વરુણ ચક્રવર્તી, કુલદીપ યાદવ, વોશિંગ્ટન સુંદર, અર્શદીપ સિંહ, જસપ્રીત સિંહ, મોહમ્મદ સિરાજ.
