FIFA 2026 / કેપ વર્ડેને હરાવ્યા બાદ પણ ખુશ નહતો લિયોનેલ મેસ્સી, મેચ બાદ ગણાવી ટીમની ભૂલો
છેલ્લું અપડેટ : 04 Jul 2026
ફિફા વર્લ્ડ કપ 2026ના રોમાંચક મુકાબલામાં વર્તમાન ચેમ્પિયન અર્જેન્ટિનાએ કેપ વર્ડેને એક્સ્ટ્રા ટાઈમમાં 3-2થી હરાવીને રાઉન્ડ ઓફ 16માં પ્રવેશ કરી લીધો છે. જોકે, આ મુશ્કેલ જીત છતાં અર્જેન્ટિનાનો કેપ્ટન લિયોનેલ મેસ્સી પોતાની ટીમના પ્રદર્શનથી સંતુષ્ટ નથી. મેચ પૂરી થયા બાદ મેસ્સીએ સ્વીકાર્યું કે તેની ટીમે મેદાન પર અનેક ગંભીર ભૂલો કરી હતી, જેના કારણે એક સમયે મેચ હાથમાંથી સરકી રહી હોય તેવું લાગતું હતું.
વિશ્વની 64મા ક્રમની ટીમે ચેમ્પિયનને પરસેવો પાડ્યો
મિયામી ગાર્ડન્સ ખાતે રમાયેલી આ નોકઆઉટ મેચમાં વિશ્વની બીજા ક્રમાંકની ટીમ અર્જેન્ટિના સામે સૌથી નાના દેશ તરીકે ઉતરેલી કેપ વર્ડેએ અપેક્ષા કરતાં ઘણો મજબૂત પ્રતિકાર કર્યો. નિર્ધારિત 90 મિનિટ સુધી બંને ટીમો 1-1ની બરાબરી પર હતી. કેપ વર્ડેની મજબૂત ડિફેન્સ લાઈને લિયોનેલ મેસ્સી, લાઉતારો માર્ટિનેઝ અને જુલિયન આલ્વારેઝ જેવા સ્ટાર ફોરવર્ડ્સને જકડી રાખ્યા હતા. આ ઉપરાંત, વિપક્ષના 40 વર્ષીય અનુભવી ગોલકીપર વોઝિન્હા અર્જેન્ટિનાના આક્રમણ સામે અભેદ દીવાલ બનીને ઊભી રહ્યો હતો. આખરે એક્સ્ટ્રા ટાઈમમાં મેચનું પરિણામ આવ્યું અને અર્જેન્ટિના 3-2થી વિજેતા બન્યું.
મેસ્સીએ પહેલાથી જ ભાંપી લીધો હતો ખતરો
મેચ બાદ કેપ્ટન મેસ્સીએ જણાવ્યું કે, “અમને પહેલેથી જ અંદાજ હતો કે આ મુકાબલો સહેલો નહીં હોય. આ કોઈ સંયોગ નથી કે આ ટીમે સ્પેન અને ઉરુગ્વે જેવી દિગ્ગજ ટીમો સામે પણ શાનદાર લડત આપી હતી.”
પહેલો ગોલ કર્યા પછી જ રમત બગડી: મેસ્સી
મેચનો પ્રથમ ગોલ લિયોનેલ મેસ્સીએ જ લિસાન્ડ્રો માર્ટિનેઝના સચોટ લોંગ પાસને શાનદાર ફર્સ્ટ ટચથી કંટ્રોલ કરીને કર્યો હતો. મેસ્સીએ સ્વીકાર્યું કે, “સૌથી અઘરું કામ પહેલો ગોલ કરવાનું હતું. અમને લાગ્યું કે ગોલ થયા બાદ અમે વધુ શાંતિથી અમારી નેચરલ ગેમ રમી શકીશું, પરંતુ તેનાથી તદ્દન ઉલટું થયું.”
ક્યાં થઈ અર્જેન્ટિનાથી સૌથી મોટી ચૂક?
મેસ્સીએ આત્મમંથન કરતા ટીમની નબળાઈઓ જાતે જ ગણાવી હતી:
નબળું પાસિંગ અને કંટ્રોલ: પહેલો ગોલ કર્યા બાદ ટીમે બોલ પરથી પોતાનો અંકુશ ગુમાવી દીધો. ખેલાડીઓએ સરળ પાસ મિસ કર્યા અને જરૂર કરતાં વધુ વખત બોલ ગુમાવ્યો.
પ્રેસિંગનો અભાવ: કોચ લિયોનેલ સ્કાલોનીની ટીમ જે આક્રમક પ્રેસિંગ માટે જાણીતી છે, તે મેદાન પર જોવા ન મળી અને ટીમ પોતાના જ હાફમાં સીમિત થઈ ગઈ.
ડિફેન્સની ખામી: કેપ વર્ડેએ અર્જેન્ટિનાની જમણી બાજુને ટાર્ગેટ કરી. રાઈટ બેક નહુએલ મોલિના માટે આ દિવસ સારો રહ્યો નહતો, જેનો ફાયદો ઉઠાવીને સિડની લોપેઝ કેબ્રાલે શાનદાર કર્લિંગ શોટ વડે બરાબરીનો ગોલ ફટકાર્યો હતો.
કોઈપણ ટીમને હળવાશથી લેવાની ભૂલ ન થઈ શકે
ફૂટબોલના મહાન ખેલાડી મેસ્સીએ સ્પષ્ટ શબ્દોમાં ટીમને ચેતવણી આપી છે કે માત્ર નામ જોઈને કોઈ ટીમને નબળી સમજવી એ આજના સમયમાં સૌથી મોટી ભૂલ છે. આ વર્લ્ડ કપમાં દરેક મેચ ખૂબ જ રસાકસી ભરી રહી છે અને કોઈપણ ટીમ સરળતાથી હાર માનવા તૈયાર નથી.
120 મિનિટ સુધી મિયામીની ભેજવાળી ગરમીમાં સંઘર્ષ કર્યા બાદ પણ મેસ્સીએ ટીમના લડાયક જુસ્સાના વખાણ કર્યા હતા. તેણે ઉમેર્યું કે, “હવે અમારું સંપૂર્ણ ધ્યાન રાઉન્ડ ઓફ 16 પર છે. અમારે ઝડપથી રિકવર થઈને આ મેચની નકારાત્મક બાબતો સુધારવી પડશે અને સકારાત્મક ઉર્જા સાથે આગામી મેચમાં ઉતરવું પડશે.”
