IPL 2027 પહેલા મુંબઈ ઈન્ડિયન્સે લીધો આશ્ચર્યજનક નિર્ણય, હેડ કોચ મહેલા જયવર્ધનેને ટીમમાંથી દૂર કર્યો
IPL 2027 પહેલા ટીમો તેમના કોચિંગ સ્ટાફમાં ફેરફાર કરી રહી છે. તાજેતરમાં દિલ્હી કેપિટલ્સે સૌરવ ગાંગુલીને તેના નવા હેડ કોચ તરીકે નિયુક્ત કર્યો છે, જ્યારે ઝહીર ખાન ચેન્નાઈ સુપર કિંગ્સમાં કોચ તરીકે જોડાયો છે. હવે IPLની સૌથી સફળ ટીમોમાંની એક મુંબઈ ઈન્ડિયન્સે પણ એક આશ્ચર્યજનક નિર્ણય લીધો છે. MIએ અનુભવી કોચ મહેલા જયવર્ધનેને રિલીઝ કર્યો છે. એવું કહેવામાં આવી રહ્યું છે કે મુંબઈ ઈન્ડિયન્સ ટૂંક સમયમાં તેના નવા કોચની જાહેરાત કરી શકે છે.
મુંબઈ ઈન્ડિયન્સે મહેલા જયવર્ધનેને વિદાય આપી
મુંબઈ ઈન્ડિયન્સે તેમના સત્તાવાર ઇન્સ્ટાગ્રામ એકાઉન્ટ પર એક પોસ્ટ દ્વારા મહેલા જયવર્ધનેના ફ્રેન્ચાઈઝી છોડવાની જાહેરાત કરી. જયવર્ધને એક દાયકાથી વધુ સમયથી MI સાથે હતો અને ટીમે તેના નેતૃત્વ હેઠળ શાનદાર પ્રદર્શન કર્યું હતું. ટીમમાંથી જયવર્ધનેની વિદાય પર નીતા અંબાણીએ કહ્યું, "મહેલા જયવર્દનેએ વર્ષોથી મુંબઈ ઈન્ડિયન્સમાં યોગદાન આપ્યું છે. તેમનું નેતૃત્વ, પ્રામાણિકતા અને રમત પ્રત્યેનો પ્રેમ અમારા માટે ઘણો અર્થ ધરાવે છે.
નીતાએ વધુમાં ઉમેર્યું, "સમગ્ર મુંબઈ ઈન્ડિયન્સ પરિવાર વતી, હું વર્ષોથી ટીમ પ્રત્યેના તેમના ઉત્કૃષ્ટ યોગદાન અને પ્રતિબદ્ધતા બદલ મહેલાનો આભાર માનું છું. અમે આ સફર અને અમે સાથે બનાવેલી યાદોને હંમેશા યાદ રાખીશું. મહેલા હંમેશા અમારા પરિવારનો ભાગ રહેશે, અને અમે તેમને ભવિષ્ય માટે શુભકામનાઓ પાઠવીએ છીએ."
મહેલા જયવર્ધનેની સફર કેવી રહી?
મહેલા જયવર્ધનેએ IPL 2017માં મુંબઈ ઈન્ડિયન્સના હેડ કોચ તરીકેનો કાર્યકાળ શરૂ કર્યો હતો. તેણે ફ્રેન્ચાઈઝીમાં રિકી પોન્ટિંગનું સ્થાન લીધું હતું. તેણે 2022માં આ ભૂમિકા છોડી દીધી અને મુંબઈ ઈન્ડિયન્સનો ગ્લોબલ હેડ ઓફ પર્ફોર્મન્સ બન્યો. તે 2025માં હેડ કોચ તરીકે ટીમમાં પાછો ફર્યો, IPL 2026 મુંબઈ ઈન્ડિયન્સ સાથે તેની છેલ્લી સિઝન હતી.
MI ટૂંક સમયમાં નવા કોચની જાહેરાત કરશે
એક અહેવાલ મુજબ મુંબઈ ઈન્ડિયન્સ આગામી અઠવાડિયામાં નવા હેડ કોચની જાહેરાત કરે તેવી અપેક્ષા છે. મુંબઈ ઈન્ડિયન્સ મેનેજમેન્ટ હાલમાં નવા કોચ અંગે ચર્ચામાં છે અને ઘણા નામોની ચર્ચા કરવામાં આવી છે. MIનો હવાલો કોણ સંભાળશે તે સમય જતાં સ્પષ્ટ થશે.
