IND vs NZ / ફરી એકવાર નિષ્ફળ ગયા ભારતીય બેટર્સ, ન્યુઝીલેન્ડે ભારતને 209 રનમાં ઓલઆઉટ કર્યું
રવિવારે ભારત અને ન્યુઝીલેન્ડ વચ્ચે માઉન્ટ માઉગાંનુઈમાં રમાઈ રહેલી સિરીઝની નિર્ણાયક પાંચમી અને છેલ્લી ODI મેચમાં ભારતીય ટીમને ફરી એકવાર બેટિંગમાં નિરાશાનો સામનો કરવો પડ્યો હતો. ન્યુઝીલેન્ડના બોલર્સે શાનદાર બોલિંગ કરીને ભારતને માત્ર 209 રનમાં ઓલઆઉટ કરી દીધું હતું.
ભારતીય ટીમ સિરીઝમાં 2-1થી આગળ છે, પરંતુ ન્યુઝીલેન્ડની ટીમ હવે આ મેચ જીતીને સિરીઝ 2-2થી બરાબર કરવા માટે તૈયાર છે. કિવી બોલર્સે શિસ્તબદ્ધ લાઈન અને લેન્થ સાથે બોલિંગ કરીને ભારતીય બેટર્સને મુશ્કેલીમાં મૂક્યા હતા.
બે દિવસ પહેલા આ જ મેદાન પર રમાયેલી ચોથી ODIમાં ભારતીય ટીમ માત્ર 89 રનમાં ઓલઆઉટ થઈ ગઈ હતી. તેથી શ્રેયસ અય્યરની આગેવાની હેઠળની ટીમ પાસેથી આ મેચમાં વધુ સારા પ્રદર્શનની અપેક્ષા રાખવામાં આવી હતી.
ભારત માટે સારી શરૂઆત કરવી ખૂબ જ જરૂરી હતી, પરંતુ મેથ્યુ ફિશરે વહેલી વિકેટ લઈને ભારતીય ટીમની આશાઓ પર પાણી ફેરવી દીધું હતું. રોહિત શર્માનું આ સિરીઝમાં ખરાબ ફોર્મ ચાલુ રહ્યું હતું. ફિશરના બોલ પર રોહિતે હળવો શોટ રમ્યો હતો, પરંતુ ડીન ફોક્સક્રોફ્ટે શોર્ટ મિડવિકેટ પર તેનો કેચ ઝડપી લીધો હતો.
વિરાટ કોહલી પણ વધારે સમય સુધી ક્રીઝ પર નહતો ટકી શક્યો. ફિશરના વાઈડ બોલ પર તેણે કટ શોટ રમ્યો હતો, પરંતુ વિકેટકીપર ટિમ સાઈફર્ટે ડાઈવ લગાવીને તેનો શાનદાર કેચ ઝડપ્યો હતો.
ત્યારબાદ ઋતુરાજ ગાયકવાડ પણ વધારે સમય સુધી બેટિંગ ન કરી શક્યો. જેકબ ડફીના બોલ પર તેણે ડ્રાઈવ કરવાનો પ્રયાસ કર્યો હતો, પરંતુ બોલ અંદરની તરફ વળ્યો અને બેટની અંદરની કિનારીને અડીને વિકેટકીપરના હાથમાં ગયો હતો. આ રીતે ભારતે 34 રનમાં ત્રણ વિકેટ ગુમાવી દીધી હતી. જોકે, આ દરમિયાન ડફીના બોલ પર અક્ષર પટેલે ઉંચો શોટ રમ્યો હતો, પરંતુ કવર પર ફોક્સક્રોફ્ટ તેનો કેચ નહતો ઝડપી શક્યો.
ત્યારબાદ શ્રેયસ અય્યર અને અક્ષર પટેલે ચોથી વિકેટ માટે 52 રનની પાર્ટનરશિપ કરીને ભારતીય ઈનિંગને સંભાળવાનો પ્રયાસ કર્યો હતો. જોકે, બ્લેર ટિકનરે ફરી એકવાર શોર્ટ બોલ પર શ્રેયસ અય્યરને આઉટ કર્યો હતો. ત્યારબાદ માઈકલ બ્રેસવેલે અક્ષર પટેલની વિકેટ લીધી હતી. અક્ષરે પુલ શોટ રમવાનો પ્રયાસ કર્યો હતો, પરંતુ બોલ સીધો વિલ યંગના હાથમાં ગયો હતો. અક્ષર પટેલે 46 રન બનાવ્યા હતા.
ઈશાન કિશન (46) અને નમન ધીરે પણ ભારતીય ઈનિંગને ફરી જીવંત કરવાનો પ્રયાસ કર્યો હતો. ઈશાને એક જ ઓવરમાં ડફીને બે સિક્સ ફટકારી હતી. બંને બેટર્સે છઠ્ઠી વિકેટ માટે 39 રનની પાર્ટનરશિપ કરી હતી. જોકે, ન્યુઝીલેન્ડના કેપ્ટન મિચેલ સેન્ટનરે આ પાર્ટનરશિપ તોડી હતી. અનુભવી ડાબોડી સ્પિનરે નમન ધીરને આઉટ કરીને ભારતની મુશ્કેલીઓ વધારી દીધી હતી.
ત્યારબાદ ઈશાન કિશને રન બનાવવાની ગતિ વધારવાના પ્રયાસમાં ડફીના બોલ પર પોતાની વિકેટ ગુમાવી હતી.
ભારતીય ટીમ 200 રનનો આંકડો પણ પાર કરી શકશે કે નહીં તે અંગે આશંકા હતી, પરંતુ અંતિમ ઓવર્સમાં અર્શદીપ સિંહ અને મોહમ્મદ સિરાજે આક્રમક બેટિંગ કરીને ટીમને 200 રનથી આગળ પહોંચાડી હતી.
જોકે, આ મેદાનની પિચ બેટિંગ માટે અનુકૂળ હોવા છતાં ભારતીય ટીમનું આ પ્રદર્શન નિરાશાજનક રહ્યું હતું.
