ભારતનું WTC ફાઈનલ રમવાનું નક્કી! ક્વોલિફાય થવા માટે શું કરવું પડશે', અહીં સમજો નંબર ગેમ

વર્લ્ડ ટેસ્ટ ચેમ્પિયનશિપની ફાઇનલ 11 જૂન 2025ના રોજ લોર્ડ્સના ઐતિહાસિક મેદાન પર રમાશે. પરંતુ સવાલ એ છે કે, શું રોહિત શર્માની કેપ્ટન્સીવાળી ટીમ ઈન્ડિયા ફાઈનલ માટે ક્વોલિફાઈ કરી શકશે? શું ભારતીય ટીમ પહેલી વખત વર્લ્ડ ટેસ્ટ ચેમ્પિયનશિપનો ખિતાબ જીતવામાં સફળ થશે? ચેન્નાઈ ટેસ્ટમાં ભારતીય ટીમે બાંગ્લાદેશને હરાવ્યું હતું. આ પછી ટીમ ઈન્ડિયાને વર્લ્ડ ટેસ્ટ ચેમ્પિયનશિપના પોઈન્ટ ટેબલમાં મોટો ફાયદો થયો છે. હાલમાં ભારતીય ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ટોપ પર છે.

ભારતીય ટીમ માટે શું છે સમીકરણ?

વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ભારત 71.67ની જીતની ટકાવારી સાથે નંબર-1 પર યથાવત છે. હવે વર્લ્ડ ટેસ્ટ ચેમ્પિયનશિપના પોઈન્ટ ટેબલમાં બીજા ક્રમે રહેલા ઓસ્ટ્રેલિયા અને ભારત વચ્ચેનું અંતર 9.16 ટકા પોઈન્ટનું થઈ ગયું છે. ઓસ્ટ્રેલિયાના 62.50 ટકા પોઈન્ટ છે. જોકે, હવે ભારત માટે શું સમીકરણ છે? વાસ્તવમાં, ભારતીય ટીમે વર્લ્ડ ટેસ્ટ ચેમ્પિયનશિપ પહેલા 9 ટેસ્ટ રમવાની છે, જેમાંથી તેણે 5 જીતવી પડશે. જો ટીમ ઈન્ડિયા 4 ટેસ્ટ જીતવામાં સફળ રહે છે અને 1 ટેસ્ટ ડ્રો થાય છે તો પણ તે ફાઈનલ માટે ક્વોલિફાય થશે.

હવે આ ટીમો સામે રમશે ભારત

ઉલ્લેખનીય છે કે,  વર્લ્ડ ટેસ્ટ ચેમ્પિયનશિપ પહેલા બાંગ્લાદેશ સામે કાનપુર ટેસ્ટ સિવાય ભારતીય ટીમે ન્યૂઝીલેન્ડ અને ઓસ્ટ્રેલિયા સામે બોર્ડર-ગાવસ્કર ટ્રોફી રમવાની છે. ટીમ ઈન્ડિયા ન્યૂઝીલેન્ડ સામે 3 ટેસ્ટ મેચની સીરિઝ રમશે. આ પછી રોહિત શર્માની કેપ્ટન્સીવાળી ટીમ ઓસ્ટ્રેલિયાના પ્રવાસે જશે. આ પ્રવાસમાં ભારત અને ઓસ્ટ્રેલિયા વચ્ચે 5 ટેસ્ટ મેચોની સીરિઝ રમાશે. બોર્ડર-ગાવસ્કર ટ્રોફી વર્લ્ડ ટેસ્ટ ચેમ્પિયનશિપ ફાઈનલને ધ્યાનમાં રાખીને ખૂબ જ મહત્ત્વપૂર્ણ બની રહી છે, પરંતુ જો આપણે આ સમયે પોઈન્ટ ટેબલ પર નજર કરીએ તો, ભારત ફાઈનલમાં રમશે તે લગભગ નિશ્ચિત છે.