IND vs ENG / પુણે T20માં કન્કશન સબસ્ટિટ્યુટ નિયમ પર હોબાળો, ટીમ ઈન્ડિયા પર ગુસ્સે થયો જોસ બટલર

'કાં તો શિવમ દુબેએ બોલ સાથે 25 માઈલ પ્રતિ કલાકની ઝડપ પકડી છે અથવા હર્ષિત રાણાએ ખરેખર તેની બેટિંગમાં સુધારો કર્યો છે.' પુણે T20માં ટીમ ઈન્ડિયા સામે હાર્યા બાદ ઈંગ્લેન્ડના કેપ્ટન જોસ બટલરે આ વાત કહી હતી. શિવમ દુબેની જગ્યાએ હર્ષિત રાણાને કન્કશન સબસ્ટિટ્યુટ તરીકે રમાડવામાં આવતા તે ગુસ્સે ભરાયો હતો. કોમેન્ટ્રી કરી રહેલા ઈંગ્લેન્ડના અનુભવી ખેલાડીઓએ પણ આ નિયમ પર પ્રશ્નો ઉભા કર્યા.

પુણેમાં ઈંગ્લેન્ડ સામેની ચોથી T20I દરમિયાન શિવમ દુબેની જગ્યાએ હર્ષિત રાણાને ટીમમાં સામેલ કરવાના ભારતના નિર્ણયની ઘણી ટીકા થઈ છે. મેચ પછી, ઈંગ્લેન્ડના કેપ્ટન જોસ બટલરે કહ્યું કે આ લાઈક-ફોર-લાઈક (બોલરની જગ્યાએ બોલર કે બેટ્સમેનની જગ્યાએ બેટ્સમેન) રિપ્લેસમેન્ટની વ્યાખ્યામાં બંધબેસતું નથી. ઓન-એર ટેલિવિઝન કોમેન્ટેટર્સ કેવિન પીટરસન અને નિક નાઈટએ પણ સબસ્ટિટ્યુશન દરમિયાન થયેલા ફેરફાર પર સવાલ ઉઠાવ્યા હતા. 34 બોલમાં 53 રન બનાવતી વખતે હેલ્મેટ પર વાગવાથી દુબે મેદાનમાં ઉતર્યો ન હતો.

ભારતની 15 રનની જીત બાદ બટલરે કહ્યું, "આ લાઈક-ફોર-લાઈક રિપ્લેસમેન્ટ નથી, અમે તેની સાથે સહમત નથી, કાં તો શિવમ દુબેએ બોલ સાથે લગભગ 25 માઈલ પ્રતિ કલાકની ઝડપ પકડી છે અથવા હર્ષિતે ખરેખર તેની બેટિંગમાં સુધારો કર્યો છે. આ રમતનો એક ભાગ છે, પરંતુ અમે આ નિર્ણય સાથે અસંમત છીએ."

બટલરે આગળ કહ્યું, "અમારી સાથે કોઈ સલાહ-સૂચન નહતું કરવામાં આવ્યું. જ્યારે હું બેટિંગ કરવા આવ્યો ત્યારે હું વિચારી રહ્યો હતો કે હર્ષિતને કોની જગ્યાએ મૂકવામાં આવ્યો છે? તેમણે કહ્યું કે તે કન્કશન રિપ્લેસમેન્ટ હતું, જેની સાથે હું સ્પષ્ટપણે અસંમત હતો, તે લાઈક-ફોર-લાઈક રિપ્લેસમેન્ટ નથી. તેમણે કહ્યું કે મેચ રેફરીએ નિર્ણય લીધો છે. તેના કોઈપણ ભાગમાં અમારી કોઈ ભૂમિકા નહોતી, પરંતુ અમે તેના પર સ્પષ્ટતા મેળવવા માટે જવાગલ (શ્રીનાથ) ને કેટલાક પ્રશ્નો પૂછીશું."

દુબેએ 57 રન બનાવ્યા, આ રીતે થયો ઈજાગ્રસ્ત

ભારતે 57 રનમાં 4 વિકેટ ગુમાવ્યા બાદ દુબેએ અડધી સદી ફટકારી અને હાર્દિક પંડ્યા સાથે છઠ્ઠી વિકેટ માટે 87 રનની પાર્ટનરશિપ કરી. જેના કારણે ભારત 9 વિકેટે 181 રન બનાવી શક્યું. ઈનિંગના છેલ્લા બોલ પર, જેમી ઓવરટનના 141.5 કિમી પ્રતિ કલાકની ઝડપે બોલ દુબેના હેલ્મેટ પર વાગ્યો. ભારત પાસે બેન્ચ પર બેટિંગ ઓલરાઉન્ડર રમનદીપ સિંહ હતો, જે દુબે માટે વધુ સારો વિકલ્પ બની શક્યો હોત. રમણદીપ થોડા સમય માટે વરુણ ચક્રવર્તી માટે ફિલ્ડિંગ કરવા માટે મેદાનમાં આવ્યો હતો.

કેવિન પીટરસને પણ પ્રશ્નો ઉઠાવ્યા

ઓન-એર કોમેન્ટ્રી પર પીટરસને કહ્યું - "તે (રાણા) શિવમ દુબે માટે યોગ્ય વિકલ્પ નથી, તમે દુનિયામાં કોઈને પણ પૂછો, અને તેઓ પણ એ જ કહેશે. દુબે ફાસ્ટ બોલર નથી, પણ રાણા છે." નિક નાઈટ એ જ મુદ્દો પુનરાવર્તિત કર્યો.

મોર્કેલે જણાવ્યું કે ટીમ ઈન્ડિયાએ આવું કેમ કર્યું

ટીમ ઈન્ડિયાના આસિસ્ટન્ટ કોચ મોર્ને મોર્કેલે કહ્યું, "શિવમ ઈનિંગ્સ બ્રેક દરમિયાન હળવા માથાના દુખાવાના લક્ષણો સાથે મેદાન છોડીને ગયો હતો. અમે યોગ્ય કન્કશન સબસ્ટિટ્યુટ માટે મેચ રેફરીને નામ મોકલ્યું, અને ત્યાંથી નિર્ણય લેવાનું મેચ રેફરીએ નક્કી કર્યું. જ્યારે નિર્ણય લેવામાં આવ્યો, ત્યારે હર્ષિત ડિનર કરી રહ્યો હતો, તેથી અમારે તેને શક્ય તેટલી ઝડપથી મેદાનમાં જઈને બોલિંગ કરવા માટે તૈયાર કરવાનો હતો. તે મારાથી ઉપરના લોકોના હાથમાં છે, મેચ રેફરી નિર્ણય લે છે. અમે ફક્ત નામ આપી શકીએ છીએ અને તે પછી વસ્તુઓ અમારા હાથમાંથી નીકળી જાય છે."

ડેબ્યુટન્ટ રાણાએ 12મી ઓવર ફેંકી

હર્ષિત રાણા, જે પોતાની પહેલી T20 આંતરરાષ્ટ્રીય મેચ રમી રહ્યો હતો, તેને 12મી ઓવરમાં બોલિંગ એટેકમાં લાવવામાં આવ્યો અને તેણે પોતાના બીજા બોલ પર લિયામ લિવિંગસ્ટોનને આઉટ કર્યો. રાણાએ પોતાનું ચારેય ઓવર ફેકી અને ત્રણ વિકેટ લીધી. તે જ સમયે, રાણાએ ઈંગ્લેન્ડના કેપ્ટન જોસ બટલરને શોર્ટ થર્ડ મેન પર પણ કેચ આઉટ કર્યો, જે ગુસ્સામાં પાછો ફર્યો અને હેડ કોચ બ્રેન્ડન મેક્કુલમ સાથે વાત કરી, કદાચ તે રાણાને કન્કશન સબસ્ટિટ્યુટ તરીકે લેવાથી ખુશ નહતો.

2 ઓવર પછી કન્કશન સબસ્ટિટ્યુટ વિશે ખબર પડી

મેચ પછી, હર્ષિત રાણાએ કહ્યું, "બે ઓવર પછી, મને કહેવામાં આવ્યું (કન્કશન સબસ્ટિટ્યુટ બનવા વિશે). હું મારી જાતને સાબિત કરવા માટે આ ક્ષણ (ડેબ્યુ) ની રાહ જોઈ રહ્યો હતો. જ્યારે મને તક મળી, ત્યારે મેં પરિસ્થિતિ વિશે વિચાર્યું નહીં અને ફક્ત સારું પ્રદર્શન કરવાનું વિચાર્યું, મને ડેથ ઓવરોમાં બોલિંગ કરવાનો અનુભવ છે અને મને તેના પર વિશ્વાસ હતો."

કન્કશન સબસ્ટિટ્યુટનો નિયમ શું છે?

ICCના નિયમો મુજબ, કન્કશન સબસ્ટિટ્યુટમાં જો કોઈ ખેલાડીને માથામાં કે આંખમાં ઈજા થાય છે, તો તેના સ્થાને નવા ખેલાડીનો સમાવેશ કરી શકાય છે. ઉદાહરણ તરીકે, જો કોઈ ઓલરાઉન્ડરને બદલે કન્કશન સબસ્ટિટ્યુટ લેવો પડે, તો ટીમ બાકીની મેચ માટે તેની જગ્યાએ બીજા ઓલરાઉન્ડરને રમાડી શકે છે. જોકે, સબસ્ટિટ્યુશનલાઈક-ફોર-લાઈક હોવું જોઈએ. આ નિયમના કલમ 1.2.7.3.4 માં સ્પષ્ટ કરવામાં આવ્યું છે.