પહેલી ODIમાં શાનદાર પ્રદર્શન બાદ અંશુલ કંબોજે ટીકાકારોને આપ્યો જવાબ, કહ્યું- 'એક મેચથી ખેલાડી...'
અંશુલ કંબોજની ODI ક્રિકેટમાં શરૂઆતની સફર ઉતાર-ચઢાવથી ભરેલી રહી છે. પોતાની ડેબ્યુ મેચમાં મોંઘા રહ્યા બાદ ભારતીય ફાસ્ટ બોલરે શાનદાર વાપસી કરી છે. ઓકલેન્ડમાં ન્યુઝીલેન્ડ સામેની પહેલી ODIમાં કંબોજે પોતાની બોલિંગથી બધાને પ્રભાવિત કર્યા. તેણે 10 ઓવરમાં માત્ર 22 રન આપીને બે વિકેટ લીધી. ભારતની પાંચ વિકેટની જીતમાં તેનું પ્રદર્શન મહત્ત્વપૂર્ણ રહ્યું.
ડેબ્યુ મેચમાં કંબોજ મોંઘો સાબિત થયો હતો
કંબોજે ગયા મહિને મુલ્લાનપુરમાં વેસ્ટ ઈન્ડિઝ સામે ODI ડેબ્યુ કર્યું હતો. તે મેચમાં તે મોંઘો સાબિત થયો હતો, તેણે નવ ઓવરમાં 82 રન આપ્યા હતા અને એક પણ વિકેટ નહતી લીધી. જોકે, તેણે આ પ્રદર્શનને પોતાના પર હાવી ન થવા દીધું . કંબોજ પોતાની ભૂલોમાંથી શીખ્યો અને પોતાના કમબેક માટે તૈયારી કરી અને ન્યુઝીલેન્ડ સામે મેદાન પર પરિણામો સ્પષ્ટ હતા.
શાનદાર વાપસી કરી
મેચ પછીની પ્રેસ કોન્ફરન્સમાં કંબોજે જણાવ્યું હતું કે એક ખરાબ મેચથી ખેલાડીનું સમગ્ર કરિયર નક્કી નથી થતું. તેણે જણાવ્યું કે, હંમેશની જેમ તે તેની તૈયારી અને બોલિંગ પ્રક્રિયામાં આત્મવિશ્વાસ ધરાવે છે. પ્રથમ ODIમાં તેના ખરાબ પ્રદર્શન છતાં તેણે આત્મવિશ્વાસ ન ગુમાવ્યો. તેના બદલે મેચે તેને તેની ખામીઓ ઓળખવા અને તેના પર કામ કરવા પ્રેરણા આપી.
કંબોજે સોશિયલ મીડિયા પર થતી ટીકા અને ટ્રોલિંગ વિશે પણ સ્પષ્ટપણે વાત કરી. તેણે કહ્યું કે તે આ બાબતો પર સમય નથી બગાડતો. તેનું ધ્યાન તેની રમત પર રહે છે. બોલર તરીકે તે સતત સુધારો કરવાનો પ્રયાસ કરે છે. લોકો તેના વિશે શું કહે છે તેની તેના પ્રદર્શન પર કોઈ ખાસ અસર નથી થતી.
ન્યુઝીલેન્ડ સામેની મેચમાં કંબોજે મિચેલ સેન્ટનર અને નાથન સ્મિથને આઉટ કર્યા. ઈડન પાર્કની પરિસ્થિતિઓ વિશે બોલતા તેણે જણાવ્યું કે પિચ સીમ મૂવમેન્ટ આપે છે, જેના કારણે યોગ્ય લાઈન અને લેન્થ સાથે બોલિંગ કરવી મહત્ત્વપૂર્ણ બને છે.
કંબોજના મતે, પિચમાંથી મળતી મદદનો ઉપયોગ ફક્ત ત્યારે જ થઈ શકે છે જો બોલ યોગ્ય વિસ્તારમાં ફેંકવામાં આવે. લેન્થમાં સહેજ પણ ફેરફાર થવાથી બેટ્સમેન સરળતાથી રન બનાવી શકે છે. તેણે બોલના વોબલ સીમનો પણ સારો ઉપયોગ કર્યો, જેનાથી તેને વિકેટ લેવામાં મદદ મળી. ડેબ્યુ મેચ નિરાશા પછી કંબોજનો કમબેક તેના આત્મવિશ્વાસ અને સખત મહેનતને દર્શાવે છે.
