Virat Kohli Birthday / વિરાટ કોહલીના તે 10 રેકોર્ડ, જે તોડવા છે લગભગ અશક્ય

ટીમ ઈન્ડિયાનો દિગ્ગજ બેટ્સમેન વિરાટ કોહલી આજે પોતાનો 38મો જન્મદિવસ ઉજવી રહ્યો છે. કોહલીએ પોતાની કારકિર્દીમાં ઘણા એવા રેકોર્ડ બનાવ્યા છે જે કોઈપણ ખેલાડી માટે તોડવા લગભગ અશક્ય છે. કોહલીએ એકલા હાથે ભારત માટે અનેક મેચો જીતી છે અને 18 વર્ષથી વધુ સમયથી તે આમ કરી રહ્યો છે.

બેટિંગ કરતી વખતે કોહલીએ સચિન તેંડુલકરના એવા રેકોર્ડ પણ તોડી નાખ્યા જે ઘણા લોકો માનતા હતા કે ક્યારેય તોડી નહીં શકાય. ફેન્સે કોહલીને તેની બેટિંગ માટે 'કિંગ' નું બિરુદ આપ્યું. તેના પ્રદર્શનથી તે વિશ્વ ક્રિકેટનો ચેઝ માસ્ટર પણ બન્યો.

કોહલીના 10 રેકોર્ડ જે તોડવા લગભગ અશક્ય છે

ODIમાં સૌથી વધુ સદીઓ

કોહલી હાલમાં ODIમાં સૌથી વધુ સદીઓ ધરાવતો બેટ્સમેન છે. તેણે અત્યાર સુધીમાં 55 સદીઓ ફટકારી છે. તેણે 2023માં આ રેકોર્ડ હાંસલ કરવા માટે સચિન તેંડુલકરને પાછળ છોડી દીધો.

સૌથી ઝડપી 15,000 ODI રન

કોહલીએ સપ્ટેમ્બર 2026માં 15,000 ODI રન પૂરા કર્યા. આ સાથે તે ODI ઈતિહાસમાં સૌથી ઝડપી 15,000 રન બનાવનાર ખેલાડી બન્યો. કોહલી 15,000 રન બનાવનાર સચિન પછી માત્ર બીજો ખેલાડી બન્યો.

ODI વર્લ્ડ કપમાં સૌથી વધુ રન

કોહલીના નામે ODI વર્લ્ડ કપમાં સૌથી વધુ રન બનાવવાનો રેકોર્ડ છે. કોહલીએ 2023માં 765 રન બનાવીને નવો રેકોર્ડ બનાવ્યો. આ સમયગાળા દરમિયાન તેણે છ અડધી સદી અને ત્રણ સદી ફટકારી હતી.

IPL સિઝનમાં સૌથી વધુ રન

કોહલીએ 2016માં IPLમાં ઈતિહાસ રચ્યો હતો. તેણે માત્ર 16 મેચમાં 973 રન બનાવ્યા, જેમાં સાત અડધી સદી અને ચાર સદીનો સમાવેશ થાય છે. આ સાથે તેણે એક જ સિઝનમાં સૌથી વધુ રન બનાવવાનો નવો રેકોર્ડ બનાવ્યો હતો.

ભારતના સૌથી સફળ ટેસ્ટ કેપ્ટન

કોહલીની કેપ્ટન તરીકેની ટેસ્ટ કારકિર્દી શાનદાર રહી. તેણે માત્ર બેટથી જ ધમાલ નહતી મચાવી, પરંતુ ભારતીય ટીમને ટેસ્ટ ક્રિકેટમાં નવી ઊંચાઈઓ પર પણ પહોંચાડી હતી. તે ભારતના સૌથી સફળ કેપ્ટન તરીકે ઉભરી આવ્યો હતો. તેણે 68 મેચમાંથી 40 મેચ જીતી અને જ્યારે 17 હારી.

8,000થી 15,000 સુધીનો સૌથી ઝડપી સ્કોર

કોહલી ODI ક્રિકેટમાં 8,000થી 15,000 સુધી સૌથી ઝડપી રન બનાવનાર ખેલાડીનો રેકોર્ડ ધરાવે છે. આ સીમાચિહ્ન સુધી પહોંચવું કોઈપણ ખેલાડી માટે સરળ નહીં રહે.

કેપ્ટન તરીકે સૌથી વધુ ટેસ્ટ ડબલ સદી

કોહલી ભલે ટેસ્ટ ક્રિકેટમાંથી નિવૃત્તિ લઈ ચૂક્યો હોય, પરંતુ તે ટેસ્ટ ક્રિકેટમાં કેપ્ટન તરીકે સૌથી વધુ ડબલ સદીનો રેકોર્ડ ધરાવે છે. તેણે કેપ્ટન તરીકે પાંચ ડબલ સદી ફટકારી છે.

ODIમાં ચેઝ કરતી વખતે સૌથી વધુ સદી

કોહલીએ ODIમાં ચેઝ કરતી વખતે સૌથી વધુ સદી ફટકારી છે. તેણે અત્યાર સુધી બીજી ઈનિંગમાં બેટિંગ કરતી વખતે 30 સદી ફટકારી છે.

ODIમાં ચેઝ કરતી વખતે સૌથી વધુ રન

બુધવારે કોહલીએ ODI ક્રિકેટમાં ચેઝ કરતી વખતે સૌથી વધુ રન બનાવવાનો રેકોર્ડ પણ તોડ્યો. કોહલીએ હવે ચેઝ કરતી વખતે 8,741 રન બનાવ્યા છે, જે સચિન તેંડુલકરને પાછળ છોડી દે છે, જેના નામે 8,720 રન છે.

સૌથી વધુ પ્લેયર ઓફ ધ સિરીઝ એવોર્ડ્સ

આંતરરાષ્ટ્રીય ક્રિકેટમાં પ્લેયર ઓફ ધ સિરીઝ એવોર્ડ્સનો રેકોર્ડ કોહલીના નામે છે. તેણે પોતાની કારકિર્દીમાં કુલ 22 વખત આ એવોર્ડ જીત્યો છે.