એબી ડી વિલિયર્સે IPL 2026 પહેલા આપ્યો RCBમાં પાછા ફરવાનો સંકેત, કહ્યું - 'હું ચોક્કસપણે ટીમ સાથે...'
છેલ્લું અપડેટ : 26 Aug 2025
સાઉથ આફ્રિકાના ભૂતપૂર્વ અનુભવી બેટ્સમેન એબી ડી વિલિયર્સે IPL 2026 પહેલા રોયલ ચેલેન્જર્સ બેંગલુરુ (RCB) માં પાછા ફરવાનો સંકેત આપ્યો છે. તેણે ભવિષ્યમાં RCBના કોચ અથવા મેન્ટરની ભૂમિકા ભજવવાની ઈચ્છા વ્યક્ત કરી.
ડી વિલિયર્સે તેની IPL કારકિર્દીનો મોટાભાગનો સમય RCBમાં વિતાવ્યો હતો. વિકેટકીપર-બેટ્સમેનએ 2008માં દિલ્હી ડેરડેવિલ્સ (હવે દિલ્હી કેપિટલ્સ) સાથે તેની IPL કારકિર્દીની શરૂઆત કરી હતી. દિલ્હી સાથે ત્રણ સીઝન વિતાવ્યા પછી, તે 2011માં RCBમાં જોડાયો.
ડી વિલિયર્સે શું કહ્યું?
2021માં ક્રિકેટના તમામ ફોર્મેટમાંથી નિવૃત્તિ લેનારા ડી વિલિયર્સે કહ્યું કે લીગને પૂર્ણ-સમય આપવો મુશ્કેલ છે. જોકે, RCB સાથેનો તેનો સંબંધ મજબૂત છે. જો બેંગલુરુ સ્થિત ફ્રેન્ચાઈઝીને લાગે છે કે ટીમમાં જોડાવામાટે એબી ડી વિલિયર્સ માટે કોઈ ભૂમિકા છે, તો તે તેને સ્વીકારવા તૈયાર છે.
ડી વિલિયર્સે કહ્યું, "હું ભવિષ્યમાં IPLમાં એક અલગ ભૂમિકામાં ફરી જોડાઈ શકું છું, પરંતુ પ્રોફેશનલ રીતે પૂર્ણ-સમય જોડાવું મુશ્કેલ છે. મારા મતે, તે દિવસો પૂરા થઈ ગયા છે." તેણે કહ્યું, "તમે ક્યારેય ના નથી કહી શકતા. મારું હૃદય RCB સાથે છે અને હંમેશા રહેશે. જો ફ્રેન્ચાઈઝીને લાગે છે કે કોચ અથવા મેન્ટર તરીકે મારી ભૂમિકા છે, તો જ્યારે મારો સમય યોગ્ય હશે, હું ચોક્કસપણે RCB સાથે જોડાઈશ."
ડી વિલિયર્સની RCBમાં કારકિર્દી
તમને જણાવી દઈએ કે એબી ડી વિલિયર્સે IPLમાં RCB માટે 157 મેચ રમી હતી, જેમાં 4522 રન બનાવ્યા હતા. તેની એવરેજ 41.10 હતી જ્યારે સ્ટ્રાઈક રેટ 158.33 હતી. આ દરમિયાન, તેણે RCB માટે બે સદી અને 37 અડધી સદી ફટકારી હતી.
એબી ડી વિલિયર્સે IPL ઈતિહાસમાં સૌથી મોટી પાર્ટનરશિપનો રેકોર્ડ બનાવ્યો છે. તેણે 2016માં ગુજરાત લાયન્સ (હવે સક્રિય નથી) સામે વિરાટ કોહલી સાથે બીજી વિકેટ માટે 229 રન ઉમેર્યા હતા. ડી વિલિયર્સે તે સિઝનમાં 687 રન બનાવ્યા હતા અને તે સિઝનમાં ત્રીજા ક્રમનો સૌથી વધુ રન બનાવનાર ખેલાડી હતો.
ડી વિલિયર્સની IPLમાં કારકિર્દી
એબી ડી વિલિયર્સે તેની IPL કારકિર્દીમાં કુલ 184 મેચ રમી હતી, જેમાં 151.68ની સ્ટ્રાઈક રેટથી 5162 રન બનાવ્યા હતા. જેમાં ત્રણ સદી અને 40 અડધી સદીનો સમાવેશ થાય છે. 2022માં, ડી વિલિયર્સને ક્રિસ ગેલ સાથે RCB હોલ ઓફ ફેમમાં સામેલ કરવામાં આવ્યો હતો.