દિવાળીના એક દિવસ પહેલાં કેમ થાય છે હનુમાનજીની પૂજા? જાણો ધાર્મિક માન્યતા અને તેનું મહત્ત્વ

દિવાળીનો તહેવાર પ્રકાશ, સુખ અને સમૃદ્ધિનું પ્રતીક માનવામાં આવે છે. દિવાળીના એક દિવસ પહેલાં નરક ચતુર્દશી અથવા નાની દિવાળીની ઉજવણી કરવામાં આવે છે. આ દિવસે હનુમાનજીની પૂજા કરવાની વિશેષ પરંપરા છે. અનેક પરિવારોમાં આ દિવસે હનુમાનજીની મૂર્તિ સ્થાપિત કરીને વિશેષ પૂજા-અર્ચના કરવામાં આવે છે. ધાર્મિક માન્યતા અનુસાર, નાની દિવાળીએ હનુમાનજીની પૂજા કરવાથી નકારાત્મક શક્તિઓથી રક્ષણ મળે છે અને જીવનમાં સુખ-શાંતિ આવે છે.

નાની દિવાળીએ હનુમાનજીની પૂજા શા માટે કરવામાં આવે છે?

ધાર્મિક માન્યતાઓ અનુસાર, અમાસના દિવસે નકારાત્મક શક્તિઓ વધુ સક્રિય હોય છે. આવી સ્થિતિમાં હનુમાનજીની આરાધના કરવાથી નકારાત્મક શક્તિઓનો પ્રભાવ દૂર થાય છે. હનુમાનજીને સંકટમોચન તરીકે ઓળખવામાં આવે છે. તેમની પૂજા કરવાથી ભય, મુશ્કેલીઓ અને નકારાત્મક વિચારોમાંથી મુક્તિ મળે છે તેવી માન્યતા છે. એક અન્ય ધાર્મિક માન્યતા અનુસાર, ભગવાન શ્રીરામે હનુમાનજીની નિઃસ્વાર્થ ભક્તિ અને સેવાથી પ્રસન્ન થઈને તેમને વિશેષ વરદાન આપ્યું હતું. આ વરદાન સાથે પ્રકાશના પર્વ પહેલાં હનુમાનજીની પૂજા કરવાની પરંપરા જોડાયેલી હોવાનું માનવામાં આવે છે.

કેવી રીતે કરવામાં આવે છે હનુમાનજીની પૂજા?

નાની દિવાળીના દિવસે ભક્તો હનુમાનજીની મૂર્તિ અથવા તસવીર સ્થાપિત કરીને પૂજા કરે છે. સૌપ્રથમ તેમને ગુલાબની માળા અર્પણ કરવામાં આવે છે. ત્યારબાદ પાનનું બીડું ધરાવવામાં આવે છે. હનુમાનજીને ખીરનો ભોગ પણ ચઢાવવામાં આવે છે. આ ઉપરાંત હનુમાન ચાલીસાના પાઠ અને મંત્રજાપ કરીને તેમના આશીર્વાદ મેળવવામાં આવે છે.

નરક ચતુર્દશીનું ધાર્મિક મહત્ત્વ

નરક ચતુર્દશી સાથે ભગવાન શ્રીકૃષ્ણની નરકાસુર પરની જીતની કથા જોડાયેલી છે. ધાર્મિક માન્યતા અનુસાર, આ દિવસે ભગવાન શ્રીકૃષ્ણે નરકાસુરનો વધ કરીને લોકોને તેના અત્યાચારથી મુક્તિ અપાવી હતી. તેથી આ દિવસ ખરાબી પર સારાઈના વિજયનું પ્રતીક માનવામાં આવે છે. આ દિવસે વહેલી સવારે સ્નાન, પૂજા અને દીપદાન કરવાની પરંપરા છે.

નોંધ: આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.