ઢીંગલીથી લઈને પઝલ્સ સુધીનાં તમામ રમકડાં GSTના દાયરામાં, સરકારે કરી સ્પષ્ટતા
રમકડાં પર ગુડ્સ એન્ડ સર્વિસ ટેક્સ (GST) લાગુ કરવાની જોગવાઈઓ અંગે વેપારીઓ અને ટેક્સ વિભાગ વચ્ચે ચાલતી મૂંઝવણ દૂર કરવા નવા પરિપત્રથી સ્પષ્ટતા કરવામાં આવી છે. HSN કોડ 9503 હેઠળ આવતાં રમકડાંની તમામ શ્રેણીઓનો તેમાં સમાવેશ કરવામાં આવ્યો છે. આથી ઢીંગલી, પઝલ્સ, સ્કેલ મોડેલ્સ સહિતનાં રમકડાંના વર્ગીકરણ અને ટેક્સ દર અંગે ઊભા થતા વિવાદો ઘટવાની શક્યતા છે. સાથે જ ભૂતકાળના વ્યવહારો અંગે પણ ‘એઝ ઇઝ, વેર ઇઝ’ના સિદ્ધાંતને અનુસરવાનો નિર્ણય લેવાયો છે.
HSN કોડ 9503 હેઠળનાં તમામ રમકડાંનો સમાવેશ
અગાઉના નોટિફિકેશનમાં અમુક રમકડાંનો જ સ્પષ્ટ ઉલ્લેખ હોવાથી તેના અર્થઘટન અંગે મૂંઝવણ રહેતી હતી. કેટલાક અધિકારીઓનું માનવું હતું કે ટ્રાયસિકલ, સ્કૂટર અને પેડલ કાર જેવાં પૈડાંવાળાં રમકડાં પર જ સંબંધિત જોગવાઈ લાગુ પડે છે. બીજી તરફ, ઢીંગલી, પઝલ્સ અને સ્કેલ મોડેલ્સ જેવાં અન્ય રમકડાંના વર્ગીકરણ અંગે અનિશ્ચિતતા રહેતી હતી.
નવા પરિપત્રમાં સ્પષ્ટ કરવામાં આવ્યું છે કે નોટિફિકેશનમાં વપરાયેલા ‘વગેરે’ શબ્દમાં HSN કોડ 9503 હેઠળ આવતી રમકડાંની તમામ શ્રેણીઓનો સમાવેશ થાય છે. આથી રમકડાંના પ્રકારના આધારે ટેક્સની જોગવાઈનું મર્યાદિત અર્થઘટન કરવાની મૂંઝવણ દૂર કરવાનો પ્રયાસ કરવામાં આવ્યો છે.
રમકડાં પર 5 કે 18 ટકા GST અંગે સ્પષ્ટતા
નવા પરિપત્રથી રમકડાંના ઉત્પાદન, આયાત અને સપ્લાય સાથે સંકળાયેલા વેપારીઓ માટે GSTના નિયમોનું પાલન સરળ બનશે. રમકડાંની વિવિધ શ્રેણીઓ પર લાગુ પડતા 5 ટકા કે 18 ટકા GSTના દર અંગે સ્પષ્ટતા થવાથી વર્ગીકરણને લઈને ઊભા થતા વિવાદો ઘટવાની અપેક્ષા છે. આ સ્પષ્ટતાથી રમકડાં બનાવતી ફેક્ટરીઓ, આયાતકારો અને સપ્લાયર્સને ટેક્સ સંબંધિત નિયમો સમજવામાં સરળતા રહેશે. જોકે, રમકડાં પર ચોક્કસ કયો દર લાગુ પડશે તે સંબંધિત વસ્તુના વર્ગીકરણ અને લાગુ પડતી જોગવાઈઓ પર આધારિત રહેશે.
જૂના ટેક્સના હિસાબો ફરી નહીં ખૂલે
પરિપત્રમાં ભૂતકાળના વ્યવહારો માટે ‘એઝ ઇઝ, વેર ઇઝ’ના સિદ્ધાંતને અનુસરવાનો નિર્ણય પણ મહત્ત્વનો છે. આ સિદ્ધાંત મુજબ ભૂતકાળમાં જે સ્થિતિ હતી તેને યથાવત્ રાખવામાં આવશે અને જૂના વ્યવહારોના હિસાબો ફરીથી ખોલવામાં આવશે નહીં. આથી ભૂતકાળમાં ઓછા દરે ટેક્સ ભરનારા વેપારીઓ પાસેથી વધારાના ટેક્સની માગણી કરતી નવી નોટિસો મોકલવામાં નહીં આવે. જૂનાં બિલ કે વ્યવહારોના આધારે વધારાના ટેક્સ અથવા દંડની માગણી પણ કરવામાં નહીં આવે.
બીજી તરફ, ભૂતકાળમાં વધુ ટેક્સ ભરનારા વેપારીઓને વધારાની રકમનું રિફંડ પણ આપવામાં નહીં આવે. આમ, નવા પરિપત્રથી રમકડાંના GST વર્ગીકરણ અંગેની મૂંઝવણ દૂર કરવા અને ભૂતકાળના વ્યવહારોને લઈને વેપારીઓ તથા ટેક્સ વિભાગ વચ્ચેના વિવાદો અટકાવવા પ્રયાસ કરવામાં આવ્યો છે.
