World Earth Day 2024 / કેવી રીતે થઈ ‘વિશ્વ પૃથ્વી દિવસ’ ઉજવવાની શરૂઆત? જાણો આ વર્ષની થીમ

‘વિશ્વ પૃથ્વી દિવસ’ દર વર્ષે 22 એપ્રિલે ઉજવવામાં આવે છે. પૃથ્વી માત્ર માણસોનું જ નહીં પણ લાખો પ્રાણીઓ અને વનસ્પતિઓનું પણ ઘર છે, પરંતુ મનુષ્ય પોતાની જરૂરિયાતો પૂરી કરવા માટે પૃથ્વીને અનેક પ્રકારના નુકસાન પહોંચાડી રહ્યો છે. જેના કારણે પૂર, પ્રદૂષણ, જળવાયુ પરિવર્તન, ગ્લોબલ વોર્મિંગ જેવી અનેક સમસ્યાઓ જોવા મળી રહી છે. અત્યારે પણ જો આ સમસ્યાઓ પર ધ્યાન આપવામાં ન આવે તો ભવિષ્યમાં તે ઘણા જોખમોનું કારણ બની શકે છે. ‘વિશ્વ પૃથ્વી દિવસ’ દર વર્ષે 22 એપ્રિલે લોકોને પૃથ્વી અને પ્રકૃતિના મહત્ત્વ વિશે જાગૃત કરવાના ઉદ્દેશ્ય સાથે ઉજવવામાં આવે છે.

વિશ્વ પૃથ્વી દિવસની શરૂઆત કેવી રીતે થઈ?

વિશ્વ પૃથ્વી દિવસની ઉજવણીનો વિચાર સૌપ્રથમ શાંતિ કાર્યકર્તા જ્હોન મેકકોનેલે 1969માં યુનેસ્કોની કોન્ફરન્સમાં રજૂ કર્યો હતો. શરૂઆતમાં, આ દિવસની ઉજવણીનો હેતુ પૃથ્વીનું સન્માન કરવાનો હતો. યુનાઇટેડ સ્ટેટ્સમાં 22 એપ્રિલ, 1970ના રોજ પ્રથમ વખત પૃથ્વી દિવસની ઉજવણી કરવામાં આવી હતી. 1990માં, ડેનિસ હેયસે આ દિવસને વૈશ્વિક સ્તરે ઉજવવાનો પ્રસ્તાવ મૂક્યો હતો જેમાં 141 દેશોએ ભાગ લીધો હતો. વર્ષ 2016માં, પૃથ્વી દિવસ આબોહવા સંરક્ષણને સમર્પિત કરવામાં આવ્યો હતો. હાલમાં, પૃથ્વી દિવસનું નેટવર્ક 190 દેશોમાં 20,000 ભાગીદારો અને સંગઠનોમાં વિસ્તરેલું છે.

વિશ્વ પૃથ્વી દિવસ 2024ની થીમ

દર વર્ષે વિશ્વ પૃથ્વી દિવસ એક થીમ સાથે ઉજવવામાં આવે છે. વર્ષ 2024માં તેની થીમ છે – ‘Planet Versus Plastic’ આ થીમનો હેતુ સિંગલ યુઝ પ્લાસ્ટિકના ઉપયોગને સમાપ્ત કરવાનો અને તેના વિકલ્પોની શોધ પર ભાર આપવાનો છે. વર્ષ 2023ની થીમ “Invest In Our Planet” હતી.

વિશ્વ પૃથ્વી દિવસ ઉજવવાનું કારણ

વિશ્વ પૃથ્વી દિવસ પર, લાખો લોકો પ્રદૂષણ અને તેના જોખમો, વનનાબૂદી જેવા પર્યાવરણીય મુદ્દાઓ પર ચર્ચા કરવા માટે એકઠા થાય છે. આ પ્રસંગે, વિશ્વભરમાં વિવિધ કાર્યક્રમોની મદદથી, લોકોને પર્યાવરણ માટે ઉભા થયેલા જોખમો વિશે જણાવવામાં આવે છે અને તેઓને પૃથ્વીને બચાવવાના પ્રયાસો વિશે જાગૃત કરવામાં આવે છે.