પાલકનું નામ સાંભળીને ભાગે છે બાળકો? આ રીતે બનાવો ટેસ્ટી અને હેલ્ધી પાલક પરોઠા

બાળકોને લીલા શાકભાજી ખવડાવવા એ કોઈ મોટા પડકારથી ઓછું નથી. ખાસ કરીને, પાલકનું નામ સાંભળતા જ ઘણા બાળકો નાક-મોં ફાડે છે. આવી સ્થિતિમાં માતાઓ પણ ચિંતામાં મૂકાઈ જાય છે કે આખરે બાળકોના આહારમાં લીલા શાકભાજી કેવી રીતે સામેલ કરવા. જો તમારા ઘરના બાળકો પણ પાલકનું શાક ખાવાથી દૂર ભાગતા હોય, તો તમારે પરેશાન થવાની જરૂર નથી. તમે તેના માટે પાલકના કુરકુરા અને સ્વાદિષ્ટ પરોઠા બનાવી શકો છો. તેની ખાસિયત એ છે કે પાલકનું અલગથી શાક બનાવીને પીરસવાની જરૂર નહીં પડે, પરંતુ તેને સીધા લોટમાં ભેળવીને તૈયાર કરી શકાય છે. લીલાછમ રંગ અને મસાલાના સ્વાદવાળા આ પરોઠા બાળકોના ટિફિનથી લઈને સવારના નાસ્તા માટે ઉત્તમ વિકલ્પ છે.

પાલક પરોઠા બનાવવા માટે તમારે બહુ વધારે સામગ્રીની જરૂર નહીં પડે. ઘરમાં રહેલી વસ્તુઓમાંથી જ સ્વાદિષ્ટ પરોઠા તૈયાર થઈ જશે. આ માટે બે કપ ઘઉંનો લોટ, આશરે દોઢ કપ તાજી પાલક, અડધી ચમચી અજમો, અડધી ચમચી શેકેલા જીરુંનો પાવડર, અડધી ચમચી ચાટ મસાલો અથવા આમચૂર, એક મોટી ચમચી ચણાનો લોટ (બેસન), એક નાની ચમચી ઘી અથવા તેલ અને સ્વાદ મુજબ નમક લો. જો તમે ઈચ્છો તો તેમાં થોડું છીણેલું આદુ અને ઝીણી સમારેલી લીલી મર્ચ પણ ઉમેરી શકો છો. બાળકો માટે પરોઠા બનાવતી વખતે લીલી મરચીનો ઉપયોગ ઓછો કરો અથવા તેને છોડી પણ શકો છો. પરોઠા શેકવા માટે ઘી કે માખણ તૈયાર રાખો.

ઝીણી સમારી લો અથવા મિક્સરમાં પીસી લો

સૌપ્રથમ પાલકના પાંદડાઓને સારી રીતે ધોઈ લો, જેથી તેના પર રહેલી માટી અને ગંદકી સાફ થઈ જાય. હવે પાલકને ઝીણી સમારી લો અથવા મિક્સરમાં પીસીને તેની પ્યુરી તૈયાર કરી લો. આ પછી એક મોટી થાળીમાં ઘઉંનો લોટ, ચણાનો લોટ, અજમો, શેકેલા જીરુંનો પાવડર, ચાટ મસાલો અને નમક નાખીને મિક્સ કરી લો.

હવે તેમાં ઝીણી સમારેલી પાલક અથવા પાલકની પ્યુરી ઉમેરો. સાથે જ થોડું ઘી કે તેલ પણ મિક્સ કરી લો. બધી સામગ્રીને સારી રીતે મિક્સ કર્યા પછી લોટ બાંધવાનું શરૂ કરો. ધ્યાન રાખો કે પાલકમાં અગાઉથી જ ભેજ હોય છે, તેથી શરૂઆતમાં વધારે પાણી ન રેડવું. જરૂર જણાય તો થોડું-થોડું પાણી ઉમેરીને નરમ લોટ તૈયાર કરો. લોટને થોડીવાર માટે ઢાંકીને રાખી દો, જેથી પરોઠા વણવામાં સરળતા રહે.

મધ્યમ આંચ પર પરોઠા શેકો

હવે લોટના નાના-નાના લૂઆ બનાવી લો. સૂકો લોટ લગાવીને તેને ગોળ વણી લો. આ પછી ગરમ તવા પર પરોઠો મૂકો અને એક બાજુથી હળવો શેકાવા દો. પછી તેને ફેરવીને બીજી બાજુથી પણ શેકો. હવે બંને બાજુ થોડું ઘી અથવા માખણ લગાવો અને મધ્યમ આંચ પર પરોઠાને સારી રીતે શેકી લો.

પરોઠાને તવેથાથી હળવા દબાવતા રહો, જેથી તે અંદર સુધી પચી જાય અને બહારથી કુરકુરો બને. જ્યારે પરોઠા પર સોનેરી ડાઘ દેખાવા લાગે ત્યારે તેને તવા પરથી ઉતારી લો. આ જ રીતે બાકીના પરોઠા પણ તૈયાર કરી લો.

પરોઠાને ઠંડા કરીને ટિફિનમાં કરો પૅક

હવે ગરમા ગરમ પાલક પરોઠાને દહીં, સફેદ માખણ અથવા બાળકોના મનપસંદ ટ્રોમેટો કેચપ સાથે પીરસી શકો છો. જો ઈચ્છો તો તેની સાથે હળવું બટાકાનું શાક અથવા ઘરની બનાવેલી ચટણી પણ રાખી શકો છો. બાળકોને ટિફિનમાં આપવા માટે પરોઠાને થોડા ઠંડા કરીને પૅક કરો, જેથી વરાળથી તે વધારે ભીના ન થઈ જાય.

પાલકમાં આયર્ન, ફોલેટ, વિટામિન્સ અને અન્ય પોષક તત્વો મળી આવે છે, જે સંતુલિત આહારનો મહત્વનો ભાગ છે. તેમાં રહેલા પોષક તત્વો શરીરના સામાન્ય કામકાજમાં મદદ કરે છે. પાલકને પરોઠામાં ભેળવવાથી બાળકોના આહારમાં લીલા શાકભાજી સામેલ કરવાનો એક સરળ રસ્તો મળી જાય છે. જો તમારા બાળકો પાલકનું શાક જોઈને મોં બગાડતા હોય તો આ રીત એકવાર જરૂર અજમાવી જુઓ. પાલકને લોટમાં ભેળવીને બનાવેલા સ્વાદિષ્ટ પરોઠા તેમના રોજિંદા ભોજનમાં નવો સ્વાદ ઉમેરશે.