ભારતીય સંસ્કૃતિથી રૂબરૂ કરાવે છે શિયાળામાં યોજાતા આ 5 ફેસ્ટિવલ, તમે પણ માણી શકો છો તેનો આનંદ

આપણો દેશ ભારત સાંસ્કૃતિક અને કુદરતી વિવિધતાથી ભરેલો છે. તેથી અહીં તહેવારો અને પરંપરાઓનો અનોખો સંગમ જોવા મળે છે. ભારતની વૈવિધ્યસભર સંસ્કૃતિ અને ભૌગોલિક સ્થાન વિદેશીઓને પણ આકર્ષે છે. આપણા દેશમાં ધાર્મિક આધાર પર ઘણા તહેવારો ઉજવવામાં આવે છે. આ સિવાય કેટલાક રાજ્યોમાં શિયાળામાં ખાસ પ્રકારના ફેસ્ટિવલનું આયોજન કરવામાં આવે છે. જેમાં ભાગ લેવો કોઈપણ માટે યાદગાર બની રહેશે.

આ પણ વાંચો: હિમવર્ષા જોવાનું મન છે તો બનાવો પ્લાન, આ જગ્યાઓ પર ખૂબ પડે છે બરફ

આ સાથે દેશની વિવિધ સંસ્કૃતિઓને જાણવાની પણ આ એક સારી તક છે. તમે પણ આ ફેસ્ટિવલનો એક ભાગ બની શકો છો. આ સાથે, તમે તે સ્થળોને એક્સપ્લોર પણ કરી શકો છો, તો ચાલો જાણીએ કે એવી કઈ જગ્યાઓ છે જ્યાં શિયાળામાં ફેસ્ટિવલનું આયોજન કરવામાં આવે છે.

રણોત્સવ, ગુજરાત

જો તમે કચ્છની મુલાકાત ન લીધી હોય તો તમારે એકવાર ત્યાં જવું જ જોઈએ. ગુજરાત રાજ્ય ગાંધીજીના જન્મસ્થળથી લઈને કલા, મેળા, હસ્તકલા, વેપાર, વિવિધ વાનગી, તહેવારો, કપડા સહિત અનેક વસ્તુઓ માટે પ્રખ્યાત છે અને જે કોઈ પણ ગુજરાતમાં જાય છે તેણે એકવાર કચ્છ જોવું જોઈએ. શિયાળામાં અહીં રણોત્સવનું આયોજન કરવામાં આવે છે, જ્યાં ગરબા, દાંડિયા જેવા પરંપરાગત લોક નૃત્યોનો આનંદ માણી શકાય છે. આ ઉપરાંત, તમે હસ્તકલાની વસ્તુઓ પણ જોઈ શકો છો અને ગુજરાતની પરંપરાગત વાનગીઓ જેમ કે ઉંધીયુ, ઢોકળા વગેરેનો સ્વાદ માણી શકો છો. આ સિવાય રાત્રે આકાશમાં ચમકતા તારાઓ જોવા એ એક શાંતિપૂર્ણ અનુભવ હશે. રણોત્સવ નવેમ્બરથી ફેબ્રુઆરી સુધી ચાલે છે.

હિમાચલ વિન્ટર કાર્નિવલ, શિમલા-મનાલી

હિમાચલ પ્રદેશના મનાલી, શિમલા અને અન્ય હિલ સ્ટેશનો શિયાળામાં સ્વર્ગ બની જાય છે અને આ સમયે અહીં પ્રવાસીઓની ભીડ હોય છે. તમે અહીં વિન્ટર કાર્નિવલમાં ભાગ લઈ શકો છો. જેમાં સ્કીઈંગ કોમ્પિટિશન, પેરગ્લાઈડિંગ, સ્ટ્રીટ ડ્રામા, ટ્રેડિશનલ ફૂડ માણવાનો અને હિમાચલની સંસ્કૃતિ તેમજ વારસો જાણવાનો મોકો પણ મળશે. તમારા માટે મનાલીની મુલાકાત લેવાની આ શ્રેષ્ઠ તક છે. ડિસેમ્બરથી ફેબ્રુઆરી વચ્ચે તમે હિમાચલ વિન્ટર કાર્નિવલમાં ભાગ લઈ શકો છો

હોર્નબિલ ફેસ્ટિવલ, કોહિમા, નાગાલેન્ડ

શિયાળામાં તમે કોહિમા, નાગાલેન્ડમાં હોર્નબિલ ફેસ્ટિવલમાં ભાગ લઈ શકો છો. આ ફેસ્ટિવલમાં તમને નાગાલેન્ડમાં રહેતા આદિવાસીઓના સમૃદ્ધ સાંસ્કૃતિક વારસાને ઉજવવાની તક મળશે. આ તહેવારમાં તમને પરંપરાગત સંગીત, નૃત્ય અને રમતો જોવા મળશે. આ સિવાય અનોખી આદિવાસી વાનગીઓનો સ્વાદ પણ ચાખવા મળશે. તમે લોકનૃત્ય, કુસ્તી, તીરંદાજી વગેરેમાં પણ ભાગ લઈ શકો છો.

ડેઝર્ટ ફેસ્ટિવલ, જેસલમેર

શિયાળામાં રાજસ્થાનનો પ્રવાસ ખૂબ જ સુખદ અનુભવ હશે. શિયાળા દરમિયાન રાજસ્થાનના થાર રણમાં આયોજિત થનારા જેસલમેર ડેઝર્ટ ફેસ્ટિવલમાં ભાગ લેવો એક અદ્ભુત અનુભવ હશે. આ ફેસ્ટિવલમાં તમે ઊંટની રેસ, લોક સંગીત અને લોકનૃત્ય તેમજ પપેટ શો જોઈ શકો છો. અહીંની સૌથી આકર્ષક બાબત રંગબેરંગી વસ્ત્રોમાં સજ્જ ઊંટોને તાલ પર લયબદ્ધ રીતે નૃત્ય કરતા જોવા છે. આ ઉપરાંત, પાઘડી બાંધવા જેવી કેટલીક અનોખી સ્પર્ધાઓ પણ થાય છે, જેમાં કોઈપણ વ્યક્તિ ભાગ લઈ શકે છે. આ સિવાય રાજસ્થાનની વિશિષ્ટ વાનગીઓનો સ્વાદ લેવાનું ભૂલશો નહીં. આ ફેસ્ટિવલનું આયોજન ફેબ્રુઆરીમાં કરવામાં આવે છે.

સોનપુર મેળો, બિહાર

ગુલાબી શિયાળા દરમિયાન એટલે કે નવેમ્બર અને ડિસેમ્બરની વચ્ચે, તમે બિહારના સોનપુરમાં આયોજિત સોનપુર મેળામાં જઈ શકો છો, જે સમગ્ર દેશમાં પ્રખ્યાત છે. સોનપુરનો મેળો એશિયાનો સૌથી મોટો પશુ મેળો કહેવાય છે. વિદેશી પર્યટકો પણ આ મેળાની મુલાકાત લેવા આવે છે. તેનો ઈતિહાસ પણ ઘણો જૂનો છે. ગંડક અને ગંગા નદીઓના સંગમ પર આયોજિત આ મેળાનો ભાગ બનવું તમારા માટે એક અનોખો અનુભવ હશે.