Navratri 2024 / ઉપવાસ દરમિયાન બનાવો સાબુદાણા વડા, આ રહી સરળ Recipe
ઘણા લોકો નવરાત્રી દરમિયાન, નવ દિવસ માટે ઉપવાસ રાખે છે, જેમાં કેટલાક લોકો માત્ર ફળ ખાય છે તો કેટલાક લોકો દિવસમાં એક વખત
ઘણા લોકો નવરાત્રી દરમિયાન, નવ દિવસ માટે ઉપવાસ રાખે છે, જેમાં કેટલાક લોકો માત્ર ફળ ખાય છે તો કેટલાક લોકો દિવસમાં એક વખત જ ભોજન કરે છે. આવી સ્થિતિમાં ઘણા લોકોને કઈંક અલગ ખાવાની ઈચ્છા થાય છે. જોકે, બટાકાની કઢી, સાબુદાણાની ખીચડી જેવી વાનગી તો લગભગ દરેક ઘરમાં બને છે, પરંતુ શું તમે સાબુદાણા વડા ખાધા છે? બધાએ સાબુદાણામાંથી બનાવેલી ખીચડી કે ખીર ખાધા હશે. આ વખતે કંઈક નવું ટ્રાય કરો.
જ્યારે તમે નવરાત્રીના ઉપવાસ દરમિયાન ભોજન કરો છો, ત્યારે તમારે દરરોજ ફરાળી લોટમાંથી બનાવેલી પુરી ખાવાની જરૂર નથી. અહીં અમે તમારા માટે સાબુદાણા વડાની રેસીપી લઈને આવ્યા છીએ, જેને તમે ઘરે સરળતાથી બનાવી શકો છો અને તે ખાવામાં પણ ખૂબ જ સ્વાદિષ્ટ હોય છે.
સામગ્રી
- સાબુદાણા - 1 કપ
- બટાકા (બાફેલા અને છૂંદેલા) - 2
- મગફળી (શેકેલી અને બરછટ પીસેલી) - અડધો કપ
- લીલા મરચા (બારીક સમારેલા) - 2-3
- આદુ (છીણેલું) - 1 ઈંચનો ટુકડો
- જીરું - 1 ચમચી
- કોથમીર (બારીક સમારેલી) - 2 ચમચી
- લીંબુનો રસ - 1 ચમચી
- સિંધાલૂણ મીઠું (ઉપવાસ માટે) – સ્વાદ પ્રમાણે
- તેલ - તળવા માટે
બનાવવાની રીત
- સૌથી પહેલા સાબુદાણાને સારી રીતે ધોઈ લો અને લગભગ 5 કલાક પાણીમાં પલાળી રાખો.
- ધ્યાન રાખો કે પાણી પૂરતું હોય, નહીં તો સાબુદાણા બરાબર પલળશે નહીં.
- જ્યારે સાબુદાણા બરાબર પલળી જાય અને નરમ થઈ જાય ત્યારે વધારાનું પાણી કાઢી લો.
- હવે બાફેલા બટાકાને મેશ કરો. પછી એક મોટા વાસણમાં સાબુદાણા, બટાકા, મગફળી, લીલા મરચા, આદુ, જીરું, કોથમીર અને સિંધાલૂણ મીઠું ઉમેરો.
- હવે તેમાં લીંબુનો રસ ઉમેરો અને બધી સામગ્રીને સારી રીતે મિક્સ કરો.
- હવે આ મિશ્રણમાંથી નાના ગોળા વાળીને તેને વડાનો આકાર આપો.
- એક પેનમાં તેલ ગરમ કરો. જ્યારે તેલ ગરમ થઈ જાય, ત્યારે તેમાં વડા નાખીને મધ્યમ તાપ પર સોનેરી અને ક્રિસ્પી થાય ત્યાં સુધી તળો.
- સાબુદાણા વડા તૈયાર છે. તેને લીલી ચટણી, દહીં અથવા ચા સાથે ગરમા-ગરમ સર્વ કરો.
- જો તમે તેને ઉપવાસ માટે નથી બનાવતા, તો તમે તેમાં સામાન્ય મીઠું અને થોડો લાલ મરચું પાવડર પણ ઉમેરી શકો છો.
