બીજાની કાળજી લેતી વખતે તમે ન બની જતા બર્નઆઉટના શિકાર, આ રીતે રાખો તમારી જાતનું ધ્યાન

ઘરના વડીલો અથવા બીમાર વ્યક્તિની સંભાળ રાખવી એ એક મહત્ત્વપૂર્ણ, સારું અને સન્માનજનક કામ છે, પરંતુ કેટલીકવાર તેની સંભાળ લેનાર વ્યક્તિ બર્નઆઉટ એટલે કે તણાવનો શિકાર પણ બની શકે છે. બર્નઆઉટ ખાસ કરીને એવા લોકોમાં સામાન્ય છે જેઓ પરિવારના સભ્યની સંભાળ રાખે છે. આ બર્નઆઉટને લાંબા સમય સુધી અવગણવાથી સંભાળ રાખનારના શારીરિક અને માનસિક સ્વાસ્થ્ય પર નકારાત્મક અસર પડી શકે છે. તેથી, તણાવના આવા લક્ષણોને ઓળખવા અને તેના ઉપાય કરવા મહત્ત્વપૂર્ણ છે જેથી સંભાળ રાખનારાઓ પોતાને લાંબા ગાળે થાક/તણાવથી મુક્ત રાખી શકે.

કેરગીવર બર્નઆઉટ સાથે સંકળાયેલા લક્ષણો

બર્નઆઉટની સ્થિતિ એક દિવસમાં નથી દેખાતી, પરંતુ તે એક ધીમી પ્રક્રિયા છે જે દેખાવા માટે અઠવાડિયા, મહિનાઓ અથવા વર્ષો પણ લાગી શકે છે. જો કે, તેના પ્રારંભિક સંકેતોને સમજવાથી તેને વહેલા અને વધુ સારી રીતે અટકાવવામાં મદદ મળી શકે છે.

શારીરિક લક્ષણો

સતત થાક, માથાનો દુખાવો, વારંવાર માંદગી અને ઊંઘની પેટર્નમાં ફેરફાર એ બર્નઆઉટના સામાન્ય શારીરિક લક્ષણો છે. સંભાળ રાખનારાઓ વજનમાં વધારો અથવા ઘટાડો, તેમજ હાઈપરટેન્શન અને ડિપ્રેશન જેવી સ્વાસ્થ્ય સમસ્યાઓનો પણ અનુભવ કરી શકે છે.

વર્તનમાં ફેરફાર

સામાજિક પ્રવૃતિઓથી દૂર રહેવું, કોઈનું કામ પૂરું કરવામાં વિલંબ કરવો અને વ્યવસાયિક જવાબદારીઓ સમયસર પૂરી ન કરી શકવી, આ બધા બર્નઆઉટના લક્ષણો હોઈ શકે છે. ઘણી વખત, સંભાળ રાખનારાઓ આ તણાવને દૂર કરવા માટે દવાઓની મદદ લે છે.

ભાવનાત્મક સંકેતો

કેટલાક સંભાળ રાખનારાઓ અસ્વસ્થ, બેચેન અથવા હતાશા અનુભવી શકે છે. તેઓ મૂડ સ્વિંગ અને ચીડિયાપણું પણ અનુભવી શકે છે.

બર્નઆઉટથી કેવી રીતે બચવું?

પોતાની સાંભળ રાખવા માટે સમય કાઢો

બીજાનું ધ્યાન રાખવાની સાથે પોતાના માટે પણ સમય કાઢો. હેલ્ધી ડાયટ, રેગ્યુલર એક્સરસાઇઝ, પૂરતી ઊંઘની સાથે આ બધી બાબતો પર ધ્યાન આપો. એવા કાર્યો કરવા માટે સમય કાઢો જે તમને ખુશ કરે.

સીમાઓ સેટ કરો

બર્નઆઉટ ટાળવા માટે સીમાઓ સેટ કરવી પણ મહત્ત્વપૂર્ણ છે. બીજાની કાળજી રાખવામાં એટલા વ્યસ્ત ન થઈ જાઓ કે તમે તમારી સંભાળ ન રાખી શકો. 'ના' કહેવાનું શીખવું. ક્યારેક અમુક કાર્યો અન્યને સોંપવા જરૂરી છે.

મદદ મેળવવા માટે અચકાશો નહીં

પરિવારના અન્ય સભ્યોનો સહયોગ લેવામાં સંકોચ ન કરો, આ તમારા બોજને ઘણી હદ સુધી ઘટાડી શકે છે. કેટલીકવાર કુટુંબના સભ્યો અથવા મિત્રો પાસેથી મદદ અથવા વ્યાવસાયિક સલાહ માંગવાથી તમારું કાર્ય સરળ બનશે.