Navratri 2024 / માતા દુર્ગાના નામ પરથી રાખવામાં આવ્યા છે આ શહેરોના નામ, નવરાત્રીમાં બનાવો અહીં ફરવાનો પ્લાન

શારદીય નવરાત્રી એ એક પવિત્ર તહેવાર છે જે સમગ્ર દેશમાં ખૂબ જ ઉત્સાહ અને ધામધૂમથી ઉજવવામાં આવે છે. નવ દિવસ સુધી દેવી દુર્ગાની પૂજા-અર્ચના કરવામાં આવે છે. ભક્તો તેમના ઘરોમાં માતા રાણીની મૂર્તિ સ્થાપિત કરે છે, વ્રત રાખે છે અને વિધિપૂર્વક પૂજા કરે છે. આ સાથે, ભારતભરમાં માતા દુર્ગાના શક્તિપીઠ અને મંદિરોમાં ભક્તોની ભીડ જામે છે. 

માત્ર મંદિરો જ નહીં, દેશમાં કેટલાક શહેરો એવા છે જે માતા દુર્ગાને સમર્પિત છે. ભારતમાં કેટલાક શહેરો એવા છે જેનું નામ માતા દુર્ગાના નામ પરથી રાખવામાં આવ્યું છે. ઘણીવાર બાળકોના નામ દેવી-દેવતાઓ પર રાખવામાં આવે છે, પરંતુ આખા શહેરનું નામ દેવીના નામ પર રાખવું એ એક ખાસ અને અનોખી બાબત છે. ચાલો જાણીએ આવા મોટા શહેરો વિશે.

મુંબઈ

મહારાષ્ટ્રની રાજધાની મુંબઈનું નામ મુંબા દેવીના નામ પરથી રાખવામાં આવ્યું છે. અહીં ઝવેરી બજારમાં મુંબા દેવી મંદિર આવેલું છે. આ મંદિર અંદાજે 500 વર્ષ જૂનું છે અને આ શહેરના ઈતિહાસ સાથે પણ જોડાયેલું છે. મુંબા દેવીને ધન અને ઐશ્વર્યના દેવી લક્ષ્મીનું સ્વરૂપ માનવામાં આવે છે. એવું માનવામાં આવે છે કે મુંબા દેવીની કૃપાથી જ મુંબઈ દેશની આર્થિક રાજધાની બની છે.

પટના

બિહારની રાજધાની પટનાનું નામ પણ દેવી સાથે જોડાયેલું છે. શહેરમાં એક જગ્યાએ માતા સતીની જમણી જાંઘ પડી હતી, તે જગ્યા દેવી પટન શક્તિપીઠના નામથી પ્રખ્યાત છે. નવરાત્રી દરમિયાન ભક્તો માટે તે મુખ્ય તીર્થસ્થાન છે. કહેવાય છે કે પટનાનું નામ દેવી પટન શક્તિપીઠના કારણે પડ્યું હતું.

શ્રીનગર

માતા લક્ષ્મીને 'શ્રી' પણ કહેવામાં આવે છે. જમ્મુ અને કાશ્મીરની રાજધાની શ્રીનગરનું નામ પણ દેવીના નામ પરથી રાખવામાં આવ્યું છે. આ શહેરમાં શારિકા દેવીનું મંદિર આવેલું છે જ્યાં દેવી લક્ષ્મી સ્વયંભૂ શ્રી ચક્રના રૂપમાં બિરાજમાન છે. આ સિવાય વિશ્વ પ્રસિદ્ધ વૈષ્ણો દેવી ધામ પણ જમ્મુમાં આવેલું છે, જે શ્રદ્ધાળુઓ માટે એક મુખ્ય ધાર્મિક સ્થળ છે.

નૈનીતાલ

ઉત્તરાખંડના સુંદર હિલ સ્ટેશન નૈનીતાલનું નામ દુર્ગાના અવતાર માતા નૈના દેવીના નામ પરથી રાખવામાં આવ્યું છે. એવું માનવામાં આવે છે કે અહીં માતા સતીની એક આંખ પડી હતી, જેના કારણે અહીં નૈના દેવી શક્તિપીઠની સ્થાપના કરવામાં આવી હતી. હિલ સ્ટેશનમાં પર્વતોથી ઘેરાયેલું સુંદર અને મોટું તળાવ છે. આ કારણે આ જગ્યાનું નામ નૈનીતાલ પડ્યું હતું.

ચંડીગઢ

ચંદીગઢ શહેરનું નામ માતા ચંડી દેવીના નામ પરથી રાખવામાં આવ્યું છે. અહીં મા ચંડીનું મંદિર આવેલું છે, જે ભક્તો માટે એક મહત્ત્વપૂર્ણ ધાર્મિક સ્થળ છે અને લોકો દૂર-દૂરથી અહીં આવે છે.

યોગિનીપુર, દિલ્હી

ભારતની રાજધાની દિલ્હીનું નામ પણ દેવી સાથે જોડાયેલું છે. મહેરૌલી વિસ્તારમાં સ્થિત યોગમાયા મંદિર સાથેના જોડાણને કારણે દિલ્હીનો એક ભાગ અગાઉ યોગિનીપુર તરીકે ઓળખાતો હતો. યોગમાયા એ દેવી દુર્ગાનું દયાળુ સ્વરૂપ છે અને તેમને ભગવાન કૃષ્ણની બહેન પણ માનવામાં આવે છે, જેમનો જન્મ નંદ બાબા અને યશોદાના ઘરે થયો હતો. એવું માનવામાં આવે છે કે આ સ્થાન પર અર્જુન અને ભગવાન કૃષ્ણએ મહાભારત યુદ્ધ દરમિયાન યોગમાયાની પૂજા કરી હતી અને પાંડવોએ મંદિર બનાવ્યું હતું.