ઉનાળામાં ત્વચાને ઠંડક આપશે આ 4 ફેસ પેક, ટેનિંગ અને ડલ સ્કિનથી પણ મળશે છુટકારો

ઉનાળામાં પરસેવા અને તીવ્ર સૂર્યપ્રકાશને કારણે ત્વચાને નુકસાન થાય છે. આવી સ્થિતિમાં, યોગ્ય સ્કિન કેરની સાથે કુદરતી ઘટકોમાંથી બનાવેલા ફેસ પેક તમારી ત્વચાને ઠંડક આપશે અને તમને રિલેક્સ ફિલ કરાવશે. આ ફેસ પેક લગાવવાનો ફાયદો એ છે કે તમે તાજગી અનુભવો છો, અને સાથે જ ત્વચાની સમસ્યાઓ જેમ કે ટેનિંગ, ડલ સ્કિન, પિમ્પલ્સ પણ દૂર થાય છે અને તે ભેજવાળા હવામાનમાં પણ ત્વચાને સ્વચ્છ અને ચમકદાર રાખવામાં મદદ કરે છે.

બજારમાં ઘણા પ્રકારના ફેસ પેક ઉપલબ્ધ છે, પરંતુ જો તમે ઘરે કુદરતી ઘટકોનો ઉપયોગ કરીને ફેસ પેક બનાવીને તેને તરત જ લગાવો છો, તો તે ઉનાળામાં તમારી ત્વચાને વધુ રાહત આપે છે. ચાલો જાણીએ આવા 4 ફેસ પેક વિશે.

દહીં અને કાકડી

કુદરતી રીતે ત્વચાને ચમકદાર અને મુલાયમ બનાવવા માટે દહીં એક ઉત્તમ વિકલ્પ છે. કાકડી ત્વચાને હાઇડ્રેટ કરવા, તેને તાજી બનાવવા અને બળતરા દૂર કરવાનું કામ કરે છે. કાકડી સનબર્ન, ટેનિંગ અને પિમ્પલ્સને દૂર કરવામાં પણ અસરકારક છે. દહીંમાં કાકડીના પલ્પને મિક્સ કરીને ચહેરા અને ગરદન પર લગાવો, લગભગ 30 મિનિટ સુધી રહેવા દો અને પછી ચહેરો ધોઈ લો.

ગુલાબજળ, હળદર અને મુલતાની માટી 

ફેસ પેક બનાવવા માટે મુલતાની માટીને પાણીમાં પલાળી રાખો અથવા એકથી દોઢ ચમચી મુલતાની માટીનો પાવડર લો. હવે તેમાં એક ચપટી હળદર અને ગુલાબજળ ઉમેરીને ફેસ પેક તૈયાર કરો, તેને ચહેરા પર 20થી 25 મિનિટ સુધી લગાવો અને પછી પાણીથી ચહેરો સાફ કરો.

ચંદન અને સંતરાની છાલ

એક ચમચી સંતરાની છાલનો પાવડર લો. તેમાં સમાન માત્રામાં ચંદન પાવડર મિક્સ કરો. એક ચપટી હળદર, એલોવેરા જેલ અને ગુલાબજળ મિક્સ કરીને ફેસ પેક બનાવો. આ ફેસ પેક માત્ર ઠંડકની અનુભૂતિ જ નહીં કરાવે પરંતુ ડાઘ, પિમ્પલ્સથી છુટકારો મેળવવામાં અને ત્વચાને નિખારવામાં પણ મદદ કરશે.

કાકડી અને એલોવેરા 

ત્વચાને સ્વસ્થ બનાવવા માટે કાકડી અને એલોવેરા બંને ફાયદાકારક છે અને આ બંને વસ્તુઓ ઘરે સરળતાથી મળી રહે છે, કાકડીને બ્લેન્ડ કરીને પલ્પ બનાવો અને પછી તેમાં એલોવેરા જેલ ઉમેરીને ફેસ પેક બનાવો. આ ફેસ પેક લગાવવાથી સ્કિન હાઇડ્રેટ થાય છે અને સનબર્નની સમસ્યાથી રાહત મળે છે.