છાતીમાં દુખાવા વગર પણ આવી શકે છે હાર્ટ અટેક! આ લક્ષણોને ન અવગણો
હાર્ટ અટેક આવે ત્યારે દરેક વખતે છાતીમાં દુખાવો થાય જ તે જરૂરી નથી. ઘણીવાર દાંત, ખભા કે પેટના ઉપરના ભાગમાં થતો દુખાવો પણ હાર્ટ અટેકનો સંકેત હોઈ શકે છે. વળી, વેપિંગ, સ્મોકિંગ અને ખરાબ જીવનશૈલી પણ હૃદયના સ્વાસ્થ્યને નુકસાન પહોંચાડી શકે છે.
લક્ષણો વગર પણ આવી શકે છે હાર્ટ અટેક
ડૉ. જણાવે છે કે કેટલાક લોકોને છાતીમાં દુખાવા વગર પણ હાર્ટ અટેક આવી શકે છે. ખાસ કરીને ડાયાબિટીસના દર્દીઓ અને મહિલાઓમાં આવું જોવા મળે છે. ઘણીવાર દાંત, ખભા કે પેટના ઉપરના ભાગમાં દુખાવો થાય છે, જેને લોકો ગેસ કે અન્ય કોઈ સમસ્યા સમજી બેસે છે. આશરે 5 થી 10 ટકા મામલાઓમાં દુખાવો થતો નથી અથવા તેના લક્ષણો સામાન્ય કરતા અલગ હોય છે.
વેપિંગથી હૃદય અને નસોને નુકસાન
ડૉક્ટર જણાવે છે કે વેપિંગ એટલે કે ઈ-સિગારેટને સિગારેટનો સુરક્ષિત વિકલ્પ ન માનવો જોઈએ. તેમાં રહેલું નિકોટિન અને અન્ય તત્વો શરીરમાં સોજો (ઇન્ફ્લેમેશન) વધારી શકે છે. તેનાથી નસોમાં બ્લોકેજ, હાર્ટ અટેક, હાર્ટ ફેલ્યોર, હૃદયના ધબકારા અનિયમિત થવા અને સ્ટ્રોકનું જોખમ વધી જાય છે. એટલા માટે યુવાનોએ વેપિંગથી દૂર રહેવું જોઈએ.
ઉંમર પહેલાં ઘરડા થઈ શકે છે હૃદય
ડૉ. જણાવે છે કે માણસની વાસ્તવિક ઉંમર અને હૃદયની જૈવિક ઉંમર અલગ હોઈ શકે છે. જો 50 વર્ષની વ્યક્તિ નિયમિત કસરત કરતી હોય અને ફિટ રહેતી હોય, તો તેનું હૃદય ઓછી ઉંમરની વ્યક્તિ જેવું સ્વસ્થ હોઈ શકે છે. બીજી બાજુ, ઓછી ઉંમરમાં દારૂ, સ્મોકિંગ, ડાયાબિટીસ, હાઈ બ્લડ પ્રેશર અને શારીરિક પ્રવૃત્તિઓનો અભાવ હૃદયના સ્વાસ્થ્યને ઝડપથી બગાડી શકે છે.
નવી ટેકનોલોજીથી મળી શકે છે જોખમના સંકેતો
ડૉક્ટર જણાવે છે કે AI આધારિત ટેકનોલોજી, ECG અને સ્માર્ટવોચથી હૃદયની કેટલીક સમસ્યાઓના સંકેતો મળી શકે છે. જો કે, તેનાથી હાર્ટ અટેક અથવા બ્લોકેજની 100 ટકા ઓળખ થવાની ખાતરી નથી. જો કોઈ એલર્ટ મળે કે તકલીફ અનુભવાય, તો ડૉક્ટર પાસે તપાસ કરાવવી જરૂરી છે.
સામાન્ય કોલેસ્ટ્રોલ અને બીપી હોવા છતાં હાર્ટ અટેકનું જોખમ
ડૉ. જણાવે છે કે કોલેસ્ટ્રોલ અને બ્લડ પ્રેશર સામાન્ય હોવા છતાં હાર્ટ અટેક આવી શકે છે. ડાયાબિટીસ, દારૂ, સ્મોકિંગ, તણાવ, ખરાબ જીવનશૈલી અને પરિવારમાં હૃદય રોજનો ઇતિહાસ પણ તેનું જોખમ વધારે છે. કેટલાક લોકોમાં આનુવંશિક (જેનેટિક) કારણોસર જોખમ વધુ હોઈ શકે છે. એટલા માટે નિયમિત તપાસ અને સ્વસ્થ જીવનશૈલી અપનાવવી ખૂબ જ જરૂરી છે.
