મહારાષ્ટ્ર સરકારે મુખ્યમંત્રી દેવેન્દ્ર ફડણવીસની અધ્યક્ષતામાં મળેલી કેબિનેટ બેઠકમાં ખેડૂતો માટે મોટી રાહતની જાહેરાત કરી છે. રાજ્યના અંદાજે 56 લાખ ખેડૂતોના 65 લાખથી વધુ લોન ખાતાઓને લાભ મળે તે માટે 2 લાખ રૂપિયા સુધીનું કૃષિ ધિરાણ માફ કરવાનો નિર્ણય લેવામાં આવ્યો છે. સપ્ટેમ્બર 2025 સુધીના બાકી પાક ધિરાણને આ યોજનામાં આવરી લેવામાં આવશે. આ નિર્ણયથી રાજ્ય સરકાર પર અંદાજે 36 હજાર 585 કરોડ રૂપિયાનો નાણાકીય બોજ પડશે. સાથે જ નિયમિત રીતે બેંક લોન ચૂકવનારા ખેડૂતોને પ્રોત્સાહન રૂપે 50 હજાર રૂપિયા સુધીનું અનુદાન આપવાની પણ જાહેરાત કરવામાં આવી છે. ચોમાસા અને ખરીફ સીઝન પહેલાં લેવાયેલા આ નિર્ણયને ખેડૂતો માટે મહત્વપૂર્ણ આર્થિક સહાય તરીકે જોવામાં આવી રહ્યો છે.
