બરફ, કાદવ અને રણમાં પણ સરળતાથી દોડશે આર્મીનું આ ખાસ વાહન, સુરતમાં ઉત્પાદન શરૂ

ભારતે તેની સેના માટે ખાસ ઓલ-ટેરેન વાહનોના સ્વદેશી ઉત્પાદન તરફ એક મોટું પગલું ભર્યું છે. લાર્સન એન્ડ ટુબ્રો (L&T) અને બ્રિટિશ કંપની BAE સિસ્ટમ્સે 28 ઓક્ટોબરે સુરત સ્થિત L&Tના આર્મર્ડ સિસ્ટમ્સ કોમ્પ્લેક્સ ખાતે 18 'BvS10 સિંધુ' આર્ટિક્યુલેટેડ ઓલ-ટેરેન વાહનોનું ઉત્પાદન શરૂ કર્યું છે. આ વાહનો બરફ, કાદવ અને પાણી જેવા અત્યંત મુશ્કેલ વિસ્તારોમાં પણ સરળતાથી ચાલી શકે છે.

લદાખની બરફીલી ઠંડીથી લઈને કચ્છની ગરમી સહન કરવાની ક્ષમતા

આ વાહનની સૌથી મોટી ખાસિયત એ છે કે તે લદાખ જેવા ઊંચાઈવાળા વિસ્તારોમાં 18,000 ફૂટની ઊંચાઈએ અને માઈનસ 55 ડિગ્રી સેલ્સિયસની થીજવી દેતી ઠંડીમાં પણ સક્ષમતાથી કામ કરી શકે છે. સાથોસાથ તે કચ્છના દલદલીય અને રેતાળ વિસ્તારોમાં 55 ડિગ્રી સેલ્સિયસની ભીષણ ગરમી પણ સહન કરવાની ક્ષમતા ધરાવે છે. 'BvS10 સિંધુ' એક ખાસ સાંધાવાળી ડિઝાઇન ધરાવતું વાહન છે, જેમાં બે ભાગ એકબીજા સાથે જોડાયેલા રહે છે. આ ડિઝાઇનને કારણે તે ઊબડ-ખાબડ રસ્તાઓ પર સ્થિર રહે છે અને સૈનિકો, સામગ્રી તથા હથિયારોને સુરક્ષિત રીતે પહોંચાડી શકે છે.

મેક ઈન ઈન્ડિયા અને આત્મનિર્ભરતા તરફ મહત્ત્વનું પગલું

વર્ષ 2023માં L&T અને BAE સિસ્ટમ્સ વચ્ચે થયેલા કરાર હેઠળ આ ઉત્પાદન શરૂ કરવામાં આવ્યું છે. સુરતના આધુનિક પ્લાન્ટમાં ટેકનોલોજીના ટ્રાન્સફર સાથે તેનું ઉત્પાદન થઈ રહ્યું છે, જેથી ભારત ધીમે ધીમે રક્ષા ક્ષેત્રે આત્મનિર્ભર બની શકે. ભારતીય સેના આ વાહનોનો ઉપયોગ મુખ્યત્વે ઉત્તર અને પશ્ચિમ સરહદો પર કરશે, જ્યાં હવામાન અને ભૂગોળ બંને અત્યંત પડકારજનક છે.

સરહદી સુરક્ષા અને સ્થાનિક રોજગારી વધશે

શરૂઆતમાં 18 વાહનોનું ઉત્પાદન કરવામાં આવી રહ્યું છે અને સફળ પરીક્ષણ બાદ સેનાની જરૂરિયાત મુજબ તેની સંખ્યા વધારવામાં આવી શકે છે. ટેકનોલોજી ટ્રાન્સફર અને સ્થાનિક નિર્માણથી દેશમાં રોજગારીની તકો વધશે અને સપ્લાય ચેઈન પણ મજબૂત થશે. ખર્ચ નિયંત્રણ અને સમયસર ડિલિવરી જેવા પડકારો હોવા છતાં, આ પ્રોજેક્ટ ભારતીય સેનાની સરહદો પર ગતિશીલતા વધારશે અને દેશની સુરક્ષા સિસ્ટમને વધુ મજબૂત બનાવશે.