હોર્મુઝ સ્ટ્રેટની સુરક્ષા હવે દક્ષિણ કોરિયાના હાથે? તહેનાત કરશે હથિયારધારી પ્લેન અને વિશેષ દળ

દક્ષિણ કોરિયાએ વિશ્વના સૌથી મહત્ત્વપૂર્ણ દરિયાઈ વેપાર માર્ગોમાંથી એક એવા 'હોર્મુઝ સ્ટ્રેટ' નજીક દરિયાઈ સુરક્ષા વધારવા માટે એક મોટો નિર્ણય લીધો છે. દક્ષિણ કોરિયાના સંરક્ષણ મંત્રાલયે જાહેરાત કરી છે કે તેઓ આ વ્યૂહાત્મક રીતે અગત્યના વિસ્તારમાં દરિયાઈ પેટ્રોલિંગ એરક્રાફ્ટ અને બોમ્બ નિષ્ક્રિય કરતી નિષ્ણાત ટીમ (EOD Team) તૈનાત કરશે. આ ખાસ મિશનનો મુખ્ય હેતુ આ આંતરરાષ્ટ્રીય દરિયાઈ માર્ગને સુરક્ષિત અને ખુલ્લો રાખવામાં મદદ કરવાનો છે.

સુરક્ષા મિશનનો મુખ્ય હેતુ અને કામગીરી

સંરક્ષણ મંત્રાલયના જણાવ્યા અનુસાર, હોર્મુઝ સ્ટ્રેટના આસપાસના વિસ્તારમાં મોકલવામાં આવનાર દરિયાઈ પેટ્રોલિંગ એરક્રાફ્ટ સતત નજર રાખશે અને સંભવિત જોખમો અંગે આગોતરી ચેતવણી આપશે. આ ઉપરાંત, એક્સપ્લોસિવ ઓર્ડનન્સ ડિસ્પોઝલ (EOD) ટીમ દરિયામાં રહેલા કોઈ પણ પ્રકારના વિસ્ફોટક જોખમો અને બોમ્બને નિષ્ક્રિય કરવાની મહત્ત્વપૂર્ણ કામગીરી સંભાળશે. આ પગલાથી આ વિસ્તારમાંથી પસાર થતા જહાજોની સુરક્ષા સુનિશ્ચિત કરી શકાશે.

શા માટે આટલી મહત્ત્વની છે હોર્મુઝ સ્ટ્રેટ?

હોર્મુઝ સ્ટ્રેટ વૈશ્વિક ઊર્જા પુરવઠા અને દરિયાઈ વેપારની દ્રષ્ટિએ અત્યંત સંવેદનશીલ અને મહત્ત્વપૂર્ણ જળમાર્ગ છે. આ સ્ટ્રેટ પર્સિયન ખાડીને ઓમાનની ખાડી અને અરબ સાગર સાથે જોડે છે. વિશ્વભરમાં ઓઇલ અને ગેસના પરિવહન માટે આ માર્ગ ખૂબ જ મહત્ત્વનો હોવાથી તેની સુરક્ષા સમગ્ર વિશ્વના અર્થતંત્ર અને ઊર્જા પુરવઠા માટે અનિવાર્ય ગણાય છે.