1986માં થયું હતું દુષ્કર્મ, 2025 માં મળ્યો ન્યાય: પીડિતાનું દર્દ જોઈને સુપ્રીમ કોર્ટે શું કહ્યું?

આ એક એવી મહિલાની વાર્તા છે જેના પર 1986 માં બળાત્કાર થયો હતો, પરંતુ તેને 2025માં ન્યાયતંત્ર તરફથી ન્યાય મળ્યો. હવે સર્વોચ્ચ અદાલતે આરોપીની સજાને યથાવત રાખી છે અને તેને જેલમાં મોકલવાનો આદેશ આપ્યો છે. એટલું જ નહીં, સુપ્રીમ કોર્ટે હાઈકોર્ટ દ્વારા કેસ ચલાવવાની રીત પર પણ પ્રશ્નો ઉઠાવ્યા છે.

શું હતો કેસ? 

1986માં, એક સગીર યુવતી પર તે સમયે 21 વર્ષના છોકરાએ બળાત્કાર ગુજાર્યો હતો. નવેમ્બર 1987માં, તેને ટ્રાયલ કોર્ટે દોષિત ઠેરવ્યા અને સાત વર્ષની જેલની સજા ફટકારી. મામલો કેવી રીતે આગળ વધ્યો અને પીડિતા અલગ અલગ કોર્ટના ચક્કર લગાવતી રહી. 2013માં રાજસ્થાન હાઈકોર્ટે તેમને નિર્દોષ જાહેર કર્યા. કારણ એ આપવામાં આવ્યું હતું કે પીડિતા સહિત ફરિયાદ પક્ષના સાક્ષીઓ દ્વારા નક્કર નિવેદનો આપવામાં આવ્યા ન હતા.

હવે સુપ્રીમ કોર્ટે પણ આ મામલાને હાઈકોર્ટ દ્વારા જે રીતે ઉકેલવામાં આવ્યો તેના પર આશ્ચર્ય વ્યક્ત કર્યું છે. તેમણે એ વાત પર પણ નારાજગી વ્યક્ત કરી કે તેમના નિર્ણયમાં પીડિતાનું નામ ઘણી વખત ઉલ્લેખવામાં આવ્યું છે. આરોપીને 4 અઠવાડિયામાં આત્મસમર્પણ કરવા અને ટ્રાયલ કોર્ટ દ્વારા આપવામાં આવેલી બાકીની સજા ભોગવવાનો નિર્દેશ આપવામાં આવ્યો છે.

સુપ્રીમ કોર્ટમાં શું થયું?

મીડિયા રિપોર્ટ્સ અનુસાર, સર્વોચ્ચ અદાલતે કહ્યું, 'આ ખૂબ જ દુઃખદ છે કે આ સગીર છોકરી અને તેના પરિવારને તેમના જીવનના આ પીડાદાયક પ્રકરણનો અંત લાવવા માટે લગભગ ચાર દાયકા રાહ જોવી પડી.' બેન્ચે કહ્યું, 'એ સાચું છે કે બાળ સાક્ષી (પીડિત) એ પોતાની સામે થયેલા ગુના વિશે કંઈ કહ્યું ન હતું.' ટ્રાયલ કોર્ટના રેકોર્ડ દર્શાવે છે કે ઘટના વિશે પૂછવામાં આવ્યું ત્યારે પીડિત ચૂપ રહી. અને માત્ર આંસુ જ વહાવ્યા હતા. 

કેસની સુનાવણી કરી રહેલા ન્યાયાધીશોએ કહ્યું કે આ આરોપીના પક્ષમાં ગણી શકાય નહીં. તેમણે કહ્યું હતું કે છોકરીના મૌનનું કારણ આઘાત હતો. પીડિતા અંગે ન્યાયાધીશોએ કહ્યું, 'મુકદ્દમાનો સંપૂર્ણ ભાર તેના ખભા પર નાખવો અન્યાયી હશે.'