'કોઈ મારા મગજને મશીન વડે કંટ્રોલ કરી રહ્યું છે...', અરજી જોઈને સુપ્રીમ કોર્ટના જજ પણ ચોંકયા 

એક વ્યક્તિએ સુપ્રીમ કોર્ટમાં અરજી દાખલ કરીને વિચિત્ર દાવો કર્યો છે. તેણે દાવો કર્યો છે કે કોઈ તેના મગજને મશીન દ્વારા નિયંત્રિત કરી રહ્યું છે. જ્યારે સુપ્રીમ કોર્ટે આ કેસની સુનાવણી કરી ત્યારે તેઓ પણ તેનાથી આશ્ચર્યચકિત થઈ ગયા હતા. ન્યાયાધીશે કહ્યું કે આ મામલામાં હસ્તક્ષેપને કોઈ અવકાશ નથી. કોર્ટે સુનાવણી દરમિયાન અરજદારની માતૃભાષામાં વાત કરવાનો પણ પ્રયાસ કર્યો હતો.

આ પણ વાંચો : સ્ત્રી અને પુરુષના લગ્નની ઉંમરમાં ફેરફાર રાખી કરાયો છે ભેદભાવ : હાઇકોર્ટ 

શું છે સમગ્ર મામલો?

અરજદાર વતી આંધ્ર પ્રદેશ હાઈકોર્ટમાં અરજી દાખલ કરવામાં આવી હતી. અહેવાલ મુજબ, આ અરજીમાં કહેવામાં આવ્યું હતું કે કેટલાક લોકોએ CFSL એટલે કે સેન્ટ્રલ ફોરેન્સિક સાયન્ટિફિક લેબોરેટરીમાંથી માનવ મગજ વાંચવાની મશીનરી મેળવી છે. તેના પર આ ટેકનિકનો ઉપયોગ કરવામાં આવ્યો છે. આ કેસમાં સીબીઆઈ વતી કોર્ટમાં એફિડેવિટ રજૂ કરવામાં આવી હતી.

તેમાં કહેવામાં આવ્યું છે કે અરજદાર પર આવી કોઈ ફોરેન્સિક તપાસ કરવામાં આવી નથી. આવી સ્થિતિમાં મશીનને નિષ્ક્રિય કરવાનો પ્રશ્ન જ ઊભો થતો નથી. આ અરજી નવેમ્બર 2022માં કોર્ટમાં ફગાવી દેવામાં આવી હતી. વ્યવસાયે શિક્ષક એવા આ અરજદારે સુપ્રીમ કોર્ટમાં સ્પેશિયલ લીવ પિટિશન દાખલ કરી હતી. અરજદારે સુપ્રીમ કોર્ટમાં પિટિશન દાખલ કરીને આ મશીનને નિષ્ક્રિય કરવાના નિર્દેશોની માગણી કરી હતી.

સુપ્રીમ કોર્ટમાં આ કેસની સુનાવણી જસ્ટિસ સુધાંશુ ધુલિયા અને જસ્ટિસ એહસાનુદ્દીન અમાનુલ્લાહની ખંડપીઠે કરી હતી. આ મામલામાં કોર્ટે કહ્યું, 'અરજીકર્તા વતી એક વિચિત્ર પ્રાર્થના કરવામાં આવી છે કે કેટલાક અન્ય લોકો વતી મશીન ચલાવવામાં આવી રહ્યું છે, જેના દ્વારા તેના મનને નિયંત્રિત કરવામાં આવી રહ્યું છે. અમને આ બાબતમાં દખલ કરવાનો કોઈ અવકાશ કે કારણ દેખાતું નથી.