'SIRથી જોડાયેલા નિર્ણયો ત્રણેય કમિશનરની સંમતિથી લેવાયા', ચૂંટણી પંચનું સુપ્રીમ કોર્ટમાં સોગંદનામું

સ્પેશિયલ ઇન્ટેન્સિવ રિવિઝન એટલે કે SIR પ્રક્રિયા અને મુખ્ય ચૂંટણી કમિશનર જ્ઞાનેશ કુમારના કામકાજ સામે ઉઠેલા સવાલો વચ્ચે ચૂંટણી પંચે સુપ્રીમ કોર્ટમાં સોગંદનામું દાખલ કર્યું છે. પંચે પોતાના જવાબમાં સ્પષ્ટતા કરી છે કે, SIRથી જોડાયેલા ત્રણેય આદેશો તમામ સદસ્યોની સહમતીથી જારી કરવામાં આવ્યા હતા, અને જ્ઞાનેશ કુમાર દ્વારા એકલા હાથે કોઈ નિર્ણય લેવામાં આવ્યો નથી.

સર્વસંમતિથી લેવાયા આદેશો

ચૂંટણી પંચના જણાવ્યા મુજબ, જૂન 2025, ઓક્ટોબર 2025 અને મે 2026માં SIRને લઈને જારી કરાયેલા ત્રણેય આદેશો પંચ દ્વારા સર્વસંમતિથી લેવામાં આવ્યા હતા. આ સોગંદનામાને મુખ્ય ચૂંટણી કમિશનર જ્ઞાનેશ કુમાર અને બંને ચૂંટણી આયુક્તોએ મંજૂરી આપી છે. પંચે સ્પષ્ટ કર્યું કે, ફાઇલ પર ચર્ચા દરમિયાન કોઈ કમિશનરની ટિપ્પણી કે સૂચનને પંચનો અંતિમ નિર્ણય માની શકાય નહીં.

ફોર્મ 6 અને મતદાર યાદી પર સ્પષ્ટતા

મતદાર યાદીમાં નામ જોડવા માટે વપરાતા ફોર્મ 6 અંગે પંચે કહ્યું કે, તેમાં કોઈ સંશોધન કે ફેરફાર કરવામાં આવ્યો નથી. ફોર્મમાં ફેરફાર કરવાનો અધિકાર કેન્દ્ર સરકાર પાસે છે. ઓનલાઈન અરજીમાં તેને અલગ દેખાડવાથી થયેલા ભ્રમ અંગે પંચે કહ્યું કે, હવે કાગળના ફોર્મની જેમ ઓનલાઈન પણ ફોર્મ 6 અને ઘોષણાપત્ર અલગ-અલગ દેખાડવાની વ્યવસ્થા કરવામાં આવી છે. પંચે એમ પણ જણાવ્યું કે, જે મતદાતાઓનો જૂનો રેકોર્ડ વર્તમાન યાદી સાથે મેચ નથી થયો, તેમને સામાન્ય રીતે ઓફિસ બોલાવવાની જરૂર નહીં પડે. બૂથ લેવલ ઓફિસર એટલે કે BLO જાતે તેમના ઘરે જઈને દસ્તાવેજો એકત્ર કરશે. આ ઉપરાંત ECINet સિસ્ટમની તપાસ માટે IIT અને IIScના વિશેષજ્ઞોની સમિતિ પણ બનાવવામાં આવી છે.

CECને હટાવાની માંગ ફગાવી

મુખ્ય ચૂંટણી કમિશનરને પદ પરથી હટાવવાની માંગ કરતી અરજી પર પંચે કહ્યું કે, આવી માંગ સ્વીકાર્ય નથી, કારણ કે CECને હટાવાની પ્રક્રિયા સુપ્રીમ કોર્ટના જજને હટાવવા જેવી જટિલ હોય છે. પંચે આ મામલે વિગતવાર જવાબ આપવા માટે સમય પણ માંગ્યો છે.