ગુવાહાટીની હોટલમાં અંધાધૂંધ ફાયરિંગ: 4નાં મોત, અનેક ઘાયલ

આસામના ગુવાહાટીમાં આવેલી એક હોટલમાં ફાયરિંગની ગંભીર ઘટના સામે આવી છે. શહેરના લચ્છિત નગર વિસ્તારમાં આવેલી હોટલ બિલાસ ઇનમાં સોમવારે રાત્રે આશરે 9 વાગ્યે થયેલા ગોળીબારમાં ચાર લોકોનાં મોત થયાં છે. ગુવાહાટીના પોલીસ કમિશનરે ચાર લોકોનાં મોતની પુષ્ટિ કરી હોવાનું અહેવાલમાં જણાવાયું છે.

ઘટનાની જાણ થતાં પોલીસ અને એમ્બ્યુલન્સ પહોંચી

મળતી માહિતી મુજબ, ફાયરિંગની ઘટના બોરા સર્વિસ નજીક બની હતી. ગોળીબારની જાણ થતાં જ પોલીસ અને એમ્બ્યુલન્સ ઘટનાસ્થળે પહોંચી ગયાં હતાં. ઘાયલોને સારવાર માટે ખસેડવામાં આવ્યા હોવાની માહિતી છે.

બે મહિલાઓ સહિત અનેક લોકો ઘાયલ

ફાયરિંગમાં બે મહિલાઓ સહિત અનેક લોકોને ઈજા થઈ હોવાનું જણાવવામાં આવ્યું છે. હોટલ બિલાસ ઇનનો એક કર્મચારી પણ ગોળી વાગવાથી ઘાયલ થયો હોવાની માહિતી સામે આવી છે. જોકે, ઘાયલોની ચોક્કસ સંખ્યા અને તેમની સ્થિતિ અંગે વધુ વિગતોની રાહ જોવાઈ રહી છે.

હુમલાખોરોની ઓળખ માટે તપાસ શરૂ

પોલીસે ઘટનાસ્થળેથી માહિતી એકત્રિત કરવાની અને ફાયરિંગ પાછળનું કારણ જાણવાની તપાસ શરૂ કરી છે. હુમલાખોરો કોણ હતા અને કયા કારણોસર ગોળીબાર કરવામાં આવ્યો તે અંગે હજી સ્પષ્ટતા થઈ નથી. પોલીસની તપાસ આગળ વધતાં ઘટનાની વધુ વિગતો સામે આવવાની શક્યતા છે.