શિબુ સોરેનની તબિયત લથડી, ખાસ વિમાન દ્વારા દિલ્હી લવાશે

ઝારખંડ મુક્તિ મોરચા (JMM) ના સુપ્રીમો અને ભૂતપૂર્વ મુખ્યમંત્રી શિબુ સોરેનની તબિયત લથડતાં તેમને ખાસ વિમાન દ્વારા દિલ્હી લાવવામાં આવી રહ્યા છે. મળતી માહિતી મુજબ, શિબુ સોરેનને શ્વાસ લેવામાં તકલીફ પડી રહી છે. સીએમ હેમંત સોરેન પણ તેમના પિતા સાથે દિલ્હી જવા રવાના થઈ ગયા છે. તમને જણાવી દઈએ કે થોડા વર્ષો પહેલા શિબુ સોરેનને શ્વાસ લેવામાં તકલીફના કારણે મેદાંતા રાંચીમાં દાખલ કરવામાં આવ્યા હતા.

શિબુ સોરેન કોણ છે?

શિબુ સોરેન ઝારખંડ મુક્તિ મોરચાના પ્રમુખ છે. યુપીએના પહેલા કાર્યકાળમાં તેઓ કોલસા મંત્રી બન્યા હતા પરંતુ ચિરુદીહ હત્યા કેસમાં તેમનું નામ સામે આવતાં તેમને કેન્દ્રીય મંત્રીમંડળમાંથી રાજીનામું આપવું પડ્યું હતું. શિબુએ તેમના પિતા શોભરામ સોરેનની હત્યા પછી રાજકારણમાં પ્રવેશ કર્યો.

શિબુએ 1977માં પહેલી વાર લોકસભાની ચૂંટણી લડી, પરંતુ તેમને હારનો સામનો કરવો પડ્યો. પરંતુ તેમને 1980 માં સફળતા મળી. આ પછી તેમણે 1986,1989,1991, અને 1996માં પણ ચૂંટણી જીતી. 2004 માં, તેઓ દુમકાથી લોકસભા માટે ચૂંટાયા. શિબુ સોરેન ઝારખંડના મુખ્યમંત્રી પણ રહી ચૂક્યા છે. હવે તેમના પુત્ર હેમંત સોરેન રાજ્યના મુખ્યમંત્રી છે. શિબુ સોરેનને 'ગુરુજી' તરીકે પણ ઓળખવામાં આવે છે.