માતપિતાનું શરમજનક કૃત્ય, પૈસા માટે 4 વર્ષની દીકરીનો કર્યો સોદો

ઓડિશાના ભુવનેશ્વરમાંથી એક ચોંકાવનારો કિસ્સો સામે આવ્યો છે. બિહારના એક દંપતિએ તેમની ચાર વર્ષની પુત્રીને અહીં 40,000 રૂપિયામાં વેચી દીધી. આ ઘટના ભુવનેશ્વરના શિસુપાલગઢ વિસ્તારમાં બની હતી, જ્યાં દંપતી મજૂરી કરીને પોતાનું ગુજરાન ચલાવતા હતા. તેમણે પોતાની પુત્રીને પુરી જિલ્લાના પીપીલી વિસ્તારના એક દંપતીને વેચી દીધી.

આ મામલો ત્યારે સામે આવ્યો જ્યારે મકાન માલિક સાર્થક મહંતીએ બડગડ પોલીસ સ્ટેશનમાં ફરિયાદ નોંધાવી. ફરિયાદ મળ્યા બાદ પોલીસે તાત્કાલિક કાર્યવાહી કરીને બાળકીને બચાવી લીધી હતી અને કેસમાં સંડોવાયેલા છ લોકોને કસ્ટડીમાં લીધા હતા. જેમાં છોકરીના માતા-પિતા, છોકરીને ખરીદનાર દંપતી અને સોદો કરનાર બે મહિલાઓનો સમાવેશ થાય છે.

માતા-પિતા રોજમદાર મજૂર છે

બડગડ પોલીસ સ્ટેશનના IIC તૃપ્તિ રંજન નાયકે જણાવ્યું હતું કે દંપતીએ સ્વીકાર્યું છે કે છોકરીને 40,000 રૂપિયામાં વેચવામાં આવી હતી. યુવતીના માતા-પિતા મજૂરી કરીને પોતાનું ગુજરાન ચલાવે છે. પોલીસે જણાવ્યું કે આ સમગ્ર ઘટના વિસ્તારમાં લાગેલા સીસીટીવી કેમેરામાં કેદ થઈ ગઈ છે, જેના કારણે આ મામલો સામે આવ્યો છે.

દંપતીએ ગુનો કબૂલી લીધો હતો

માહિતી આપતાં ચાઈલ્ડલાઈનના ડિરેક્ટર બેનુધર સેનાપતિએ જણાવ્યું હતું કે, "આ વેચાઈ રહેલી  બાળકી વ્યક્તિની પહેલી પત્નીની છે. જેને આ પુરુષે ત્યજી દીધી હતી. પછી તેણે બીજા લગ્ન કર્યા હતા. દંપતીએ પોતાનો ગુનો કબૂલ કર્યો છે અને તે કાયદાકીય ગુનો છે." પોલીસ અને ચાઈલ્ડલાઈનના અધિકારીઓએ બાળકીને પોતાની કસ્ટડીમાં લઈ આગળની કાયદેસરની કાર્યવાહી હાથ ધરી છે.