'દર 2 કલાકે રિપોર્ટ મોકલો...', ડોકટરોના વિરોધ વચ્ચે કેન્દ્ર સરકારનો રાજ્યોને નિર્દેશ

કોલકાતાની સરકારી આરજી કર મેડિકલ કોલેજ અને હોસ્પિટલમાં તાલીમાર્થી ડોક્ટરની બળાત્કાર અને હત્યા બાદ ડોક્ટરોના વિરોધ વચ્ચે કેન્દ્રીય ગૃહ મંત્રાલયે મોટો નિર્ણય લીધો છે. ગૃહ મંત્રાલયના નવા આદેશ મુજબ હવે તમામ રાજ્યોએ દર 2 કલાકે તેમની કાયદો અને વ્યવસ્થાની સ્થિતિની માહિતી ગૃહ મંત્રાલયને આપવી પડશે.

રાજ્યોમાં વધી રહેલા અપરાધને જોતા ગૃહ મંત્રાલયે આ નિર્ણય લીધો છે અને તમામ રાજ્યોને આદેશ જારી કર્યા છે. રાજ્ય પોલીસ દળોને મોકલવામાં આવેલા સંદેશમાં કહેવામાં આવ્યું છે કે વિરોધ પ્રદર્શનને ધ્યાનમાં રાખીને તમામ રાજ્યોની કાયદો અને વ્યવસ્થાની સ્થિતિ પર નજર રાખવામાં આવે. પોતાના આદેશમાં ગૃહ મંત્રાલયે તમામ રાજ્યોને ઈમેલ, ફેક્સ અથવા વોટ્સએપ દ્વારા દર 2 કલાકે કેન્દ્રને કાયદો અને વ્યવસ્થાનો રિપોર્ટ મોકલવા જણાવ્યું છે.

દેશના વિવિધ ભાગોમાં ડોક્ટરો અને અન્ય મેડિકલ સ્ટાફ વિરોધ પ્રદર્શન કરી રહ્યા છે, જેના કારણે સ્વાસ્થ્ય સુવિધાઓ પ્રભાવિત થઈ રહી છે. વિરોધીઓ આરોગ્યસંભાળ કામદારો સામેની હિંસાને રોકવા માટે કેન્દ્રીય કાયદા માટે દબાણ કરી રહ્યા છે, સાથે હોસ્પિટલોને ફરજિયાત સુરક્ષા અધિકારો સાથે સલામત ઝોન તરીકે જાહેર કરવાની માંગણી પણ કરી છે. 

PM મોદીને IMAનો પત્ર

9 ઓગસ્ટના રોજ કોલકાતાની આરજી કર મેડિકલ કોલેજ અને હોસ્પિટલમાં તાલીમાર્થી ડૉક્ટર પર બળાત્કાર અને હત્યાની ઘટનાએ સમગ્ર દેશમાં આક્રોશ પેદા કર્યો છે. ડોક્ટરો સતત વિરોધ કરી રહ્યા છે. કોલકાતામાં બનેલી આ ઘટનાના વિરોધમાં IMAના આહ્વાન પર શનિવારે દેશભરના તબીબોએ 24 કલાકની હડતાળ પાડી હતી.

તેના 24 કલાકના વિરોધ બાદ ઈન્ડિયન મેડિકલ એસોસિએશન (IMA) એ વડાપ્રધાન નરેન્દ્ર મોદીને પત્ર લખ્યો છે. IMAએ કહ્યું કે 'મહિલાઓ માટે સુરક્ષિત સ્થાનોના અભાવને કારણે મોટા પાયે ગુનાઓ થઈ રહ્યા છે. સુરક્ષા પ્રોટોકોલનો અભાવ તોડફોડ તરફ દોરી જાય છે. આ ગુના અને બર્બરતાએ સમગ્ર દેશની અંતરાત્માને હચમચાવી દીધી છે. 

IMAએ આ માંગણીઓ કરી હતી

1. એપિડેમિક ડિસીઝ એક્ટ 1897 (હેલ્થકેર પર્સનલ એન્ડ ક્લિનિકલ ઇન્સ્ટિટ્યૂશન્સ બિલ-2019માં પ્રોહિબિશન ઓફ વાયોલન્સ એન્ડ ડેમેજ ટુ પ્રોપર્ટી)માં 2020ના સુધારાને ડ્રાફ્ટમાં સામેલ કરવામાં આવ્યા હતા અને તે કેન્દ્રીય કાયદો બન્યો હતો. તેનાથી 25 રાજ્યોમાં સુરક્ષા પ્રદાન કરશે. 
2. તમામ હોસ્પિટલોના સુરક્ષા પ્રોટોકોલ કોઈપણ એરપોર્ટ કરતા ઓછા ન હોવા જોઈએ. હોસ્પિટલોને ફરજિયાત સુરક્ષા અધિકારો સાથે સલામત ઝોન જાહેર કરવા જોઈએ. હોસ્પિટલોમાં સીસીટીવી, સુરક્ષા કર્મચારીઓની તૈનાતી અને પ્રોટોકોલનું પાલન કરવું જોઈએ.
3. પીડિતા 36-કલાકની ડ્યુટી શિફ્ટ કરી રહી હતી, તેથી આરામ કરવા માટેના રૂમ સહીત  સલામત સ્થાનોની જરૂરિયાત, અને  નિવાસી ડોકટરોના કામકાજ અને રહેવાની સ્થિતિમાં ધરખમ ફેરફારોની જરૂર છે.
4. કોઈપણ ગુનાની તપાસ નિયત સમયમર્યાદામાં કાળજીપૂર્વક અને વ્યવસાયિક રીતે થવી જોઈએ, અને ન્યાય પૂરો પાડવો જોઈએ.
5. શોકગ્રસ્ત પરિવારને યોગ્ય અને સન્માનજનક વળતર મળવું જોઈએ.