Video: દિલ્હીમાં ‘લોકતંત્ર બચાવો’ માર્ચ, ચૂંટણી પંચની કચેરી તરફ કૂચ કરી રહેલા પ્રદર્શનકારીઓને પોલીસે અટકાવ્યા

મતદાર યાદીની ખાસ સઘન સુધારણા પ્રક્રિયા (SIR)ના વિરોધમાં શુક્રવારે દિલ્હીમાં ‘લોકતંત્ર બચાવો’ પ્રોટેસ્ટ માર્ચ યોજાયો હતો. ખેડૂતો, વિદ્યાર્થીઓ, યુવાનો અને વિવિધ નાગરિક સંગઠનોના સભ્યોએ મધ્ય દિલ્હીમાં ભારતના ચૂંટણી પંચ (ECI)ના મુખ્યાલય તરફ કૂચ કરી હતી. જોકે, પોલીસે પ્રદર્શનકારીઓને રસ્તામાં જ અટકાવતાં તેઓ ત્યાં જ બેસી ગયા હતા અને આયોજકોની જાહેરાત મુજબ ‘જન સંસદ’ યોજી હતી.

‘SIR રોકો, જ્ઞાનેશ કુમાર રાજીનામું આપો’ના નારા

દિલ્હી કોઓર્ડિનેશન કમિટી ઑફ પીપલ અગેન્સ્ટ SIR દ્વારા આયોજિત આ માર્ચમાં પ્રદર્શનકારીઓ હાથમાં તિરંગો અને સંગઠનોનાં બેનરો લઈને જોડાયા હતા. તેમણે મુખ્ય ચૂંટણી કમિશનર જ્ઞાનેશ કુમાર વિરુદ્ધ નારા લગાવ્યા હતા. પ્રદર્શનકારીઓએ મતદાર યાદીમાંથી નામો દૂર કરવામાં આવી રહ્યાં હોવાનો આક્ષેપ કરતાં SIR પ્રક્રિયા રોકવાની માગ કરી હતી. માર્ચમાં CPI(M)નાં વરિષ્ઠ નેતા વૃંદા કરાત ઉપરાંત ઓલ ઇન્ડિયા ડેમોક્રેટિક વિમેન્સ એસોસિયેશન (AIDWA), ઓલ ઇન્ડિયા ડેમોક્રેટિક સ્ટુડન્ટ્સ ઓર્ગેનાઇઝેશન (AIDSO), ક્રાંતિકારી યુવા સંગઠન (KYS) અને સ્ટુડન્ટ્સ ફેડરેશન ઑફ ઇન્ડિયા (SFI)ના સભ્યો પણ જોડાયા હતા. દિલ્હી, હરિયાણા અને પશ્ચિમ ઉત્તર પ્રદેશના કાર્યકરોએ પણ વિરોધમાં ભાગ લીધો હતો.

મધ્ય દિલ્હીમાં ચુસ્ત સુરક્ષા વ્યવસ્થા

પ્રદર્શનને ધ્યાનમાં રાખીને મધ્ય દિલ્હીમાં સુરક્ષા વ્યવસ્થા કડક કરવામાં આવી હતી. દિલ્હી પોલીસ અને રેપિડ એક્શન ફોર્સ (RAF)ના જવાનોને મોટી સંખ્યામાં તૈનાત કરવામાં આવ્યા હતા. ગોલ ડાકખાના નજીક કાલીબાડી માર્ગ અને ભાઈ વીર સિંહ માર્ગના ચાર રસ્તા પાસેથી શરૂ થયેલી કૂચ ચૂંટણી પંચના મુખ્યાલય તરફ આગળ વધી રહી હતી, ત્યારે પોલીસે પ્રદર્શનકારીઓને રોક્યા હતા. પોલીસે અટકાવ્યા બાદ પ્રદર્શનકારીઓએ સ્થળ પર જ બેસીને ‘જન સંસદ’ યોજી હતી. આયોજકોનો દાવો હતો કે, વિરોધનો હેતુ માત્ર પ્રદર્શન સ્થળ મેળવવાનો નહીં, પરંતુ લોકશાહી અને નાગરિકોના અધિકારોનું રક્ષણ કરવાનો છે.

‘મુખ્ય ચૂંટણી કમિશનર રાજીનામું નહીં આપે ત્યાં સુધી સંઘર્ષ ચાલુ રહેશે’

CPI(M)નાં નેતા વૃંદા કરાતે જણાવ્યું હતું કે મુખ્ય ચૂંટણી કમિશનર જ્ઞાનેશ કુમાર રાજીનામું નહીં આપે ત્યાં સુધી તેમનો સંઘર્ષ ચાલુ રહેશે. એક પ્રદર્શનકારીએ કહ્યું હતું કે આ માર્ચ જંતર-મંતરને ફરીથી મેળવવા માટે નહીં, પરંતુ લોકશાહી અને દેશને બચાવવા માટે છે. અન્ય એક પ્રદર્શનકારીએ જંતર-મંતરને વિરોધ પ્રદર્શનનાં સ્થળોની યાદીમાંથી દૂર કરવાના મુદ્દે કહ્યું હતું કે હવે દેશનો દરેક રસ્તો જંતર-મંતર બની શકે છે. આ નિવેદન દ્વારા તેમણે દેશભરમાં વિરોધ પ્રદર્શનોને વધુ વ્યાપક બનાવવાનો સંકેત આપ્યો હતો.

18 રાજ્યોનાં 88 શહેરોમાં પ્રદર્શનની યોજના

‘પીપલ અગેન્સ્ટ SIR’ સંગઠને વિવિધ શહેરોમાં યોજાનારા વિરોધ પ્રદર્શનોની માહિતી આપવા માટે વેબસાઇટ પણ શરૂ કરી છે. સંગઠનના જણાવ્યા અનુસાર, 18 રાજ્યોનાં 88 શહેરોમાં 145 સંગઠનો સાથે પ્રદર્શનોનું આયોજન કરવામાં આવ્યું છે. સંગઠને દેશભરના લોકોને જિલ્લા, તાલુકા અને રાજ્યની રાજધાનીઓમાં તિરંગા સાથે માર્ચમાં જોડાવા અપીલ કરી હતી. સંગઠનના દાવા મુજબ, અત્યાર સુધીમાં 300થી વધુ સંગઠનો આ મંચ સાથે જોડાયા છે અને આશરે 25 રાજ્યો તથા કેન્દ્રશાસિત પ્રદેશોમાં વિવિધ સ્થળોએ વિરોધ પ્રદર્શનો યોજવાની યોજના છે.

શાંતિપૂર્ણ વિરોધ ચાલુ રાખવાની ચીમકી

માર્ચ પહેલાં સામાજિક કાર્યકર પી. કૃષ્ણ પ્રસાદે જણાવ્યું હતું કે પ્રદર્શનકારીઓ ચૂંટણી પંચ તરફ કૂચ કરશે અને પોલીસ તેમને રોકશે તો ત્યાં જ વિરોધ ચાલુ રાખશે. તેમણે માગણીઓ માટે સંઘર્ષ ચાલુ રાખવાનો સંકલ્પ વ્યક્ત કર્યો હતો. PA-SIR સંગઠને એવો પણ આક્ષેપ કર્યો હતો કે નાગરિકોના ઘરમાં પ્રવેશીને તેમને નજરકેદ જાહેર કરવાની પોલીસની કાર્યવાહી યોગ્ય નથી. સંગઠનના જણાવ્યા અનુસાર, જો પ્રદર્શનકારીઓને રસ્તામાં રોકવામાં આવશે તો તેઓ ત્યાં જ શાંતિપૂર્ણ રીતે ‘જન સંસદ’ યોજશે અને નાગરિકોના લોકશાહી અધિકારોના રક્ષણનો સંકલ્પ લેશે.