ગુજરાત અક્ષરધામ મંદિર અને રામેશ્વરમ કાફે હુમલાના માસ્ટર માઇન્ડ 'ઘોરી'ની સમગ્ર ભારતમાં ટ્રેનો પર હુમલાની ધમકી

બેંગલુરુમાં રામેશ્વરમ કેફે બ્લાસ્ટની યોજના ઘડનાર આતંકવાદી ફરહતુલ્લા ઘોરીનો વીડિયો સામે આવ્યા બાદ ભારતીય એજન્સીઓ સતર્ક થઈ ગઈ છે. વીડિયોમાં તે ભારતમાં હાજર સ્લીપર સેલને દેશભરની ટ્રેનો પર હુમલો કરવા માટે બોલાવી રહ્યો છે.

ફરહતુલ્લા ઘોરીએ ટ્રેનો, પેટ્રોલિયમ પાઇપલાઇન્સ, હિંદુ નેતાઓ પર હુમલાની હાકલ કરી રહ્યો છે. ઘોરી નામનો આતંકવાદી ભારતમાં અગાઉના હાઈ-પ્રોફાઈલ હુમલાઓ સાથે જોડાયેલો છે. 1 માર્ચના રોજ બેંગલુરુના રામેશ્વરમ કેફેમાં IED બ્લાસ્ટમાં 10 લોકો ઘાયલ થયા હતા

આતંકવાદી ફરહતુલ્લા ઘોરી ભારતમાં સ્લીપર સેલને દેશભરની ટ્રેનો પર હુમલા કરવા માટે કહી રહ્યો છે તે વીડિયો સામે આવ્યા બાદ ભારતમાં ગુપ્તચર એજન્સીઓ હાઈ એલર્ટ પર છે.  ઘોરી, એક ભાગેડુ જેહાદી જે હાલમાં પાકિસ્તાનમાં રહે છે, તેણે પાકિસ્તાનની ઈન્ટર-સર્વિસિસ ઈન્ટેલિજન્સ (ISI)ના સમર્થનથી સ્લીપર સેલ દ્વારા બેંગલુરુમાં રામેશ્વરમ કાફેમાં બ્લાસ્ટની યોજના બનાવી હતી.

વીડિયોમાં ઘોરીને બતાવવામાં આવ્યું છે, જે વર્ષોથી ભારતીય એજન્સીઓના રડાર પર છે અને ભારતમાં રેલવે નેટવર્કને પાટા પરથી ઉતારવા માટે સ્લીપર સેલ બોલાવી રહ્યો છે. તે પ્રેશર કૂકરનો ઉપયોગ કરીને બોમ્બ વિસ્ફોટ કરવાની વિવિધ પદ્ધતિઓ સમજાવે છે.

ઘોરી ભારતમાં પેટ્રોલિયમ પાઇપલાઇન્સ વિશે પણ વાત કરે છે અને હિન્દુ નેતાઓને નિશાન બનાવવાની યોજના ધરાવે છે. તેમનું કહેવું છે કે ભારત સરકાર એન્ફોર્સમેન્ટ ડિરેક્ટોરેટ (ED) અને નેશનલ ઈન્ટેલિજન્સ એજન્સી (NIA) દ્વારા તેમની સંપત્તિઓને નિશાન બનાવીને સ્લીપર સેલને નબળી બનાવી રહી છે.

ગુપ્તચર એજન્સીઓના સૂત્રોના જણાવ્યા અનુસાર આ વીડિયો લગભગ ત્રણ અઠવાડિયા પહેલા ટેલિગ્રામ પર જાહેર કરવામાં આવ્યો હતો.

1 માર્ચે રામેશ્વરમમાં થયેલા વિસ્ફોટમાં ઓછામાં ઓછા 10 લોકો ઘાયલ થયા હતા. NIA, એ  3 માર્ચે કેસ સંભાળ્યો હતો, અને 12 એપ્રિલે બે મુખ્ય આરોપી અબ્દુલ મતીન અહેમદ તાહા અને મુસાવીર હુસૈન શાજીબની ધરપકડ કરી હતી. જ્યારે તાહા માસ્ટરમાઇન્ડ હતો, શાજીબે ઘટનાને અંજામ આપ્યો હતો.  તેની કોલકાતા નજીક એક લોજમાંથી ધરપકડ કરવામાં આવી હતી, જ્યાં તે નકલી ઓળખ સાથે રહેતો હતો. બંને કર્ણાટકના શિવમોગા સ્થિત ઇસ્લામિક સ્ટેટ (IS) મોડ્યુલના સભ્યો હોવાનું કહેવાય છે. આ જ મોડ્યુલના સભ્ય શારિકે નવેમ્બર 2022માં મેંગલુરુમાં વિસ્ફોટ કર્યો હતો.

ફરહતુલ્લા ઘોરી અને તેમના જમાઈ શાહિદ ફૈઝલ દક્ષિણ ભારતમાં સ્લીપર સેલનું મજબૂત નેટવર્ક ધરાવે છે. ફૈઝલ ​​રામેશ્વરમ કાફે બ્લાસ્ટના બંને આરોપીઓના સંપર્કમાં હતો અને આ કેસમાં હેન્ડલર હતો.

કોણ છે ફરહતુલ્લા ઘોરી? 

ફરહતુલ્લા ઘોરી, જેને અબુ સુફિયાન, સરદાર સાહેબ અને ફારૂક તરીકે પણ ઓળખવામાં આવે છે, તે ગુજરાતમાં 2002માં અક્ષરધામ મંદિર હુમલા સહિત અનેક હાઈ-પ્રોફાઈલ હુમલાઓ સાથે જોડાયેલો છે, જેમાં 30 થી વધુ લોકો માર્યા ગયા હતા અને 80 અન્ય ઘાયલ થયા હતા. હૈદરાબાદમાં ટાસ્ક ફોર્સની ઓફિસ પર 2005માં થયેલા આત્મઘાતી હુમલા પાછળ પણ તેનો હાથ હતો.

દિલ્હી પોલીસે ગયા વર્ષે રાષ્ટ્રીય રાજધાની અને ઉત્તર પ્રદેશમાંથી ત્રણ મોસ્ટ-વોન્ટેડ આતંકવાદીઓની ધરપકડ કર્યા બાદ કહ્યું હતું કે ઘોરી કથિત રીતે ઓનલાઈન જેહાદી ભરતીનું આયોજન કરી રહ્યો હતો. તેણે ખુલાસો કર્યો હતો કે ઘોરી આતંકવાદીઓનો હેન્ડલર હતો.

થોડા મહિનાઓ પહેલા, પુણે-ISIS મોડ્યુલના ઘણા આતંકવાદીઓ દેશભરમાંથી પકડાયા બાદ દિલ્હી પોલીસે ઘોરીનું નામ રેકોર્ડમાં લીધું હતું. અધિકારીઓએ તે સમયે દાવો કર્યો હતો કે ISI ભારતમાં સ્લીપર સેલ ચલાવી રહી છે અને હુમલા કરવા માટે યુવાનોની ભરતી કરી રહી છે.