પી. કે. નવી પાર્ટી બનાવશે ને 'પાર્ટી' પણ કરવા દેશે! : દારૂબંધી અંગે મોટી જાહેરાત અને યાદવ-મુસ્લિમો માટે આ પ્લાન

ચૂંટણી રણનીતિકાર ગણાતા પ્રશાંત કિશોરે 2 ઓક્ટોબરે નવી પાર્ટી લોન્ચ કરવાની જાહેરાત કરી છે. છેલ્લા અઢી વર્ષથી જન સૂરજ અભિયાન દ્વારા બિહારમાં પદયાત્રા કરનારા પ્રશાંત કિશોરે હવે વિધાનસભા ચૂંટણીની તૈયારીઓ શરૂ કરી દીધી છે. તેમનો ઉદ્દેશ્ય 2025માં બિહારમાં નવી સરકાર બનાવવાનો છે. આ દરમિયાન પ્રશાંત કિશોરે યાદવો અને મુસ્લિમોને એક સાથે લઈને ચાલવા માટે મોટી જાહેરાત કરી છે. પ્રશાંત કિશોરની જાહેરાતથી આરજેડી વડા લાલુ યાદવ અને તેમના પુત્ર તેજસ્વી યાદવ ચોંકી જશે.

પ્રશાંત કિશોરે કર્યું એલાન

જણાવી દઈએ કે જન સૂરજના સંસ્થાપક પ્રશાંત કિશોરે જાહેરાત કરી છે કે તેઓ 2 ઓક્ટોબરે જે રાજકીય પક્ષ બનાવવા જઈ રહ્યા છે તેમાં સમાજના તમામ વર્ગોને હિસ્સો મળશે. બિહારમાં 15 ટકા વસ્તી યાદવોની અને મુસ્લિમોની સંખ્યા 18 ટકા છે. બિહારના આ બંને મોટા વર્ગને તેમના રાજકીય પક્ષમાં યોગ્ય પ્રતિનિધિત્વ મળશે.

દારૂબંધીની પણ કરી જાહેરાત

જાણવા મળે છે કે આ પહેલા પણ જન સૂરજના સંસ્થાપક પ્રશાંત કિશોરે ઘણી વખત દારૂબંધીને લઈને મોટા મોટા દાવા કર્યા હતા. તેમણે પોતાના તમામ ભાષણોમાં કહ્યું છે કે જો રાજ્યમાં જન સૂરજ પાર્ટીની સરકાર બનશે તો તેઓ એક કલાકમાં બિહારમાંથી દારૂબંધીનો કાયદો હટાવી દેશે. તેઓ કહે છે કે દારૂબંધીના કાયદાને કારણે રાજ્યને ઘણું નુકસાન થઈ રહ્યું છે.