નિર્મલા સીતારમણનો રાહુલ ગાંધીને વળતો પડકાર: સોશિયલ મીડિયા છોડો, SIR અને EVM પર સંસદમાં ચર્ચા કરો

નાણાં મંત્રી નિર્મલા સીતારમણે કોંગ્રેસ નેતા રાહુલ ગાંધી પર આકરા પ્રહારો કરતાં તેમને સોશિયલ મીડિયા પર "પડકારો ફેંકવા"ને બદલે સંસદમાં આવીને ચર્ચા કરવાનો સીધો પડકાર ફેંક્યો છે. મંગળવારે સોશિયલ મીડિયા પર આક્રમક વલણ અપનાવતા નાણાં મંત્રીએ જણાવ્યું હતું કે, જો વિરોધ પક્ષના નેતા ખરેખર ગંભીર હોય તો તેમણે ઇવીએમ અને SIR મુદ્દે સંસદીય ચર્ચામાં સામેલ થઈને તથ્યો સાથે વાત કરવી જોઈએ.

સોશિયલ મીડિયા પ્લેટફોર્મ 'X' પર એક પોસ્ટ કરતાં નાણાં મંત્રીએ સ્પષ્ટ કર્યું કે કેન્દ્રીય ગૃહમંત્રી અમિત શાહ પહેલાથી જ કહી ચૂક્યા છે કે સરકાર SIR અને ઇલેક્ટ્રોનિક વોટિંગ મશીન (EVM) પર ચર્ચા કરવા માટે સંસદનું વિશેષ સત્ર બોલાવવા સંપૂર્ણ તૈયાર છે.

ઉલ્લેખનીય છે કે, વડાપ્રધાન નરેન્દ્ર મોદી દ્વારા વિપક્ષ પર "રાષ્ટ્રવિરોધી" હોવાનો આક્ષેપ મુકાયા બાદ રાહુલ ગાંધીએ આ મામલે પીએમ સાથે ખુલ્લી ચર્ચા કરવાનો પડકાર ફેંક્યો હતો. સાથે જ તેમણે સવાલ ઉઠાવ્યો હતો કે "વિદેશી સંબંધો"ના આરોપો પર પીએમએ તેમની સામે માનહાનિનો કેસ કેમ દાખલ નથી કર્યો? રાહુલ ગાંધીના આ નિવેદન બાદ સીતારમણનો આ વળતો પ્રહાર સામે આવ્યો છે.

'ડરો મત' કહો છો તો સંસદમાં તથ્યો લાવો: સીતારમણ

નાણાં મંત્રીએ રાહુલ ગાંધી પર પ્રહાર કરતા કહ્યું, "રાહુલજી, તમે વડાપ્રધાનને ચર્ચા માટે સ્થળ પસંદ કરવાનું કહો છો. તેના માટે પહેલેથી જ એક યોગ્ય સ્થળ છે: આપણી સંસદ, જ્યાં તમે પોતે વિરોધ પક્ષના નેતા છો. સોશિયલ મીડિયા પર પડકારો ફેંકતી વખતે તમે જે ઉત્સાહ બતાવો છો, તેવો જ ઉત્સાહ સંસદમાં ચર્ચા કરવા માટે કેમ નથી દાખવતા?"

તેમણે ઉમેર્યું, "ગઈકાલે જ ગૃહમંત્રી અમિત શાહે SIR અને EVM પર ચર્ચા માટે વિશેષ સત્ર યોજવાની ઓફર કરી છે. તમે કહો છો કે 'ડરો મત', તો પછી તથ્યો સાથે લાવો, તપાસનો સામનો કરો અને સરકારના જવાબો સાંભળવા માટે ગૃહમાં બેસી રહો. તમે બીજાઓ પાસેથી ચર્ચાના જે ધોરણોની અપેક્ષા રાખો છો, તે જ સંસદની ગરિમાનું તમે જાતે પાલન કરો."

વોકઆઉટ અને હોબાળાને લઈને સવાલ ઉઠાવ્યા

નાણાં મંત્રીએ યાદ અપાવ્યું કે જ્યારે પણ સરકાર વિપક્ષના આરોપોના જવાબો આપે છે ત્યારે રાહુલ ગાંધી અને તેમની પાર્ટી વોકઆઉટ કરી જાય છે.

તેમણે પૂછ્યું, "જ્યારે તમે સામા પક્ષની વાત સાંભળવા પણ ઊભા નથી રહેતા, ત્યારે તમે ચર્ચા કરવા આટલા આતુર છો તેવો દાવો કેવી રીતે કરી શકો? વાત માત્ર વોકઆઉટ સુધી મર્યાદિત નથી. તમે અને તમારા ઇન્ડી (INDI) ગઠબંધને વારંવાર સંસદની કાર્યવાહીમાં વિક્ષેપ પાડ્યો છે, જેના કારણે ગૃહની આખી બેઠકો ધોવાઈ ગઈ છે. જો તમે ચર્ચા કરવા આટલા જ ઉત્સુક છો, તો પહેલા સંસદને યોગ્ય રીતે ચાલવા કેમ નથી દેતા?"

'મોક પાર્લામેન્ટ' નહીં, સંસદની મજાક ઉડાવી: નાણાં મંત્રી

આ સપ્તાહની શરૂઆતમાં કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને યોજાયેલી રાહુલ ગાંધીની મોક પાર્લામેન્ટ પર કટાક્ષ કરતા સીતારમણે કહ્યું, "સાચું કહું તો, એ 'મોક પાર્લામેન્ટ'  કરતાં સંસદની મજાક વધુ હતી. તમને એ કવાયત માટે પૂરતો સમય અને ઉત્સાહ મળ્યો, તો વાસ્તવિક સંસદ પણ ઓછામાં ઓછા એટલા સન્માનની હકદાર છે."

તેમણે વધુમાં જણાવ્યું કે રાહુલ ગાંધી લોકશાહી અને બંધારણના રક્ષણની મોટી મોટી વાતો કરે છે, પરંતુ તે આદર બંધારણીય સંસ્થાઓ પ્રત્યેના તેમના વ્યવહારમાં પણ દેખાવો જોઈએ. તેમણે ઉમેર્યું, "તમે જે ગંભીરતા વિનાના મુદ્દાઓ ઉઠાવો છો, તેને સમર્થન આપવા માટે ચોક્કસ પુરાવા રજૂ કરો. માત્ર આરોપોની લાંબી યાદી બનાવી દેવાથી તમારો પક્ષ મજબૂત નથી થઈ જતો. લોકસભાના વિપક્ષી નેતા તરીકે તમારી પાસેથી ગંભીરતા અને જવાબદારીની અપેક્ષા રાખવામાં આવે છે."

પીયૂષ ગોયલનો પણ રાહુલ ગાંધી પર કટાક્ષ

કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે પણ 'X' પર પોસ્ટ કરીને રાહુલ ગાંધી પર કટાક્ષ કર્યો હતો. તેમણે લખ્યું, " રાહુલ ગાંધી: 2014થી પોતાની જાત સાથે જ ચર્ચા કરી રહ્યા છે! તમારી સરખામણી કોઈની સાથે ન થઈ શકે."