"પોતાનો ભૂતકાળ ભૂલી ગયા રાહુલ ગાંધી!" IDBI બેંકના વેચાણ પર નિર્મલા સીતારમણે આપ્યો જડબાતોડ જવાબ
IDBI બેંકના ખાનગીકરણ અને હિસ્સાના વેચાણને લઈને વિપક્ષના નેતા રાહુલ ગાંધી દ્વારા ઉઠાવવામાં આવેલા સવાલો સામે કેન્દ્રીય નાણામંત્રી નિર્મલા સીતારમણે આકરો પલટવાર કર્યો છે. નાણામંત્રીએ કોંગ્રેસ અને UPA સરકારના કાર્યકાળને આડેહાથ લેતાં જણાવ્યું હતું કે, જે લોકો આજે બેંક વેચવા સામે સવાલ ઉઠાવી રહ્યા છે, તેમના જ શાસન દરમિયાન અનિયંત્રિત ધિરાણ અને ખરાબ સંચાલનને કારણે IDBI બેંક કટોકટીમાં મુકાઈ હતી.
નાણામંત્રીએ સ્પષ્ટતા કરતાં જણાવ્યું કે, મોદી સરકારે સત્તામાં આવ્યા બાદ બેંકિંગ સુધારાઓ, બેડ લોન (NPA) રિકવરી અને યોગ્ય વ્યવસ્થાપન દ્વારા IDBI બેંકને ફરીથી નફાકારક બનાવી છે. જે બેંક UPAના સમયમાં મોટા પાયે ખોટ કરી રહી હતી અને સંકટમાં ઘેરાયેલી હતી, તેને વર્તમાન સરકારે સક્ષમ બનાવીને મજબૂત સ્થિતિમાં લાવી છે.
રાહુલ ગાંધી દ્વારા કર્મચારીઓના હિતો, દેશની સંપત્તિ અને અનામત અંગે ઉઠાવવામાં આવેલી આશંકાઓને ફગાવી દેતાં નાણામંત્રીએ જણાવ્યું કે, સરકાર પારદર્શક પ્રક્રિયા અને નિયમોને આધીન રહીને જ દેશના હિતમાં આર્થિક નિર્ણયો લઈ રહી છે. તેમણે ઉમેર્યું કે વિપક્ષ માત્ર રાજકીય રોટલા શેકવા માટે જનતા અને કર્મચારીઓને ગેરમાર્ગે દોરવાનો પ્રયાસ કરી રહ્યો છે.
