દિવાળી પહેલા રેલવે કર્મચારીઓને મોદી સરકારની ગીફ્ટ, 1866 કરોડનું બોનસ મંજૂર

 
સરકારે રેલવે કર્મચારીઓ માટે મોદી સરકારે દિવાળી પહેલા મોટી ગીફ્ટ આપી છે. પ્રધાનમંત્રી નરેન્દ્ર મોદીના નિર્દેશ બાદ કેન્દ્ર સરકારે ₹1,865.68 કરોડ  રૂપિયાના પ્રોડક્ટિવિટી લિંક્ડ બોનસ(PLB) ને મંજૂરી આપી છે. બુધવારે મળેલી કેબિનેટની બેઠકમાં આ નિર્ણય લેવામાં આવ્યો હતો. 78 દિવસના પગાર જેટલું આ બોનસ દેશભરના 11 લાખથી વધુ રેલવે કર્મચારીઓને મળશે. 

કેન્દ્રીય મંત્રી અશ્વિની વૈષ્ણવે જણાવ્યું હતું કે, આજે મળેલી મોદી કેબિનેટમાં અનેક મહત્ત્વપૂર્ણ નિર્ણયો લેવાય છે. રેલવે કર્મચારીઓ માટે આ વર્ષનું બોનસ કર્મચારીઓની મહેનત અને ઉત્પાદકતાના આધારે આપવામાં આવશે. આનાથી કર્મચારીઓને રોકડ લાભ મળશે. જે દિવાળીના તહેવારો દરમિયાન તેમની આર્થિક સ્થિતિને મજબૂત બનાવશે. ગયા વર્ષે ૩ ઓક્ટોબરના રોજ  કેન્દ્રીય મંત્રીમંડળે 11.72 લાખથી વધુ રેલ્વે કર્મચારીઓને ઉત્પાદકતા સાથે જોડાયેલા બોનસની ચુકવણીને મંજૂરી આપી હતી.