NEET પરીક્ષાની સુરક્ષામાં મોટો ફેરફાર; હવે નિવૃત્ત સૈન્યકર્મીઓ-અધિકારીઓને સોંપાશે ખાસ જવાબદારી

દેશમાં સ્પર્ધાત્મક પરીક્ષાઓની પારદર્શિતા જાળવી રાખવા અને પેપર લીક જેવી ઘટનાઓને સંપૂર્ણપણે અટકાવવા માટે નેશનલ ટેસ્ટિંગ એજન્સી (NTA) દ્વારા એક મહત્વપૂર્ણ નિર્ણય લેવામાં આવ્યો છે. હવે JEE, NEET, NET અને CUET જેવી મહત્વપૂર્ણ રાષ્ટ્રીય પરીક્ષાઓની દેખરેખ માટે NTA નિવૃત્ત સૈન્યકર્મીઓ સહિત કેન્દ્ર અને રાજ્ય સરકારના નિવૃત્ત અધિકારીઓ તેમજ સરકારી શૈક્ષણિક સંસ્થાઓના કાર્યરત અને નિવૃત્ત શિક્ષકોની સ્વતંત્ર નિરીક્ષક તરીકે નિમણૂક કરવાની તૈયારી કરી રહી છે.

વિવાદો બાદ પરીક્ષા પદ્ધતિમાં મોટા ફેરફાર

મે મહિનામાં લેવાયેલી NEET-UG પરીક્ષામાં થયેલા પેપર લીકના વિવાદો બાદ NTAની કાર્યપદ્ધતિ પર અનેક સવાલો ઉઠ્યા હતા, જેના પગલે એજન્સી હવે વ્યાપક સુધારા કરી રહી છે. અગાઉ 21 જૂન 2026ના રોજ યોજાયેલી NEET-UGની પુનઃપરીક્ષામાં લોજિસ્ટિક્સ અને પરિવહન વ્યવસ્થા માટે સેનાની મદદ લેવામાં આવી હતી. આ વ્યવસ્થા હેઠળ હવે NTA આગામી પરીક્ષાઓમાં પણ દેખરેખની જવાબદારી માટે સેનાના નિવૃત્ત કર્મચારીઓ સહિત વિવિધ ક્ષેત્રના લાયક લોકોને સ્વતંત્ર નિરીક્ષક તરીકે નિયુક્ત કરવાની તૈયારી કરી રહી છે.

સ્વતંત્ર નિરીક્ષકોની કાયમી ટીમ તૈયાર થશે

NTA દ્વારા બહાર પાડવામાં આવેલા 'એક્સપ્રેશન ઓફ ઈન્ટરેસ્ટ' (EOI) દસ્તાવેજ મુજબ, એજન્સી સ્વતંત્ર નિરીક્ષકો એટલે કે ઓબ્ઝર્વર્સનો એક કાયમી અને પૂર્વ-ચકાસાયેલ સમૂહ તૈયાર કરી રહી છે. પરીક્ષાના દિવસે દરેક કેન્દ્ર પર એક સ્વતંત્ર નિરીક્ષક તૈનાત રહેશે, જે સિટી કોઓર્ડિનેટર અને સેન્ટર સુપરિન્ટેન્ડેન્ટથી અલગ રહીને NTAના સીધા પ્રતિનિધિ તરીકે કામ કરશે. તેમનું મુખ્ય કાર્ય પરીક્ષાની નિષ્પક્ષતા, સુરક્ષા અને સુચારુ સંચાલન પર નજર રાખીને સીધો રિપોર્ટ NTAને સોંપવાનું રહેશે. આ કાયમી સમૂહ બનવાથી વર્ષભર ચાલતી પરીક્ષાઓ માટે અગાઉથી જ નિમણૂકના આદેશો જારી કરી શકાશે.

ઓબ્ઝર્વર બનવા માટે 3 મુખ્ય શ્રેણીઓ નક્કી કરાઈ

એજન્સીએ આ મહત્વપૂર્ણ જવાબદારી માટે કુલ 3 અલગ-અલગ શ્રેણીઓમાં અરજીઓ મંગાવી છે. પ્રથમ શ્રેણીમાં કેન્દ્ર અને રાજ્ય સરકારના નિવૃત્ત અધિકારીઓનો સમાવેશ થાય છે, જ્યારે બીજી શ્રેણીમાં સશસ્ત્ર દળો અથવા અર્ધલશ્કરી દળોના નિવૃત્ત કર્મચારીઓને સ્થાન અપાયું છે. ત્રીજી શ્રેણી હેઠળ સરકારી શાળાઓ, કોલેજો અને યુનિવર્સિટીઓના કાર્યરત અથવા નિવૃત્ત શિક્ષકો અને પ્રોફેસરો અરજી કરી શકશે.

વિદેશી પરીક્ષા કેન્દ્રો માટે ખાસ વ્યવસ્થા

ભારત ઉપરાંત વિદેશમાં આવેલા પરીક્ષા કેન્દ્રો પર પણ કડક દેખરેખ રાખવા માટે NTAએ ખાસ આયોજન કર્યું છે. વિદેશી કેન્દ્રો માટે જે-તે શહેરમાં રહેતા યોગ્ય ભારતીય નાગરિકોમાંથી નિરીક્ષકોની પસંદગી કરવામાં આવશે. આ જવાબદારી જે-તે દેશમાં આવેલા ભારતીય દૂતાવાસના કાર્યરત કે નિવૃત્ત અધિકારીઓ, વિદેશ મંત્રાલયના નિવૃત્ત અધિકારીઓ અથવા સ્થાનિક સ્તરે ઉપલબ્ધ લાયક ભારતીય નાગરિકોને સોંપવામાં આવશે.

લાખો વિદ્યાર્થીઓના ભવિષ્યની સુરક્ષાનો પ્રયાસ

ઉલ્લેખનીય છે કે NTA દર વર્ષે NEET-UG, JEE-Main, UGC-NET, CSIR-NET અને CUET (UG અને PG) જેવી રાષ્ટ્રીય સ્તરની પ્રવેશ અને પાત્રતા પરીક્ષાઓનું આયોજન કરે છે. દેશ અને વિદેશના હજારો કેન્દ્રો પર યોજાતી આ પરીક્ષાઓમાં દર વર્ષે લાખો વિદ્યાર્થીઓ ભાગ લેતા હોય છે. સુરક્ષામાં થયેલી ચૂક અને ગેરરીતિના આક્ષેપો બાદ વિદ્યાર્થીઓનો વિશ્વાસ ફરીથી જીતવા માટે આ નવી વ્યવસ્થા અત્યંત મહત્વપૂર્ણ સાબિત થશે.